MICAH 6 - BAIBEL (BSI)

Israil shou AMPEU wu Kughakepu

¹ AMPEU no Israil shou kughakepu akeu inijulo! O AMPEU ithulo eno owu kughakepu peighilo; naghuto ngo atoqo pelo nono pikeu chilu pelo.

² Nongu naghutoqo, nongu ayeghi boqhaqo, AMPEU wu kughakepu akeu inijulo! AMPEU ye pawu timiqo shou kughakepu lakhi ani. Pano Israil shou ngukube kepu lakhi sughini chenike.

³ AMPEU no pi, “iwu timiqo, niye nongu shou kiu shive kya? Niye kiu lono nongu zupuzuve kya? Ikhochilelo.

⁴ Ino Ijip lono nongu sasu ipeghike; aquaxe kuxu lono ino nongu hakholuke; nongu saphe peniaye ino Muse ngo Aron eno Miriam puwutsuke.

⁵ Iwu timiqo, Muab lo akukau Balak no nongu shou kiu shiniye kughu keno eno Beor nu Balam no kishi pa khochile keno tipau kumsuchile julo. Akasia pusho ngo Gilgal kuma dolo wuchekelo alalo kiu shivekeno tipau kumsuchile julo. Hipaqo ghili kumsuchile julo eno niye nongu xaluniye kiu shikeno tipau nonguno vethalu nani.”

AMPEU no Lunishi akeu

⁶ Kughou ino pa mlla nike ighini keno, niye AMPEU, kungugha Lhou lau kiu peighini kya? Niye pa lau akumllagho piti penike amshiti akeu peighini kesha?

⁷ Ino bheri qhethonhe kutolo sughi momu aghokizu kuqo toi oliv teli sughi aye AMPEU ye aloqi nani kesha? Ixineqo ghenguno niye inu anoghiu pesu pa mlla kepu kesha?

⁸ Moe, kiuno akivipu keno AMPEU no nivilo pivae. Pano ningu lau lunishi akeuye hike: kiuno achipi keno tipau shinikeu lhokta kikimiye piyenikeu, eno ni Lhou sasu aqhokigheu lono kuposhupe xu acheni keuke.

⁹ AMPEU sumsakeuye alokutsu achipiuke. Pano aphughi vilo picheni, “Nongu aphughilo kuhokumqo akeqo, hi inilo!

¹⁰ Alhoksamiqo kilo amikucho kumo lono panonguno sughikeu kinikulu akhanike. Panonguno ahu kichileu peitha cheni, tiye ino jumithi chekeuke.

¹¹ Khunoqono ahu-su eno ahu-tu kichileu peitha cheni keno, niye tipaqo kipimi pevetsuluni kesha?

¹² Nogholo kinimiqono kumlhomi saje chu khavae, eno nongu kumtsu kimkimike.

¹³ Nongu xine ghenguno nongu shipusave nikeu eno kutsave nikeu ino huthu auvae.

¹⁴ Nonguno chu nani ikemu aghaqimo nani, tsaquino nonguye muzuthi auve nani. Nonguno tinhemgha puwu nani ikemu nonguye tipaqo kike puamla nani; nonguno kiu kiu kike puaghinamu ino aghushi lono kutsavetsu nani.

¹⁵ Nonguno athi xusu nani ikemu tipau ghile humo nani. Nonguno oliv lothi lono teli tsughu nani ikemu khilemu tipau peithalupemo nani. Nonguno atsayiji mla nani ikemu khilemu tipau sho pemo nani.

¹⁶ Hipaqo shi nanike kughengu akukau Omri ngo pa nu akukau Ahab pamano ghushoghili lhoksa shikeu nonguno papeke. Nonguye pamano mijepe puatsukeu pekishe pechephi ikehu nonguye shipsa keulo ino sawo suve nani eno timi kumtsuno nongu jukunatha nani. Aqha kumtsulo timino aphi kumqhupu shi nongu peitha nani.”