Piyeküsü 17 - BAIBEL (BSI)

Ngosukumlau Ashupuu

¹ Tileno kungumi tsuni abohu tsuni peakeqo gholo lakhino ilau ighino ishipi, “Ighilo, azu kutomo shou iqa akeu ngosukumlau ashupuu shou kughatha keu ino opiyeni chenike.

² Ayeghilo kukamiqono ngosukumlau ashupuu sasu shupusalha achenike eno ayeghilo timiqoye lino shupusalhakeu ji yekeuno shomzuvae.”

³ Aghungu no ipeithaluve eno kungumi huno timi kughunamokealo ixapuwuve. Tileno totimi lakhi huchuhiyi keu tughashi lakhi shou iqa akeu ino ithulu, tughashi tipau phi kumtsulo kuthakughapu tsa yepuku puae, tiye akutsu tsuni eno akibo chighi puae.

⁴ Totimi huye tsunguyi eno hughayikeu phimini pepu ae eno shunayino shikeu ngo amekushotu achiku chino ananu shipusu ae. Liulo shunayi jukhu lakhi pea, tipaulo aphikumqhupu thime ngo li salha lhoksano chhitoi ae.

⁵ Li kishelo tuqhou kiqi lono aje lakhi yepe pua: “Babilon akijeu, salhashupumi eno ayeghilo aphikumqhupumi kumtsu paza.”

⁶ Totimi huye Akimthemi jih eno Jisu ghokulu shike ghenguno pithivekemiqo jih shomzupusu ae. Ino kughono li ithulu keno niye shishe akumzave.

⁷ Ikemu kungumi huno ivilo ishipi, “Noye kushiye akumza ani kya? Totimi hipau kiqi tuqhou akeu eno tughashi akutsu tsuni akibo chighi pupuzu li xapuchekeu kiqi tuqhou akeu ino ovilo pi nanike.

⁸ Tughashi nono ithulukeu hu ghuthu lakhiye xu acheke, ikemu itehiye xuamovae; hiye aqohkutho lono ipeghini cheni eno kutsavepe nike wuve nani. Ayeghilo timi xuakemi khunoqo je ayeghiqha huthu mphi lono kuxumi kakulo yepe puaghimo nikeno, panonguno tughashi jupe akichiqhive nani. Kughengu ghuthu lakhilo tiye xuacheke, ikemu itehiye xuamovae eno tipauno ipeghikithe nani.

⁹ “Hipaulo alokutsu eno ithi kututa shikeu avehupu shianie. Akutsu tsuni ye naghuto tsuni khilehi totimi huno iqa akeno tipauke.

¹⁰ Panonguye kukami tsuni kiqi ghike, punguye ikiqivae, lakhiye ka aphi eno lakhiye ighini chephi; kughou tipauno ighini keno paye ado kitila ghengu likhi ngomasa nani.

¹¹ Tughashi ghuthu lakhiye akuxu achekemu itehiye khilemu xuamovekeu huno akukau akutacheuke, ti kukami tsuni laumike eno kutsavepe nike wuve nani.

¹² “Nono akibo chighi ithulukeu huye kukami chighike, panonguno ayehpe kepu kuka peitha mphi, ikemu tughashi gholo kumtsa ayikihedo lakhi ghenguno kukami toi ayehkipe pushi akuka ikhilu nani.

¹³ Hipano chighi kumtsuno akukumsu lakhi shipuzu panongu kuka eno ayehkipepu kuka pesu tughashi lau tsu nani.

¹⁴ Panonguno Bheriti sasu aghushi nani; ikemu Bheriti no panoqo leluve nani, kughengu paye ampemi shou Ampeu ke eno kukami shou Akukauke; eno pa papemi, kukulumi, kishekulumi kuqhano pa shou toluve nani.”

¹⁵ Tileno kungumi huno ivilo ishipi, “Azu khipau shou totimi huno iqa akeu nono ithulukeno tipau huye timi aqokitikhi shiayeh jeli eno atsa jeliqoke.

¹⁶ Akibo chighi nono ithulukeu ngo tughashi ishino asalhau hu mithi nani; lino kiu aghini keno panonguno kumtsu peuve nani eno liye aphi kumsa qhive nani; panonguno li shi chu nani eno ami pesu li pitive nani.

¹⁷ Kughengu panongu pelo Alhou no miji pusu akeu shipeniaye Alhou no panoqo mlolo akukumsu lakhi shipenikeu eno panongu wu ayehkipe kuka pesu tughashi tsupenikeu suvetsuae, tiye Alhou tsa shikupumoke kutolo tishi peniyeke.

¹⁸ Totimi nono ithulu keu huye aphughi kije huke, tipau ayeghilo kukami shou qhasupe achekeu huke.”