Piyeküsü 16 - BAIBEL (BSI)

Alhou loghu Bohu

¹ Tileno achineki lono asutsa kuloghi lakhino kungumi tsuni vilo ishi pikeu sutsa ino chilu: “Wulo eno Alhou loghu bohu ayeghi shou lepukulo!”

² Ike kungumi atughiuno wupuzu pa bohu ayeghi shou leqhi puku, ikelauye tughashi michi puakeqo eno tipau julho shisukeu mllachekemi shou kumthukumna eno sakutukeu piyi ikughive.

³ Tileno kungumi akiniuno pa bohu pesu azughi shou leqhipuku, ikelauye azuno kithimi ji toive, eno azughilo akuxu akeu lhoxu kumtsu thikhave.

⁴ Kungumi akuthuuno pa bohu pesu aghoki eno azupuki shou leqhipuku, tileno tipaqoye ahji shiwukhave.

⁵ Azuqo shou ampeu shiakeu kungumi huno ishi pikeu ino chilu: “Hipaqo shou owu kughakutha hitoi shikeulo noye achipi ke, O Akimtheu, noye acheghikeu eno achekeu!

⁶ Panonguno Alhou wu timiqo ji eno tungkupmi ji pelecheke, ikehu nono panoqo pelo ahji yepeniye tsu anike. Panonguno ithulu kuzupu shiakeu panonguno ithulu anie!”

⁷ Tileno akumllagho kipitia launo asutsa lakhi ishi pikeu ino chilu, “Ampeu, Alhou Akumtou! Owu kughakuthaqoye kuchou eno achipike!”

⁸ Kungumi abidiuno pa bohu pesu tsukinhe shou leqhipuku, eno tipau pelo ami pesu timi phuqhipe nikeu shive.

⁹ Akushukumgha huno timi pitiqhi, ikeloye panonguno pusaqo shou akuka kumto akeu Alhou je hu ghushoe; ikemu panonguye Alhou lau akimthe jekipi tsukepushi amlo xaidemoe.

¹⁰ Kungumi apunguuno pa bohu pesu tughashi kuka lakhu shou leqhipuku. Tileno tughashi yehkipeqha kumtsulo zumoyikeuno chhive eno timino sukutu kelauno panongu mili tsathae;

¹¹ panongu kusu eno apiyi ghengu lono kungugha Lhou ghushoe; ikemu panonguye pano laghi lhoksa phevemoe.

¹² Kungumi akutsughouno Eufrati ghoki kije shou pa bohu leqhipuku. Tileno kukami kipelauno chekeqo pelo pulalu peniye aghoki hu azu qhayivepe.

¹³ Tileno mithekumo ghahwu, jukelo ye achuyi toikeu kuthu, lakhino Dragon kichi lono, lakhino tughashi kichi lono eno lakhino kichileu tungkupu kichi lono ipeghikeu ino ithulu.

¹⁴ Tipaqoye tughamino amchipu jeli shiluakeu ghahwuqoke, eno hipano kuthuno ayeghiqha kumtsulo kukami akeqo lau wuve, tiye Alhou Akumtou tsala kijelo aghushi nike panoqo hekutsu kumqoniyeke.

¹⁵ “Julo! Niye kupkami lakhi toi ighini cheni. Khunono zuida apuzu pa phimini jukuto anikeno tipano lokivipue, tishianguno paye aphi kumsa iqhoiqimo nani eno aqo zulo kujomzavemo nani!”

¹⁶ Tileno aghahwuqono kukami hekutsu sawo Ibrimi tsauno Armagedon ipi chekeualo kumqoe.

¹⁷ Kungumi akutsuniuno amlhulo pa bohu leqhipuku. Tileno asutsa kuloghi lakhi achineki lono ipeghi eno ishi pi, “Hiye tavae!”

¹⁸ Tileno tsutsupha kuloe, asutsa eno tsutsusu eno shishe ayeghi- ilue. Timi lhophe kethiu khilemu tikithipushi ayeghi ilumphie; hiye ayeghi ilukeu kumtsu nguno alhoksauke!

¹⁹ Aphughi kije huye aqe kuthushi suphove eno ayeghi kokuthaqo phughiqoye kutsapiniyive. Alhou no Babilon akijeu hu kumsuchilelu eno pa loghu kighide ji li pelo pa jukhu lono shopeke.

²⁰ Zudoyeghi kumtsu ithumlavepe naghuto kumtsu hauvepe.

²¹ Apughu tuqu kije lakhi khino kilogram lhopungu toi mishisheyikeu kunguuno timi shou ikiqi ikughi. Eno aphughu pusa ghenguno timino Alhou ghushoke, kughengu pusa tiye shishe akuighupuke.