NEHEMIA 13 - BAIBEL (BSI)

Inaghami launo Kututa Shiluve

¹ Kughou Muse Yezah timiqo lau asheshu phisu keno Amunmi momu Muabmi pelo Alhou wu timiqo gholo kuqha pemo nikeu tsajo yepuakeu dolo philu.

² Kutau ghenguno kumono Amunmi ngo Muabmino Israilmino Ijip lono ipeche kelo achuqupu momu azumu piyemo kehue. Tishi kepu shi ake zuqhulo panonguno Israilmi ghushove peniye pisa pesu Balam tsuke, ikemu niLhou no pa pelo ghusho nike zuqhulo kumghavetsu peke.

³ Kughou Israilmino tipau yezah phisu keu chilu keno panonguno inaghami kumtsu pano shiyeh gholono ikhipheve.

Nehemia no Shikithekeqo

⁴ Achineu Eliashib ye achinekilo anhemgha kiqhia jukutsuu shi ake eno paye ado kushuwolo Tobia sasu akivishi kukusu ache.

⁵ Pano Tobia pelo achinekilo abo kije tuxatini gho tsukeu, axokutsungu puachekeu bo, achinekilo tinhemgha peitha chekeu, achinemi ghenguno agho tsukeqo, chighi saje tuxatini, aji eno oliv teli Levimi, achinekilo ale kiphemi eno achineki khemi pelo peitha peniye puakeqo Tobia pelo peitha penikeu shive.

⁶ Tishi ake ghulokilo niye Jerusalem lo kuhae kughengu akukau Ahaserus no Babilon lo kakeu ampe shighi akiniu shi akelo niye pa lau pivenike wuve. Ado kushuwa womono pano pulovetsukeu kiqi lono

⁷ niye Jerusalem lo ideighi. Tilehi Eliashib no Tobia pelo Achinekilo abo lakhi peitha penike ahza tsuve aghikeu chiluno ikichiqhive.

⁸ Niye muqhumzaive eno Tobia nhemgha kumtsu khalau ghephevetsu.

⁹ Achebo tipau achinepulo shikimthevepe nike eno achinekilo peitha kepu nhemgha ngo athi kumllaghoqo eno tsungqui-ta tipa-a lo qhikithe penike ino ahza tsuve.

¹⁰ Ino highi chilu, ike achinekilo alekiphemi ngo Levimi kutami qoye Jerusalem lo ngomoveno panoqo lulo wuve aghi, kughengu timiqono chukumkha panongu tsumove aghike.

¹¹ Panonguno achineki kughuchove aghi kehu ino kijemi ighono sakiyiqhike. Ino Levimi ngo alekiphemi achineki lo saideghi kithe eno panongu pelo itaghi mlapeke.

¹² Tithiuye Israilmi kumtsuno panongu wu tuxatini ngo aji eno oliv teli chighi saje pesu achinekilo anhemgha kiqhialo sughi thuve.

¹³ Ino timi hipaqo pelo anhemgha kiqhia jukutsumi shi vepe: Shelemia achinemi lakhi. Ayezah kighithiu Zadok; Pedaia Levimi lakhi; Zakur nu eno Matania tinu Hanan pelo panoqo kukuphuu shipe. Ino ithi akeuno panonguye amikucho shi tinhemghaqo kijepe pano kusami akumlamiqo tsulu nani kepi puluveke.

¹⁴ Ino Ochineki eno tipaulo mlla kepu ghenguno hipaqo kumtsu shikeu ghenguno ikumsulu tsulo, O iLhou.

¹⁵ Tipa ghulokilo Juda lo timiqono Sabat pinye tsalalo atsaithi lono atsaizu qophe aghikeu ino ithulu. Kutami khamino athi, aji, atsaithi, khughuthi eno kutau thimeqo pano wu gadaha shou pipeno Jerusalem alou pewu cheghi; panongu ye Sabat tsalaloye kiumu jemla kepi ino panoqo lakhave.

¹⁶ Tur phughi lono timi khami ighieno Jerusalem lo xu ache eno panonguno Sabat lono akha ngo anhemgha kutau jeli kutomo pesu niw timiqo vilo jesuniye aphughilo suiloghi.

¹⁷ Ino Judami sakiphemi sakiyi eno ishi pi, “Nonguno alhoksa kumla kiu shi anikeno julo! Nonguye Sabat shipixive tsu anike.

¹⁸ Highenguno Alhou no aphughi hipau shou kutsa kungo keu sughi kelo nopuasuqoye tipaphi shi ghimeqhike. Ikeghi nonguye Sabat shipixive puzu Alhou ghakighide Israilmi shou saghini keu khuani kesha?”

¹⁹ Tighenguno Sabat pinye huthuveke kumtsulo avelau shive kelo Sabat tamoke kutolo aphughi khaghoqoye khape qhivelo pi ino ahza tsuve. Ino iw timi khami khaghoqolo ngono Sabat pinyelo kiu nhemghamu pusu aphughilo iloghi pemonike qhikhave.

²⁰ Ghuthu lakhi momu kiniye anhemgha jeli kumtsu je ighikemi alhikishimiqoye Mucholani kijiliu putholo aphughi kupuwu khalau zuve.

²¹ Ino panoqo vilo ishi kutughuve, “Inaqhe kuto khe akepu avehupu kuhae, Nonguno itaghi hikithipu shi nike pukaputsa aye ino nongu shou anguka peithave nanike.” Tinguno tilauye panonguye Sabat pinyelo ighikithe move.

²² Ino Levimi vilo pano likhi pano shikimtheveno wupuzu khaghoqo kheluvelo pi ahza tsuke tiye Sabat akimtheshi pinyi peniyeke. O Alhou highenguno ghi ikumsulu tsulo eno okikimiye kije ghenguno ipukhape qhitsulo.

²³ Tipa ghulokilo Judami kutomono Ashdod, Amun eno Muab limiqo sasu kulakupu shiva pikeu ghi ino phuluve.

²⁴ Pano tianuliqo tuxaye Ashdodmi tsa piuve momu kutami tsa piuve eno nitsaye kishi pikepu keno mthave aghi.

²⁵ Ino timi tipaqo ighono sakiyiqhi, panongu shou angsu piqitsu penike pi, panongu heqhi eno panongu sa phivetsu. Tithiu ino panongu pelo khilemu panongu tianuli pelo inaghami sasu kulakupu shipemo nike Alhou jelono tushoqhi pe.

²⁶ Ino pi, “Akukau Solomon pelo axine shive pekeuye inaghami totimino ke. Paye ashiayeh kutami kukami nguno kijemi lakhi shi acheke. Alhou no pa kimiyeche eno pa pelo Israil kumtsu shou akukau shipeke, ike tishimu paye axinelo ikiqi iloveke.

²⁷ Tishiaye ninguye nonguno shipiye keu papeuveni keshea eno inalimi totimi sasu kulakupu shiveno niLhou gho lumoveni kesha?”

²⁸ Joiada ye achinetou Eliashib nuke, ikemu Joiada nu lakhino Bet Horon taun lo achekemi Sanbalat nga lakhi sasu kulakupu shiveke, tighenguno ino Jerusalem lono Joiada hape puwuveke.

²⁹ O Alhou, timi tipaqoye kiu toi achine kumla shikeu eno nono achinemi ngo Levimi sasu puloshoqhi shikeu shikuchhubeve tsu keno nono jupuku tsulo.

³⁰ Thwokha inaghami launo sughi keu jeli kumtsu launo ino timiqo shikimtheveke; ino achinemi ngo Levimi ghenguno pekithiyeh kutotsuke tishianguno milakhi khino pututa kumla ithipe niyeke;

³¹ akumllagho pitikepu shi ado achipi lono asu sughipe nike eno timiqo pelo panonguno athi amsu-u lukeu eno axathi xolu tughiu akumllagho shi sughi penike ino kishekulushi kutovetsu. Hipaqo kumtsu kumsulu tsulo, O Alhou eno tipaqo ghenguno ikivipu shitsulo.