NEHEMIA 1 - BAIBEL (BSI)

¹ Hiye Hakalia nu Nehemia no shiqhive keu ghili ke. Ahaserus no Persia lo akukatou shikeu ampe amukuulo Kislev qhilo, ni Nehemia ye Susa phughilo ake.

Nehemia no Jerusalem Kumsulu

² Ithikuzumi dolo milakhi Hanani ipikeu no timi aqo kutami lakhi sasu ighi eno ino panongu vilo Jerusalem ghili eno nikusami Judami hakughutsuve kemi Babilon lo xuaghino ideighi kemi ghili ighiju.

³ Panonguno ivilo pi, “Akuxu achilishi aghi puzu aghakhulo ideighi kulumiqo hu ighono aghime shi anie eno inaghami pano cheaxulo kuamiqono tha igha achenie eno Jerusalem kupuwu hu hexavae eno tile khaghoqo hu pitiveke lono ishi kutolo tishi aphie.”

⁴ Kughou ino tipaqo vehu chilu keno iqi iqano qa auve. Atsala hami amlo ghime shi auve eno achuqumove. Ino Alhou vilo ishi inikhu,

⁵ “O AMPEU, Kungugha Lhou; Noye kijeke eno nino ozulo msa khokhoshi puthugho anie. Noye khunono oqhuivu eno oyezahqo pecheni keno panoqo lau amikucho lono oshoqhi pua chenie.

⁶ Ilau jupuwolo, O AMPEU eno ikighini initsulo, kughengu ino putho pucho oqemi Israilmi ghenguno khu anie. Ino piphe anie, ningu Israilmino pimivae. Nipuasuqo eno ino pimivae.

⁷ Ninguno ozulo kixikila shivae eno nono ahza tsukeu shimovae. Ninguno ayezahqo khikhi oqeu Muse vechewo ningu tsukeno tipau pemoveke.

⁸ Itehi nono oqeu Muse vilo hitoi ahza tsukeu kumsululo: ‘Nongu Israilmino ilau amikucho shimove aye ino nongu pesu kutami shiyeh dolo hapiyepighi suvenie.

⁹ Ikemu nonguno ilau tsughu ide ighi eno izahqo luaye nonguno ayeghi ashekhaqolo piyepighive aghinamu sachile saghieno ino kisheluve keu alo imlla penie.’

¹⁰ “O AMPEU, panonguye oqemiqo ke, owu timike. Okuka kije eno okumtono panongu xapheluke.

¹¹ Itehi ikighini chilu tsulo eno oqemi kutami ogihu nishi akemiqo kighini initsulo. Ishino ni oqeu pelo tolu pelo eno akukatou Ahaserus pelo ikimiyelu pelo.” Tipa ghulokilo niye akukatou wu ajukhu kipeu shi ache.