Piyeküsü 13 - BAIBEL (BSI)

Tughashi Kini

¹ Tileno azughi lono tughashi lakhi ipecheghi keu ino ithulu. Tiye akibo chighi eno akutsu tsuni puae; akibo lakhikhi shou akutsu kuqho lakhikhi puae eno tipau kutsu lakhikhi shou Alhou thaighakeu tsa aje lakhi ae.

² Ino ithulukeu tughashi tipauye angushu toi, tipau pukhuye ava pukhu toi eno tipau kichiye abongushu toi. Dragon huno pa kuka ngo palakhu eno payehkipe kuloghi pesu tughashi tsu.

³ Tipau kutsu gholo lakhiye akithipu ghuzaku puaketoi, ikemu aghuzaku tipauye vithaive. Ayeghiqha kumtsuno akichiqhive eno tughashi tipau pape wuve.

⁴ Timi kumtsuno Dragon hu mllawuve kughengu pano akuka pesu tughashi tsukehu. Panonguno tughashi mllaghi ishipi; “Tughashi toikeu khuu ani kya? Khuno tipau sasu aghushi kulupu kya?”

⁵ Tughashi pelo aqhekuza tsa eno Alhou thaighakeu tsa pilukepu kichi eno tipau pelo aqhi lhobidi kini peithalukepu kuka tipau tsupua.

⁶ Tipauno Alhou je eno pano achekeu-a eno kungughalo kuamiqo shou thaighakeu tsa pini keu shive.

⁷ Tipau pelo Akimthemiqo shou aghushi nikeu eno toluvepe nikeu shive. Timi muqojeli, atsa jeli kipimi eno ashiayeh jeliqo shou akuka peitha penikeu shive.

⁸ Ghiqhivekeu Bheriti wu akuxupu kakulo aje yepuku puaghi kemi nguno alauye ayeghi lhophe kelono acheghi kemi kumtsu tughashi hu mlla nani.

⁹ Khunono akini puani keno tipano pelo chilupelo!

¹⁰ Khuno kughaluvepe kepushi akeno mutsuqheyino kughaluve nani; azutano khuno ghiqhive kepu shi akeno mutsuqheyino ghiqhive nani. Hiye Alhou wu timiqo ghenguno kutuulu eno akupulu shiape nikepu ghulokike.

¹¹ Ikelauye ayeghi lono tughashi kutau lakhi ipecheghi keu ino ithulu. Tipauye bheriti toi akibo kini puae, eno tipauno Dragon toi atsapie.

¹² Tipauno tughashi atughiu phivilo akeuno tsukeu kuka kumto peitha eno ayeghi eno tile akemi kumtsu pelo thini keshi izave kemu vivekeu tughashi atughiu hu mllape nikeushi anguka vesu.

¹³ Tughashi hi akiniu huno amchipu kumla kije shipepiye, timi kumtsu zulo atsutsu lono ayeghi shou ami iqighi pe.

¹⁴ Tughashi atughiu zulo akeuno amchipu kumla tipau pelo shilupekeuno ayeghilomi kumtsu pishiqhipe. Eno azutakihi zaku vivekeu tughashi julho shipesu qhinikeu shi ayeghilomi vilopi.

¹⁵ Tughashi akiniu pelo tughashi atughiu julho shisu keulo atuthu sutsukulupu kuka pesu tsu, tishianguno tughashi julho pelo atsa ghi pikulupu shipeniyeke eno khunoqono tipau mllamo nikeno tipaqo pithive peniyeke.

¹⁶ Tughashi huno timi kijemi kitilami, kinimi kumlhomi, timiqemi timi qechemokemi kumtsu pelo panoqo uajeu momu akishelo amchi lakhi shipupe nikeu shie.

¹⁷ Timi khunomu amchi hipau, tiye tughashi tipau je momu tipauje kikihi aghimokeloye kuqhu-kili shimla nikeu shike.

¹⁸ Hipaulo alokutsu shimasakeu ani: khunono ithikututashi ithi ani keno tipauno tughashi kikihi phujululo, kughengu akikihi tipauye timi lakhi wu kikihi ke. Tipau kikihiye 666 ke.