NEHEMIA 8 - BAIBEL (BSI)

Ezra no Ayezah Phipiye

¹ Aqhi akutsuniu loye Israilmi kumtsuno panongu taun qolo ngoluve. Tipaqhi atsala atughuni panongu kumtsu Jerusalem lo kuhokumqolu, tiye Azu Khagho lo kodibo akeulo kuholu. Panonguno Ezra achineu eno Ayezah ithishevekemi vilo AMPEU no Muse vechewo Israil tsukeu yezah iniju.

² Tighenguno Ezra no tipau pe timiqono kumqoke alo sughi, tile kiptimi, totimi eno ititunu vethakulupu timiqo thaqhu tile ake.

³ Ti khagho phivilo kodibo akeu lono pano inaqhe tsukutho lono avela kutolo Ayezah phipe panongu piye eno panongu kumtsuno amlo tsuqhiyi iniluke.

⁴ Tipa tsala ghenguno mla keu asu khachelo timiqo nguno qhemghai keulo Ezra no puthugho. Timi hipaqono pa-u ajeu puthugho ae: Matithia, Shema, Anania, Uria, Hilkia eno Maseia; eno hipaqono pa-u piyiu puthugho ae, Pedaia, Mishael, Malkhija, Hashum, Hashbadana, Zekharia eno Meshulam.

⁵ Ezra no timi kumtsu nguno akiqheu khachelo puthugho kelo timi kumtsuno pa gilo jupuku. Pano kaku lhaphe kemtsa panongu kumtsuno puthughove.

⁶ Ezra no pi, “AMPEU sheqhelo, paye Alhou akijeuke!” Timi kumtsuno kunguu a-u peqheno khochile pi, “Amen, Amen!” Panonguno agi pishiqhope ayeghilo itsaiqi no AMPEU mllae.

⁷ Tithiu panongu ithughi puzu pututa alo puthughove eno Levimi hipaqono panoqo vilo Ayezah kiqi hephopiye: Jeshua, Bani, Sherbia, Jamin, Akub, Shabethai, Hodia, Maaseia, Kelita, Azaria, Jozabad, Hanan eno Pelia.

⁸ Panonguno Alhou Yezah pano phisuve keu tsauno pekidesu eno hephopiye tishianguno timiqo pelo vethalu peniyeke.

⁹ Ayezah lo kiu shilopi puakeno timiqono chilu puzu panongu mlo shishe buvetsu eno panonguye qaithuve. Tileno ahng Nehemia, Ezra achineu eno ayezah kighithimino timi kumtsu vilo pi, “Ishi tsalaye AMPEU oLhou lau akimthe shi keu tsalake, tighenguno nonguye mloqa momu ighaqa kepu kumoe.

¹⁰ Itehi nonguye akilo wo puzu aghulhu lakhi shilo. Nongu chuqu eno aji pe kuhakemi sasu kusajelo. Ishiye ni MPEU lau akimthe shikeu ke tighenguno amlo sakivilo. AMPEU no alokivi nongu tsukeu huno nongu shikumto tsu nani ke.”

¹¹ Levimino timiqo lau wuno amlo lokughuno tsughi hi akimthe tsala loye amlo sakevilo pive.

¹² Tighenguno timi kumtsu akilo wove eno alokivishi panonguno kiu aghi keno pesu kutami sasu kuchu kusho shi auve, kughengu kiu panongu vilo phisu piye keno panonguno tipau vethaluveke.

Apusho Ghulhu

¹³ Tipa tsala thiu alaghalo kichimiqoye achinemi eno Levimi gholo kuqhano Ayezah kukutsuqo phuniye Ezra lau wuve.

¹⁴ AMPEU no Muse vechewo tsukeu Yehzalo panonguno phulu keuno Israilmi vilo Apusholo ngokeu Pinye doloye ado kitila ghenguno apusholo ngolo pi ahza tsupuake.

¹⁵ Tighenguno panongu kukutsu tsa hipau pesu Jerusalem lo ngo aphughi kutaulo akemiqo lau tsupuwuve: “Naghutoqolo wulo eno asahusu, olivsu, mirtulsubo, amsabo eno asu kutau lokaqo pighepe Ayezahlo yepe puake toi apusho shilo.”

¹⁶ Tighenguno timiqono alokaqo pighesuwo panoqo ki kutsuqalo, aki khalalo, achineki khalalo, Azu Khagho lo kodibo akeulo eno Efraim Khagho phivilo apusho shilu.

¹⁷ Hakughutsuve kelo akughu shiwuve kemi ideighi keqo kumtsuno apusho shi eno tipaqolo ngoke. Nun nu Joshua ghuloki thiuye hino atughiu shikehu timi kumtsuno alokiqi eno azukuvu shilue.

¹⁸ Apinye huthukeu tsala lono ashekha kutolo panonguno ghulo atsu-tsu Alhou Yezah amqo lakhikhi phisue. Panonguno atsala tsuni kutolo pinyike eno akutacheni loye Ayezahlo shilo pikeu toi kishekhakeu pinye shike.