Piyeküsü 18 - BAIBEL (BSI)

Babilon Ikiqivekeu

¹ Hipathiu kungugha launo kungumi kutau lakhi iqi cheghi keu ino ithulu. Paye ayehkipe kuka kije ae eno paw mulapuyi saghu saghuikeu huno ayeghi kuchopu yepuvue.

² Pano asutsa kuloghi lakhi lono ighamuku pi, “Ikiqivae! Babilon akijeu huye ikiqivae! Hiye aghahwu eno tughakusano mithekumo jelino tile acheuvae.

³ Kughengu ashiayeh jeli kumtsuno li shiaji kimighe ji shomzuvae; eno ayeghilo kukamiqono li sasu salha, eno ayeghilo alhikishimino liwu aghichikupo kinikulushi akeu vechewo kinimi shilukhavae.”

⁴ Tileno kungugha lono asutsa kutau lakhi ishi pikeu ino chilu: “Iwu timiqo, li launo ipeghivelo, nonguye li xineqolo chhosu kevilo. Nonguye li ghimeqhikeulo kusaje kevilo!

⁵ Kughengu atsutsu kutolo li xine kisheqhe pukupe ani, eno Alhou no li lhoksa laghi ithitoi ani.

⁶ Lino nongu peithake qhemi li peithalo, Lino shivekeu qhemi ghuthu kini li lochilelo. Lino nongu pelo shopeniye kutope qhi kehu toi, Li jukhulo ghuthu kini kutolo mukamughayi yekepu lesutulo.

⁷ Lino ajekipi eno nibonileyi pepimheke hutoi Aghime eno amlo kusapu tijehi li tsulo. Kughengu lino li likhi li vilo ishi piche; ‘Akukaliu lakhi shighi ino hile iqa ani! Niye chimemi lakhi kumoe, Niye khilemu amlo kusa shimo nani!’

⁸ Highenguno, liwu pusa jeli hipaqo kumtsu ghulo lakhino qhai li ghaqhi nani: kusukini, amlo kusa, akhuamzu; Liye amino pitiqhive nani. Kughengu li shou kughakuthau Ampeu Alhou ye akumtouke.”

⁹ Ayeghilo kukami khipaqono li salha kusaje eno li ghichikupo kusaje cheni keno tipaqoye kughou li pitikeu michhi phoipeghi keu ithulu nikeno aphughi ghenguno ighamuku qa nani.

¹⁰ Panonguye putouno puthughope ngove nani, kughengu panonguye li ghime jumsae eno ishipi, “Aha! Ahakusapu ghi lae! Aphughi akijeu, O Babilon aphughi akumtou! Atuqhudo lakhi lono oshou kughakutha ighivae!”

¹¹ Ayeghilo alhikishimi ghi li ghenguno ighamuku qa nani, kughengu khunomu hinguno hilauye panongu nhemgha qhulumoake;

¹² khunomu panoqo wu shunayi, tsandiyi, amekushotu, achiku achipu, phephepheyikeu phi, hughayikeu phi, aningayeno ghokeu phi, huchuikeu phi, balha shi ithumlakeu su-jeli, akuhahu ngo amekusho-su jelino shikeu nhemgha jeli, alazayi ngo ayi eno metsughoikeu tuno shikeu jeli nhemgha khuno qhulumoake.

¹³ Yeghuthi, vekuju mukhu, tsungquikeu, musughuta, axokutsungu teli, aji, teli, asho thi, atsu-aqu, bheri, khurshi khurkulu, aqemi eno timi lhoxu jeli khunomu qhulumoae.

¹⁴ Alhikishimino li vilo ishipi: “Thime kivi kumtsu nono pighinishi achekeu hu hauvae, owu kinikulu ngo jukivipu jeli kumtsu chevae eno noye khilemu tipaqo phulumae!”

¹⁵ Alhikishimi khunoqono tipau phughilo lhidi shikelono kinimi shiluve keno tipaqono putou puthughove nani, kughengu panonguye li ghime jupesu musae. Panonguno ighamuku qa

¹⁶ ishi pi nani; “Aha! Aphughi akijeu ghenguno kiutoi ahakusapu kela! Liye phepheyi keu phi ngo hughayi eno huchuyi keu phi pepu acheke eno shunayi chi, amekusho tu eno achiku achipula pesu li kuzupu acheke!

¹⁷ Atuqhudo lakhi lono liye kinikulu hipaqo kumtsu puhavae!” Zukilu sakichemi eno tile izuchekemi, ashukaki peithachekemi eno azughi lono aqe qechuchekemi kumtsuno putouno puthugho pesu ngove,

¹⁸ eno li pitikeu michhi phoipeghikeu panonguno ithulukelo kumtsu no ighamuku pi: “Aphughi kutau lakhimu aphughi kije hipau toikeu kuha aphike!”

¹⁹ Panonguno amlo kusa launo panoqo kutsulo ayeghi mukhu epuku eno panonguno ighamuku qae: “Aha! Aphughi kije huye kiutoi ahakusapu shivea kela! Khunoqono azughilo zukilu pighiche keno tipaqono liwu kinikulu lono kinimi shiluveche keu phughike! Atuqhudo lakhi lono liye thwokha kumtsu puhavae!”

²⁰ O kungugha! li kutsapiniyive keu ghenguno alovilo! Akimthemi eno apostolmi ngo tungkupumiqo alokivi shilo! Kughengu lino nongu lau kiu shikeno tipau ghenguno Alhou no li shou kughathabevae!

²¹ Tileno kungumi akumto lakhino athi kutsughu tuqu pahikeu atuqu lakhi ikhiqhe pesu azughilo vesu puzu ishipi, “Babilon phughi kije huye aka-agha lono hitoi vepuwuve nani eno khilemu ithulukithe move nani.

²² Akighilebo ghugha eno alekiphemi ghugha, fulili ngo afuko kuyighami ghugha khilemu chilukithe move nani. Kiukiu kumla kishimi namu ololo itaghi aghimove nani, athikutsughu sutsa khilemu chimlave nani.

²³ Akulu kuvu ololo khilemu itaghi ithulupemo nani; kulaliu eno kulapuu sutsa chimlave nani. Owu alhikishimiye ayeghiqha kumtsulo shishe akuka kuamike, eno owu kichileu kuduu pesu ayeghilo akemi kumtsu nono pishiqhike!”

²⁴ Babilon shou aghime tsukeuye tungkupumi ngo Akimthemi ji aphughi tipaulo aghikehue; mutsuqheyino ayeghilo timi khijehi pithive keno tipaqo jih aghikehue.