Piyeküsü 15 - BAIBEL (BSI)

Pusa Ashekhau

¹ Tileno atsutsulo akumzapu amchi kije kutau lakhi ino ithulu: kungumi tsunino pusa tsuni peche. Hipaqoye pusa ashekhauqoke eno tipaqono Alhou loghu kishekha nikeu shipesu ae.

² Tileno ino jukelauye ayina zughi lakhi toike ami gholo lekite pesu akeu ino ithulu; tughashi ngo tipau julho shisukeu eno tipau je kikihi tsukemiqo shou tokulu shiluvekemi ithulu. Panonguye Alhou no akighilebo tsukeu panoqo ulo pesu ayina zughi phivilo puthugho ae.

³ Panonguye Alhou qeu Muse sheqhekeu le eno Bheriti sheqhe keu le ishi pheae: “Ampeu, Alhou Akumtou, okumlaqo ye kije eno akumzapu ke! Ashiayeh kumtsu shou Akukau, olaghiye achipi eno kuchou ke!

⁴ O Ampeu, khuno osumsa eno ajekipi otsumoni kya? Kughengu olikhino akimtheke. Ashiayeh kumtsu ighi puzu omlla nani, kughengu ow kughakutha pephe piyevae.”

⁵ Hipathiu kungughalo achineki khaqhikeu ino ithulu eno Alhou no ngochekeu phiki tile ae.

⁶ Kungumi tsuni pusa ashekhau tsuni peakeqono achineki lono ipeghi. Panonguye tsughukhuyi mulapuyikeu phi pepuae, eno shunayino shikeu akichhekighi pesu panoqo mla khapu ae.

⁷ Tileno xuakeu lhoxu bidi gholo lakhino shunayibohu tsunilo alhokupujulo xuachekeu Lhou loghu chhitoi supuzu pesu kungumi tsuni tsuve.

⁸ Alhou kimthe jukuvu eno Alhou kuka launo amichhi ipeghi puzu achineki hu vechighive, eno kungumi tsuni huno pusa tsuni hu pesu kishekhavemoke kutolo timi khunomu achinekilo ilomlave.