Piyeküsü 14 - BAIBEL (BSI)

Xachileluvekemi Le

¹ Tileno ino jukelauye, Bheritino Zion naghutolo puthugho aghi, eno pa gholo timi 144,000 aghi, eno panoqo kishelo Bheriti je ngo pa Puh je yepuku pesu ae.

² Ikelo kungugha lono azu chhekidepiqi keu ghugha toi keu lakhi ino chilu. Asutsa tiye tsutsu kusu toike. Ino chilu keu sutsa huye alebo kuyighamino ale phekeu sutsa toike.

³ Panonguye akuka lakhu zulo eno xuakeu lhoxu bidi zulo eno muchomiqo zulo puthugho pe ale akithe lakhi pheae. Ayeghi lono xachileluvekemi 144,000 likhino kumoaye timi kutami khunomu ale tipau phethini chemoe.

⁴ Timi hipaqoye totimi pelo pano kuxu shipusapemoe, kughengu panonguye akimthe shi acheke. Panongu ye Bheritino khilau wuni keno tipau papeche; xachile luve kemi timi hipaqo gholono amsumi shighi Alhou lau eno Bheriti lau pesu tsuvekemiqoke.

⁵ Panongu ye tukutiye kuha eno akichilo akimki tsa pichemoe.

Kungumi Kuthu

⁶ Tileno kungumi kutau lakhino lhokta tsakiviu pesu ayeghilo akemiqo ashiayeh jeli, timi jeli, eno atsa jeli pichekemi vilo asheshu nike atsutsu mutalo yecheghikeu ino ithulu.

⁷ Pano asutsa kuloghi lono ishi pi. “Alhou sumsalo eno akimthe jekipi pa tsulo, kughengu pano timiqo shou kughatha nikeu tuqhudo ighivae. Kungugha, ayeghi, azughi eno azu pukiqo pano lhotsuke, itsaiqi pa mllalo.”

⁸ Kungumi akiniuno atughiu papeghi ishipi “Ikiqivae, Babilon akijeu huye ikiqivae. Lino ashiayeh kumtsu pelo li shiaji ghasumlakeu shoche peke!”

⁹ Kungumi akuthuuno atughiu pama papeghi asutsa kuloghi lono ishipi, “Khunono tughashi ngo tipau julho shisukeu mllani keno eno panoqo kishelo momu a-ulo amchi pepuni keno,

¹⁰ timi tipauye Alhou loghu ji lekitemokeu pa jukhulo lesuno shope nani. Timi tipauye kungumi akimthemi zulono eno Bheriti zulono ami ngo amichu pesu pitipuzaqhi nani.

¹¹ Panoqo pitipuzaqhi keu michhiye alhokupujulo phoiku anani. Khunoqono tughashi ngo tipau julho shisukeu mlla cheni keno timi tipaqoye putho pucho khilemu akulho qhimla nani.”

¹² Hiye Akimthemi, khunoqono Alhou zahkutsu pelu cheni keno eno Jisu lau akupulu shi acheni keno tipaqono kutuu lupeni ke ghenguno piakeu lakhike.

¹³ Tileno kungugha lono asutsa lakhi ishi pikeu ino chilue: “Hipau yelo, hinguno hilauye Ampeu huthukeu lono thikemiqo lokivipuke.” Aghungu no ishi khochile, “Mutsuqheyino tishike. Timi tipaqoye panoqono shishe ichhe ime chekeu lono akulho qhilupeniyeke, kughengu panongu kumlano panoqo pape cheni!”

Ayeghi shou Ghile Hukeu

¹⁴ Tileno ino juakelauye khungkusu metsughoyike lakhi aghi, timi toikeu lhoxu lakhino tipau shou iqa ae, tipauye shunayino shikeu kutsukuqho pua eno hashiwo tsuqhaminhei keu lakhi pa ulo peae.

¹⁵ Tileno kungumi kutau lakhino achineki lono ipeghi eno khungkusu shou iqa akeu vilo asutsa kuloghi lono ighamuku pi: “Owu hashiwo chhopuwono gholuvelo kughengu gholukepu tuqhudo ighivae; ayeghi ghile hukepushi nivae!”

¹⁶ Tileno khungkusu shou iqa akeu huno ayeghi shou pawu hashiwo chhopuwo, eno ayeghi ghile hukepushivekeu hu gholuve.

¹⁷ Tileno kungumi kutau lakhi kungughalo achineki lono ipeghi, eno pa ghi hashiwo lakhi peae.

¹⁸ Itaghi akumllagho kipitia lono kungumi ami peithachekeu kutau lakhi ipeghi, eno pano asutsa kuloghi lono hashiwo kutsugha peakeu vilo ighamuku pi, “Owu hashiwo peithalo, eno ayeghilo atsayithi pho ghothalulo, kughengu atsayithiye nivae!”

¹⁹ Ike kungumi huno ayeghi shou pawu hashiwo chhopuwu puzu atsaibo lono atsayithi gholuve eno Alhou loghu kije atsayi tsughuchekeu tughukolo tipaqo vesuve.

²⁰ Aphughi nguno khalauno tsughuchekeu tughuko lono atsayi hu tsughu eno atughuko lono ahji qoipeghi keuno akushulau kilomiter 300 eno miter kinia kutolo thonhei shi qoipeghi.