MICAH 1 - BAIBEL (BSI)

¹ Jotham ngo Ahaz eno Hezekiya no Juda lo kukami shiche ke ghulokilo Moreshet taun lo akemi Mika lau Alhou tsape hipau tsuke. Samaria ngo Jerusalem vehu hipaqo kumtsu AMPEU no Mika lau piyesu tsuke.

Samaria ngo Jerusalem Mloqa

² Ashiayehqo kumtsuno hipau inilo; ayeghilo akemi kumtsuno hipau inilo! AMPEU Alhou no nongu shou thopiu shi nani. Inilo! Pa kimthe Achine ki lono pano pianike.

³ Julo, AMPEU ye pano achekeu lono ipecheni, pano iqighi puzu naghuto kutsuqa shou nepuku nani.

⁴ Tileno amilo aghugha akeu toi naghutoqoye mulave nani; naghuto lono azu leqhi akeshi naghutoqoye abokhulo qoiqighive nani.

⁵ Hipaqo kumtsu shini cheni kughengu Israil lo akemi qono axine shike eno Alhou hebideke. Israil no hebide akeuye khuu nguku kepu kya? Tiye Samaria phughi ke! Juda lo asu-atu mlla akeuye khuuno kuqu ani kya? Jerusalem no ke!

⁶ Tighenguno AMPEU no piani, “Ino Samaria pesu aluzalo ixapinyi vekeu muqo lakhi shitsu nani, atsayibo shokusu a shivetsu nani. Aphughi tuleqhive keu bazu abokhuqalo lepiqi nani eno aphughi shikeu boqha nhamono ithulupe nani.

⁷ Tipaulo amekusho shi ajulho shikeu kumtsu kubopinyive tsu nani, tile achinekilo kutuqhalimi tsupe puakeqo thwokha kumtsu amino pitileve nani, tipaulo ajulho shikeu kumtsu hepho kumqove nani. Samaria no lhokighishe keu chine lono hipaqo kumtsu suwo kutsu puanike, itehiye li ghumiqono khilelano mlla nike ghenguno tipaqo xapuwuve nani.”

⁸ Mika no pi, “Hipau ghenguno niye mloqani eno amlo muku nanike. Imlo kusa piye nike ghenguno niye apukhu kumsa eno aphi kumsa iqhoiqini. Ino sherno ighakeshi eno ostrikno mlo qakeu toi shini.

⁹ Samaria ghuzakuye vilumoa eno Juda ghi tipaphishi imeni cheni; iwu timi achekeu-alo, kutsale keuno Jerusalem khagho tovae.”

Aghumino Jerusalem Kupunu

¹⁰ Nino tomlavekeu pesu Gat lo nighumi vilo pikevilo; nonguno qa akeu panoqo pelo ithulupe kevilo. Beth-Leafra lo akemino nonguno avekusa shi akeuhu ayeghi mukhulo ihi ilu piyeke!

¹¹ Nongu Safir lo akemiqo; aphi kumsa eno kujo qhiyi hale puwuve keulo wulo. Khunoqono Zanan lo acheni keno aphughi lono khalau ipeghi nike musa akhanike. Kughou Bethezel lo akemiqono mlo qakeu nonguno chilu nikeno tilehi sushokulupu kuhakepi nonguno ithi nani.

¹² Marot lo kughuna akemiqono anhemgha ghenguno kutakihi kheakhani, kughengu AMPEU no Jerusalem kupunulo kutsakungo keu sughike.

¹³ Nongu Lakis lo achekemiqo, khurkulu lo tshupukulo. Israil lo axine shikeu nonguno tipau ha-ghi Jerusalem pelo axine shiu vepeke.

¹⁴ Itehiye Juda lo akemiqo, Moreshet-Gat lau kukhovekeu gho chhelo. Israil lo kukamiqoye Akzib taun launo akukuphu ithumlake.

¹⁵ Maresha lo akemiqo, noghumino taun khasupe leluveni aye akeu lau AMPEU no nongu kughape panoqo ulo suvetsuni cheni. Israil lo ajekipishi sakipheu shi achekeuye Adulam tukilo itshuluve nani.

¹⁶ Juda lo akemiqo, nonguno kimiyechekeu tianuliqo ghenguno mlo qakeu michishi nongu kutsusa miyevelo. Aluqu toi nongu kutsusa miyevelo kughengu nongu tianuliye haphe sawuve nani.