NEHEMIA 3 - BAIBEL (BSI)

Jerusalem Kupuwu Mlakithe

¹ Hitoi shipuzu Jerusalem kupuwu mlakitheke. Achinetou Eliashib ngo pa kusami achinemino Bheri Khagho hu mlakitheve eno tipau shikimthe pesu khaghoqoye pututa alo qhi. Panonguno Aqhe Qoki ngo Hananel Qoki kutolo akupuwu hu shikimtheke.

² Jerikho lo timiqono tipa shelo amqo lakhi shiqhive. Imri nu Zakur no amqo lakhi shiqhilu.

³ Hasena limiqono Akha Khagho shiqhilu. Panonguno piphi boqhasu ngo khaghoqo pututa alo qhi eno boltu ngo akhaduqo mlasuveno khagho khadu shisuve.

⁴ Hakoz tilimi Uria nu Meremot no tipa shelo amqo lakhi mlaqhiluve. Meshezabel tilimi Berekhia nu Meshulam no pashelo amqo lakhi mlaqhilu. Bana nu Zadok no tipashelo amqo lakhi mlaqhilu.

⁵ Tekoa lo timiqono tipashelo mlaluve, ikemu panongu atomiqoye kughu kutsumiqono aphi auno mla kepushi kutotsu keu mlatsu moe.

⁶ Pasea nu Joiada ngo Besodeia nu Meshulam pamano Aqau Khagho mlaluve. Panonguno amkhusu ngo khaghoqo pututa alo qhi eno khagho hu khanike boltu ngo akhadu mlasuve.

⁷ Gibeon lono ighikemi Melatia, Meremot lono ighikemi Jadon eno Gibeon timi ngo Mizpa timiqono Eufrati Kulolau ahng kungoki kutolo mlaluve.

⁸ Harhaia nu Uziel shuna kiyiqimi lakhino pashelo mlaluve. Axokutsungu teli kumlami lakhi Hanania no pashelo Jerusalem qha Kije Kupuwu kutolo mlaluve.

⁹ Jerusalem distrik tuxatsalo ayehpeu Hur nu Refaia no pashelo mlaluve.

¹⁰ Harumap nu Jedaia no pashelo paki phivilo mlaluve. Hasabenia nu Hatus no pashelo mlaluve.

¹¹ Harim nu Malkhija ngo Pahat Muab nu Hashub pamano pashelo mlaluve eno Shuchekeu Qoki ghi mlaluve.

¹² Jerusalem tuxau distrik lo ayehpeu Halohes nu Shalum no pashelo mlaluve. (Pa ngaqono mla pa kuphu ke).

¹³ Hanun ngo Zanoa phughilo xukuamiqono Akhila Khagho mla kitheve. Panonguno thosu alo khagho mlasu, boltu ngo khagho khanike akhadu mlasuve eno akupuwu miter 440 mlape Xinexugha Khagho kutolo mlave.

¹⁴ Rekhab nu Malkhija, Bet Hakharem distrik lo ayehpeuno Xinexugha Khagho mlave. Pano khaghoqo tipa alo mla suno akukhapu boltu eno akhaduqo mlasuve.

¹⁵ Kolhoze nu Shalum, Mizpa distrik lo ayehpeuno Azupuki Khagho mlave. Pano khagho la ghakhave eno khaghoqo thosu alo mlasu eno boltu ngo akhaduqo mlasuve. Shela Zukikhelo pano kukami ghutu kutolo akupuwu mlave, tiye David phughi lono anepa iqi akeu kutolo mlaveke.

¹⁶ Bethzur distrik tuxatsalo ayehpeu Azbuk nu Nehemia no pashelo mlalu, pano David kumo kuqhoa kutolo azukikhe ngo ghushimi kungo tupikiye mlalue.

Levimi Akupuwu Mlakemi

¹⁷ Hi Levimino ashe ashe loshi akupuwu bokutha kini kuthu mlalu. Bani nu Rehum no pashelo mlalu. Keila distrik lo ayehpeu Hashabia no pawu distrik je lono pashelo mlalu.

¹⁸ Keila distrik tuxau kudau ayehpeu Henadad nu Bavai no pashelo mlalu;

¹⁹ Jeshua nu Ezer, Mizpa lo ayehpeuno aghunanu qhiche keua zulo khipa alono akupuwu hochhesu wuve keno tipa kuto mlalu;

²⁰ Zabia nu Baruk no tipashelo mlalu, paye Achinetou Eliashib kilo ikulola kutolo mlalu;

²¹ Hakoz tilimi Uria nu Meremot no pashelo Eliashib ki shekha kutolo mlalu.

Achinemi Akupuwu Mlakemi

²² Hi achinemino tipashelo akupuwu bokutha kini kuthu mlalu; Jerusalem hokumxalo kuami achinemi qono tipa shelo mlalu;

²³ Benjamin ngo Hashub pamano tipa shelo pama ki zulo mlalu; Anania tilimi Masei nu Azaria no tipashelo pa ki zulo mlalu;

²⁴ Henadad nu Binui no tipa shelo Azaria ki she lono akupuwu cheku kutolo mlalu;

^25-26 Uzai nu Palal no achekeu kupuwu eno kunguu kukaki wu aqoki akhemi kughaki phivi lono huthusu tipa shelo mlalu. Paros nu Pedaia no tipa shelo mlalu, tiye kipelau Azu Khagho ngo Achineki ghukhe qoki kupunu kuto mlake. (Tiye Ofel phughi kupunulo achinekilo kumlamiqono achekeu kupunu loke.)

Akumlami Kutami

²⁷ Tekoamino tipashelo mlalu, panonguye akiniu mlakeu, tiye Achineki khechekeu qoki kije ghungu lono huthu puzu Ofel kupunulo akupuwu kuto mlake.

²⁸ Achinemi aqo lakhino tipa shelo Khurshi Khagho lono ahuu kudau pututa ki zulo mlalu.

²⁹ Imer nu Zadok no tipa shelo paki zulo mlalu. Shekania nu Shemaia kipelau khagho kheuno tipa shelo mlalu.

³⁰ Shelemia nu Hanania ngo Zalap nu akutsughou Hanun pamano tipa shelo mlalu, tiye akiniu kikiphi lono. Berekhia nu Meshulam no pashelo paki zulo mlalu.

³¹ Malkhija, shuna kiyiqiuno tipa shelo mlalu, tiye achineki kumlami ngo alhikishimi qono ngoche keu ki ti Hekutsu Khagho phivilo ahuu kipela kudau khagho cheku kibo kupunu kutolo mlalu.

³² Shuna kiyiqimi ngo alhikishimi no ashekhau bokutha mlalu, panonguno acheku bo lono hu Bheri Khagho kuto mlalu.