NEHEMIA 4 - BAIBEL (BSI)

Nehemia wu Tokulu

¹ Ni Judami qono akupuwu kumla mla thuvapi kughou Sanbalat no chiluve keno pano amlo ide sheve eno thaigha junuqhi.

² Pa kusami zulo eno Samaria ghushimi qo zulono pi, “Hi miqemileyikemi Judamiye kiu shi aniepi kumsu ania? Panonguye aphughi shikitheveniye shiju anike sha? Panonguno aghakishiqo pe tsukeuno akumla hu tsala lakhino shiqhive lunani pi kumsu anike sha? Panonguye xinexugha mqo kipti lono aki kishipu tu mla phelu nani ke sha?”

³ Tobia no pa phivilo puthugho no pikuqha ghi pi, “Panonguno kiu toi keu kupuwu mlalunia? Sher lakhi nomu tukuluve nanike!”

⁴ Ino ishi inikhu, “O Alhou, panonguno ni thaigha junuqhi akeu inijulo! Panongu tsa lhoksaqo panongu kutsu shou ikuve pelo, panonguno akeu thaqhu suxaluve pelo, panonguye akughushi sasu inaghami yeghilo wuve pelo.

⁵ Panongu lhoksa peivetsu kevilo, panongu xine kumsumave tsu kevilo, kughengu panonguno ningu akumla kishimi piputha anie.”

⁶ Tishieno ninguye akupuwu mlakithe auve eno itheno akumla hu akiqhe lau tuxa kuto mlaluve, kughengu timiqono aghuiloqhiyi mlake.

⁷ Sanbalat ngo Tobia eno Arabmi ngo Amun eno Ashdod miqono ninguno Jerusalem kupuwu kumlalo thuwu akeu chilu eno akupuwulo ita kututa shi akeqo mekhave ani pikeu chilu puzu panonguye ighono amlo ideve.

⁸ Tighenguno panongu kumtsu ighieno Jerusalem leno kubangkeu sughi tsuniye kuchughu kuqhave.

⁹ Ikemu ninguno niLhou vilo inikhu eno putho pucho panongu ghenguno timi ghukhe qhiluve.

¹⁰ Juda lo timiqono ale lakhi phekeu ani: “Ninguye ape kimshi pukeno lhovae; Xinexugha peve kepu kutomo anie. Ninguye ishino kishi akupuwu mlaluni kya?”

¹¹ Nino ighino panongu pithive moke kutolo panonguye ningu ithimo nani, momu ningu ithulumo nani pi nighumi no pie.

¹² Ikemu Judami khunoqono aghumi gholo xu akeno panonguno ado adolo ighieno nighumino ningu shou kiu kukughu shi akeno pe ningu kutughuve tsu che.

¹³ Tighenguno ino timiqo azutakihi, angu eno asuzu nanu pipeno panongu pelo akupuwu tikhau alagha alaghano ngope eno akumla shikhamono akeu-a qolo tishi ngopeke.

¹⁴ Timiqoye ta amlo ime akeu ino ithive tighenguno ino panongu vilo pano sakiphemiqo eno hiyam kumlamiqo vilo pi, “Nonguye nighumi msa kevilo. AMPEU ye kiu toi kije eno akumsapu eno noghakhumi ghenguno, no nuliqo no nipuqo eno no thikuzumi ghenguno kichighi nanike.”

¹⁵ Nighumiqoye ninguno pano muqu ithiva pi chiluve eno Alhou no panongu kukughuqo hexave tsuapi ithive. Tithiu ningu kumtsu akupuwu hu mlakithe nike idesu wuve.

¹⁶ Tinguno tilauye iwu timi tuxano akumla shi eno tuxaye aghu nanu, angu, azuto eno asuzu ghunanuqo pepuluveno puthugho aghukhe luve eno ningu sakiphemino vejoi

¹⁷ akupuwu mlakithe akemiqo kuphu auve. Kisuyezu kipemiqo ghi au tuxano mlano tuxaye aghunanu peae,

¹⁸ mla akemi lakhi khino achitalo pa zutakihi chhe puke. Timi khuno afuko ighaniye akeno pano igholo ngoke.

¹⁹ Ino hiyam lo kumlami sakiphemi eno timiqo vilo pi, “Akumla ye kijekushuwo qhachhope ani kehu ninguye akupuwu no ningu shokhape lakhino lakhiu muqo kusutsa kile lumoe.

²⁰ Tsala nonguno afuko ghugha chilu aye isuho luvelo. Ni Lhou no ningu ghenguno aghu shivetsu nanike.”

²¹ Tighenguno tsala kipetsu inaqhe kuvu mtsa lono kijiliu ayepu ipeghike kuto ningu tuxaye akupuwulo mla ae eno timi tuxaye angu pesu aghukhe ae.

²² Tipado loye panongu eno panongu kukuphumi kumtsu puthoye Jerusalem phughilo ngove eno putho pucho mla akelo kheluve kepu shilepi timi atomiqo vilo pive.

²³ Niye putholomu iphiqo lhaqhimoe eno titoi ikusamiqo mu, iqemi mu momu ikhemiqo mu aphimini xaqhimoe. Ningu kumtsu aghunanu ningu ulo pe ae.