Piyeküsü 12 - BAIBEL (BSI)

Totimi eno Dragon

¹ Tileno atsutsulo akichiqhi kepu lakhi ipeghi, totimi lakhino tsukinhe upu, li pukhuno aqhi nepe eno li kutsukuqholo ayepu chighikini ae.

² Liye anga mishipu ae eno anga punu kusulauno lino shishe ighae.

³ Akichiqhi kepu kutau lakhi atsutsulo ipeghi, Dragon huchuyikeu kije lakhi akutsu tsuni, akibo chighi eno akutsu lakhi shou akutsu kuqho lakhikhi pua.

⁴ Pa shomhi pesu atsutsulo ayepuqo saje akuthuu tsuqupe tipaqo ayeghi shou vepiqive. Dragon ye totimi huno anga punuqhi kemtsa tsuchuveniaye li zulo puthughope ngoae.

⁵ Lino anu lakhi punu, anu tipauye ayi kusu pepuzu ashiayeh kumtsu shou ayehpe nikeu shiake. Ikemu anuye Alhou lau eno pa kuka lakhu kudau muxape ikuve.

⁶ Totimi huye timi kughunamokeu alo Alhou no li ghenguno a-a kutope qhipuakeulo pove, tilehino liye atsala 1260 kutolo tucho-heju peniyeke.

⁷ Ikelauye kungughalo aghukishi ipeghive. Mikhail ngo pawu kungumiqono Dragon sasu aghushi, eno Dragon ngo pawu kungumino mujochile ae.

⁸ Ikemu Dragon ye leluve, pa eno pawu kungumiqoye kungughalo kiulomu ngo kepua kuhave.

⁹ Dragon akijeu, ikiqive keu huye khaghi apighi khuu vilo tughami Satan ipi chekeu eno ayeghilomi pishikiqhiu huke. Pa eno pawu kungumi kumtsu pa gholono ayeghilo vepiqive.

¹⁰ Tileno kungughalo asutsa kuloghi lakhi ishi pikeu ino chilu, “Itehiye Alhou wu xakulupu kuka eno pa kukaqha ighivae! Itehiye pawu Mesiya kuka kumto ighivae! Kughengu Alhou zulo puthugho puzu putho pucho nithikuzumi lhoksa pesu ngukuchekeu huye kungugha lono halephevae.

¹¹ Ni thikuzumi qono Bheriti jih pesu eno panonguno kuchou shepetsa pesu pa shou toluvae; kughengu nithikuzumiqoye thivekepu shike kutolo panongu kuxu tsuvenishike.

¹² Tishiaye, kungugha eno tile achekemiqo, alovialo! Ikemu ayeghi ngo azughi ghenguno kiutoi ahakusapukela! Kughengu Tughami ye nongu lau iqivae eno paye shishe aloghu ide ani, tiye pano ithiakeuno pa doye ikhonhe likhivea kehue!”

¹³ Kughou Dragon no paye ayeghilo vepiqivekeu ithuluve keno, pano totimi khuuno anu hu punukeno tipau hathuve.

¹⁴ Ikemu aluqu kije chishibo kini pesu atotiu tsupepua, tishianguno apighino hachekeu lono timi kughunamokealo yewulu peniyeke, eno tilauno ampe kuthuno tuxa kutolo liye tucho-hejuluve peniyeke.

¹⁵ Apighino azu lono atotiu yimpeuve peniye pa kichi lono aghoki pahi azu qolepipe.

¹⁶ Ikemu ayeghino atotiu kuphuluve; ayeghino akichimuku puzu Dragon kichi lono ipeghikeu zu hu munoluve.

¹⁷ Dragon ye atotiu lau shishe aloghu ideve eno atotiu tikughukomi, khunoqono Alhou no ahza tsukeu pecheni eno Jisu shepe shichenikeno tipaqo sasu aghushiniye wuve.

¹⁸ Dragon no azughimuku shou puthughove.