NEHEMIA 2 - BAIBEL (BSI)

Nehemia no Jerusalem lo Wu

¹ Aqhi bidi thiu ghulo lakhi, akukatou Ahaserus no avelau ghulhu shi akelo ino aji pewo pa tsu. Puzuu paye khilemu imlokusa gi ithulu mphie.

² Ikehu pano iniju, “Noye kushiye amlo saqhiyi ani kya? Noye kusukini shiamoe ikeke noye amlolo alokivi kuhano ani putsae.” Ino ighono msaveno

³ khochile pi, “Akukau pelo axu shupeniu! Niye kishi puzu ipuasuqo kumo qhope puakeu phughi ixapiniyi anike amlo samono aluni kya? Tipau khaghoqoye amino pitileveno anike!”

⁴ Akukatou no iniju, “Tishiaye noye kiu avehupu shi ani kya?” Tileno ino Kungugha Lhou vilo inikhu no

⁵ ino akukatou vilo pi, “Akukauno ilau amlo qilu aghi aye eno ino qhuiniju keu pulotsu kepushi aye, ipelo Juda yeghilo wuno ipuasuqo kumoqho puakeu phughi mlakithelu pelo.”

⁶ Akukatou gholo akukaliu ghi ngo ake, ino qhuiniju keu hu ikhiluvetsu. Niye ado khitohi luve nani, kughono ide ighilu nani keno ivilo iniju eno ino pa vilo pive.

⁷ Tishieno ino akukatou vilo ighenguno yekili yepesu Eufrati Kulolau Aghakhuqolo ahng akeqo lau tsutsu lepi qhuiniju tishianguno ipelo Juda lo cheulu peni kehu.

⁸ Asap lau ghi yekili lakhi yetsu lepi qhuiniju, pano kukami ghasu kheu kehu pa pelo toktasu itsu kulupu shipe nike, tiye achineki hukikha wu khagho ngo aphughi kupuwu ghengu eno ino ngokepu ki ghenguno ke. Akukatou no ino khukeqo kumtsu itsuve kughengu Alhou no igholo ake.

⁹ Akukatouno ghushimi kijemi khami gholono khurshimi aqo lakhi ishi igholo puwu eno niye Eufrati Kulolau chewuve. Tilau ino akukatou wu yekili pe ahng miqo tsu.

¹⁰ Ikemu Bet Horon taun lo Sanbalat eno Amun ghakhumi ofiser lakhi Tobia ipikeu pamano chilu keuno timi khami Israilmi kivipu ghenguno mlaniye ighi ani pikeulo panonguye ighono amlo shimove.

¹¹ Niye Jerusalem lo wu eno tsala kuthu kutolo

¹² Alhou no Jerusalem ghenguno kiu mla kepu ilolo hakite sutsu keno niye khuvilomu pimono ae. Tishieno zubumta lono ithu puzu igholo timi khami sasu khalau ipeke. Ino gadaha shou ikuno cheke.

¹³ Ino aphughi qhiveno kulolau Akhila Khagho vechesu apeu Dragon Zupuki hechesu Akutsukumna Khagholo wuke eno tishi ake kutolo putho shi ae. Ino wuche kelo aphughi kupuwu ipopiniyive keqo eno amino pitivekeu khaghoqo xujusu wu.

¹⁴ Tithiu aphughi kipela kudau ino ahuu Azupuki Khagho eno Akukau Zukikhe lo wu. Tinguno tilauye ino ikuche keu gadahaye xinexughano tulepiniyi akeqo vechesu wukepu la kuhave.

¹⁵ Tighenguno niye Kidron khilalo iqive eno akupuwu ju ghi chesu wu. Tithiu ino ighi keu lalo xaidesu wo eno Akhila Khagho lono aphughilo idewove.

¹⁶ Tile kuami khumu ino khilau wu eno kiu shi akeno mthae. Tikutolo niye ikusami Judami vilo, achinemi vilo, kijemi vilo eno mlaniye akemiqo khuu vilomu kiumu pimono ae.

¹⁷ Tileno ino panoqo vilo pi, “Ninguye kiu vekusapulo ani keno julo kughengu Jerusalem ye ixapiniyi ani eno tipaulo khaghoqoye ixapiniyi anie! Ninguno aphughi kupuwuqo mlanie eno ningu kukujopu tavepe nie.”

¹⁸ Alhou no kishi igholo akeno eno ikuphu akeno eno akukatouno ivilo kiu pikeno tipau ino panoqo vilo pike. Panonguno Khochile, “Ningu ithuno mulapukuni.” Ike panongu u kumto kuqhano akumla kivi shinikeu huthuve.

¹⁹ Kughou Sanbalat ngo Tabia eno Arabmi Geshem pano kuthuno ni kukughuqo ithive keno panonguno ni junuqhi eno ishi pi, “Nonguye kiu mla anipi kumsu ania? Nonguye akukatou hebideniye ani keshea?”

²⁰ Ino khochile, “Kungugha Lhou no nitsu nanike. Ninguye pa qemike eno ninguno mla thunike kuto anie. Ikemu nonguye Jerusalem lo no mheghi kumu kuhae eno khaghino pekishe pe ighikeu saje nonguye kumu kuhake.”