NEHEMIA 11 - BAIBEL (BSI)

Jerusalem lo Ngovekemi

¹ Sakiphemi Jerusalem lo ngoluvekemi eno timi kutamino asaqhiju puzu akibo chighilo lakhi kishe pesu Jerusalem akimthe phughilo kughuna wupenikeu shi eno kutamiye aphughi kutau eno taun kutaulo kughunanikeu shie.

² Timi khunono Jerusalem lo kughunani keu shi pututano pulolu keno timiqono tipaqo akishe tsue.

³ Taun kutaulo eno aphughi kutaulo, Israilmi, achinemi, Levimi, Achinekilo mlachekemi eno Solomon qemi polo kughukomiye pututa shelo pututa phughilo amheghi akeulo kughuna cheuve. Juda yeghi bocholo sakiphemi akhotomi Jerusalem lo kughunani kemi shilukeqo jeye hipaqo ke:

⁴ Juda laghalo kihikusumiqo: Uziya nu eno Zekharia tinu Athaia. Papuasu kutami hipaqo ghi kuqha ani, Amaria, Shefatia eno Mahalalel, Juda nu Perez polo kughukomiqo

⁵ Masia ye Baruk nu eno pasuye Kolhazi ke. Pano puasu kutamiye Hazaya, Adaya, Joarib eno Zakharia ke. Panonguye Juda nu Shela kughukoqoke.

⁶ Perez polo kughukomi gholo 468 ye timi atsukupumi Jerusalem lo kughunauve kemike.

⁷ Benjamin laghalo kihikusumiqo: Meshulam nu eno Joed tinu Salu. Papuasu kutami hipaqo ghi kuqha ani, Pedaia, Kolaia, Maaseia, Ithiel eno Jeshaia.

⁸ Gebai ngo Salai ye Salu sholokumi kupunukhoi kemi. Kumtsu kuqhakelo Benjamin laghami 928 no Jerusalem lo kughuna che.

⁹ Zikhri nu Joel no panoqo sakipheu ke, Hasenua nu Juda no aphughilo kijemi aye vepukemi gholo akiniulo ake.

¹⁰ Achinemi: Joiarib nu Jedaia eno Jachin.

¹¹ Hilkhia nu eno Meshulam tinu Seraia. Papuasu kutami hipaqo ghi kuqha ani, Zadok, Meraiot eno Achinetou Ahitub.

¹² Kumtsu kuqha kelo hipa limi 822 no Achinekilo kumlami ke. Jeroham nu eno Pelalia tinu Adaia. Papuasu kutami hipaqo ghi kuqha ani: Amzi, Zekharia, Pashur eno Malkhija.

¹³ Kumtsu kuqhakelo hipau limi 242 no akiboqolo atou shicheke. Azarel nu eno Ahzai tinu Amashsai. Papuasu kutami hipaqo ghi kuqha ani, Meshilemot ngo Imer.

¹⁴ Hipano limi gholo ghushimi akumtomi 128 acheke. Panoqo sakipheuye Zabdiel akibo atou gholo kihikusumi lakhike.

¹⁵ Levimi: Hashub nu eno Azrikam tinu Shemaia. Papuasu hipaqo ghi kuqha ani, Hashabia ngo Buni.

¹⁶ Shabethai ngo Jozabad, Achineki khalau kumlalo ampimi shichekemi atsukupumi Levimi ke.

¹⁷ Mika nu eno Zabdi tinu Matania, Asap polo kughukomi lakhi. Pano shikimthi kighini lekiphelo Achinekilo alekiphemi muqo sapheche ke. Matania kukuphuu Bakbukia. Shamua nu eno Gala tinu Abda, Jeduthun polo kughukomi lakhi.

¹⁸ Kumtsu kelo Levimi 284 no Jerusalem akimthe phughilo kughuna che.

¹⁹ Achineki Khemi: Akub, Talmon eno panoqo sholokumi kumtsu kelo 172 ke.

²⁰ Israilmi kutamiqo eno achinemi ngo Levimi kutami qoye Juda lo aphughi kutau eno taun kutaulo pututa mheghilo kughuna che.

²¹ Achinekilo mlache kemiqoye Jerusalem lo aqha lakhi Ofel ipikeulo kughuna che eno Ziha ngo Gishpa pamano kichepiye keu qholono mlache.

²² Levimi shou kughukutsuu ye Hashabia tinu Bani nu Uzi ke, paye Jerusalem lo acheke. Pa puasuqo gholo Matania ngo Mika ghi ke, paye Asap limike, tipau limi no achinekilo ahoho shikelo ale phecheke.

²³ Atsala atsalalo achinekilo khuno laghano ale kishi saphe kepu keno akukauno pekithipe puatsu keu kiqi lono shicheke.

²⁴ Juda laghalo Zera limi Meshezabel nu Pethania no Persiami kughakilo Israilmi zuqhushi wucheke.

Taun ngo Aphughi Kutaulo Kuami

²⁵ Timi kutomo pututa kialu phivilo taun aghikeulo acheuve. Juda kughukomiye Kiriat Arba ngo Dibon eno eno Jekabzil lo acheuve eno tipa phughi kupunulo aphuqolo auve.

²⁶ Panonguno aphughi hipaqolo ghi acheuve, Jeshua, Malada, Bet-Pelet

²⁷ eno Hazarshual ngo Bersheba eno tipau hokumxa lo aphuqolo acheuve.

²⁸ Panonguno Ziklak phughilo eno Mekona ngo tipaulo aphu akeqolo acheuve,

²⁹ Enrimon,Ziro, Jarmut,

³⁰ Zanoa, Adulam eno taun hipaqo phi vilo aphu tipaqolo ngove. Panonguno Lakis eno tipau kupunulo aluqa akeu lo acheuve eno Azeka lo ngo tipaulo aphu akeqo lo auve. Tipau pi akeuye, Juda kughukomiqoye chhiliu Bersheba ghakhu ngo ahuu Hinom Khila dolo kughuna cheuveke.

³¹ Benjamin kughukoye Geba, Mikmas, Ai, Bethel eno tipau kupunulo aphu akeqolo

³² Anathot, Nob, Anania,

³³ Hazor, Rama, Gitaim,

³⁴ Hadid, Zeboim, Nabalat

³⁵ Lod eno Ono lo kughuna cheuve eno Shitsami Khilalo acheuve.

³⁶ Levimi aqo khami Juda ghakhulo acheghi keqoye Benjamin lagha gholo kughuna cheuve penikeu shi akupughu shivetsu.