MICAH 3 - BAIBEL (BSI)

Israil lo Sakiphemi Piputha

¹ Israil lo ayehkipemiqo, hi inijulo! Nonguye kuchou xakutha shi nikeulo kumsukuto akepuke,

² ikelauye nonguno akivi mithie eno alhoksa kimiye kutuke. Nonguno iwu timiqo akuxu aphi lono ayiko khovetsu eno panoqo saghilo ashi akeu sulhavetsuke.

³ Nonguno iwu timiqo tsakhavae. Nonguno panoqo yiko khovetsu, panoqo saghi kubovetsu eno ali lono lhochuniaye akeshi panoqo ghekucho pinyiveke.

⁴ Nonguno AMPEU vilo ighamuku ighani kepu ghuloki wocheni, ikemu pano nongu tsa khochilemo nani. Paye nongu kukhu kighini initsumo nani kughengu nonguno alhoksa kumla mla puanike.

⁵ Khunono tungkupmi ajume tsuno tipaqoye alokughuno shi anani kepi tungkupmino pipekeu huno iwu timiqo pishiqhivae, ikemu khunoqono ajume tsumo keno tipaqo vilo aghukishi pesu shikichi chenike. Tikithipu tungkupmiqo vilo AMPEU no piani,

⁶ “Tungkupmiqo, nongu tsala wokhaveni cheae; nongu ghenguno tsukinhe ilocheae. Nonguno iwu timiqo sabideke ghenguno nonguye tungkupmino kungunhetsu ithulu chekeu kuhave nani eno nonguye ashe-azu tsa kiumu piqhimla nani.”

⁷ Khunoqono ighinikeu ghili pichekeno panoqono shimlave keulo kujo muzave nani. Alhou no pano khochilemoke ghenguno panongu kumtsu kujove nani.

⁸ Ikemu ighenguye, AMPEU no pa ghungu eno akuka pesu ishepichhike eno kucho xakutha ithinikeu eno Israil lo akemi vilo panongu xineye kiu keno pikulupu kumto pesu itsu ke.

⁹ O Israil lo ayehkipemiqo, itsa inijulo, nongu kucho xakutha mithichekeqo eno achipiu pesu akumou kughulhovetsu chekeqo!

¹⁰ Nonguye heqhikeu eno amikucho kumo xakutha boqha shou Alhou phughi Jerusalem shipuku ani.

¹¹ Aphughilo ayehkipemiqono ayeh peithakeuye kulugho tsupeniyeke, achinemiqono ajume tsu anguno Ayezah lhekidepiyeke, tungkupmino pisa tsu anguno pano lau piyesukeu pitsu chenike eno panoqo kumtsu AMPEU ye panoqo gholo acheni kepi piacheni. “AMPEU ye nigholo anike kiumu shipusa kepu nilau ighimo nanike,” ipi panonguno picheni.

¹² Tishiaye nongu ghenguno Zion ye aluqa toi hokideve nani, Jerusalem ye ixapinyi pesu kumqove nani eno Achineki toghiye aghasu ilhove nani.