MICAH 7 - BAIBEL (BSI)

Israil Xukupusa

¹ Niye ahakusapuke! Niye muzuthi kemi lakhino asubolo axathi kuhave aghikeu eno atsayibolo atsayithi kuhave aghikeu sholu akeu toike. Atsayithi kumtsu eno khughuthi chukivi kumtsu xoluve aghikeu sholu akeshike.

² Aghakhulo timi lakhimu achipiu shikemi aghimoveke, milakhi nomu Alhou qhoqhukeu kuhae. Kumtsuno timi heqhipithi nikeu dokivi khe akhani. Kumtsuno akusami meluniaye hake.

³ Panongu kumtsu alhoksa shinikeulo shitsake. Kijemi ngo kughakuthamino kulugho khu cheni. Kijemiqono panoqo vilo pano mlolo shinishi akeu picheni ikehu panongu kumtsano akukughu shi cheni.

⁴ Panoqo gholo akiviu eno achipi kuchou ipikemino alupi toi ame kuhamitheke. Alhou no timiqo ghime nikeu tsala ighivae, tiye pano tungkupumi vechewo panoqo kutughuvekeu toike. Itehiye timiqoye avehu izuvulaivae.

⁵ Okisughumi pulukevilo momu oshompami pukhu kevilo. Onipu vilo kiu pinikeno tighi kuto kupui shilo.

⁶ Hipa ghulokiloye anunoqono apuaza pesu kughuzumi toi peitha ani, anganoqono azanoqo mujochile ani eno topu lhothemino anilimi sasu muto ani; timi lakhi ghumi ye pano kibolomi qonoke.

⁷ Ikemu niye AMPEU kheju anike; niye pulopiniyi ixalu nikeu Alhou huqhe anani. ILhou no ikighini initsu nani.

AMPEU no Xakulu Sughi

⁸ O nighumi, nijupesu no-mloqi akepu kuhae. Ninguye ikiqivae ikemu itaghi idethughi nani. Itehi ninguye akuzulo ani ikemu AMPEU no akuvu nitsu nani.

⁹ Nino AMPEU shou axine shiveke itehiye ado ikhonheyi ghenguno pa loghu pumoaye sake. Ikemu ashekhaloye pano nisusho nani eno nishou akumou shikeu kumtsu shikumzu nani.

¹⁰ Tile nighumi qono tipau ithulu puzu kujove nani, ti nighumi, ni-cheqhi puzu nivilo, “No Lhou AMPEU ye khile ani kya?” ipi inijue. Panoqo shou toluvekeu eno panoqoye alaghilalo aniba toi neda qodakeu nino ithulu nani.

¹¹ Jerusalem lo akemiqo, aphughi kuputu shikithe puku nikeu ghuloki wocheni. Tipa ghulokiloye noghakhuqhaye pekhove nani.

¹² Nowu timiqoye aqha kumtsu lono, kipelau Asiriya lono, apeu Ijip lono, Eufrati qhalono, azughi putou akeu kudauno eno naghuto putou akeu kudauno nongu lau ideighi nani.

¹³ Ikemu ayeghiye tilehi xuakemiqono kusakugha shi xukeu ghenguno asayeqha ilhouve nani.

AMPEU no Israil Kupukeu

¹⁴ O AMPEU, owu timi nono kisheluve kemiqo shou bherikheu shilo. Panongu kutoshi timi kughunamoke-alo xuaghimu ayeghi ghumakivino panoqo suhupe ani. Kha-ghi shicheke toi panoqo pelo Bashan ngo Gilead lo achu kumzapu kinikulu shi akeulo chupelo.

¹⁵ O AMPEU, nono Ijip lono nisasu ipeghike ghulokilo shikeshi nighenguno akumzapu kumla shitsulo.

¹⁶ Ashiayehqono tipau ithulu puzu panoqo kumto shishe ae pinamu avesave pelo. Apuchopungo kelauno pano kichi kujuluve eno pano kini kiyikhaluve nani.

¹⁷ Panonguye apighi toi ayeghi mukhulo itiwu nani; pano liwo qogheqo lono musa khokhoshi ighi nani. Panonguye akumsa launo AMPEU niLhou lau ideighi nani.

¹⁸ O AMPEU, otoi keu lhou kutau kuhae; nono owu timi, puxupe puaghitsu kemiqo xine peivetsuke. Noye alhokupujulo aloghu ideauve chemoke ikemu nilau owu lhokta kikimiye piye nikeulo ozukuvu shi achenike.

¹⁹ Noye itaghi nilau kupuqhiyi kithe nanike. Nono nixineqo apukhuno nedaqodave nani, eno azughi polalo tipaqo vesuve nanike!

²⁰ Nono amikucho ngo owu iqemokeu kikimiye pesu owu timiqo, Abraham ngo Jakob polo kughukomi lau piye nani, tiye kha-ghino nono nipuasu vilo piqhipuakeu toi shi nani.