NAHUM 2 - BAIBEL (BSI)

Nineve Puhave

¹ Nineve ole nike kutoluvae! Ohepho kighiniyive nikeu kuka ighivae. Aliwo lono khelulo! Ala khelulo! Aghushi nike kutolo!

² (Israilmi yeghiye aghumino kutsakungoveno kumsa shiveke, ikemu AMPEU no ajekipi eno akuka sughi chiletsu nani.)

³ Aghumi ghushimiye huchuikeu zuto xapu eno huchuikeu phimini pepu cheni. Panonguye leniaye kuto ani! panoqo khurkuluye ami toi kulophaike! Panongu khurshi qono apukhu qhaqha ithake!

⁴ Khurkuluno alaghilalo muqhu mza kohake, aphughi mtalo pohu powoke. Panonguye ami kuluqhe toi kulophaphaike eno tsutsupha toi kohakiveke.

⁵ Kijemiqo kukumqo; panonguno azuu hahukelo kupuxake. Leighikemi qono puwupuakeulo posuwu eno chishiphokepu ghenguno azuto pesu ghopeqhi.

⁶ Aghoki phivilo akikha akeu mpale khaqhie; kumsa kighichipuno akukau ki chhive.

⁷ Akukau nipuye tshupe sawuve; li qemiqono miqhedu toi mulo qake eno amlo kusashi panoqo mula heke.

⁸ Khakuthabo ipovekeulo azu tule ipeghi keshi Nineve lono timiqo kohaipe! “Ngovelo! Ngovelo!” ipi ighakeu sutsa shi ikemu milakhimu athiu ighoighimoke.

⁹ Tsandiyi xulepuwulo! shunayi xulepuwulo! Aphughiye akini kumzapu pekutsu puani!

¹⁰ Nineve ye kutsaleve, ngomove, kughukughaleive! akumsano amlo hauve; akhonheno khokhoshi, akumto have; agino phalaive.

¹¹ Abongushu kungoa toikeu phughi, itehiye khilavea kya? Abongushu lhothe pulhuchekeu-a khilehino abongushu atsu ngo aqu wuchekeno eno pano tiqo punaqhimokeu-a toikeu phughiye khilavea kya?

¹² Abongushuno lhoxu heqhino pa tuna ngo li tiqo ghenguno tipau suthapinyive cheke; pa kungo-alo ashi sukuthano chhitoike.

¹³ Aqokitikhi MPEU no pi, “Niye oghumike! Ino owu khurkulu pitilevetsu nani. Owu ghushimiqoye aghushi lono pithikhave nani, nono kutami launo suwuvekeu kumtsu ino suwuve nani. Hinguno hilauye ayeghiqhalo okuka kumto chilu pemove nani.”