MATTHEW 5 - BAIBEL (BSI)

Naghuto lono Kutsukeu

¹ Timi aqokitikhi ithulu puzu Jisu no ato lakhilo iqho, eno pano tipau shou iqa. Pa papechekemino pa suhope kumqo,

² tileno pano panoqo ishi kutsu:

Kuchou Lokivipu

³ “Amlolo kumlhomi shi aniepi ithikemi kumghae, kughengu Kungugha yehkipeye panoqo wuke!

⁴ ‘Mlo qa chekemi kumghae, kughengu Alhou no panoqo lokughuno tsu nanie!

⁵ “Akumtsha-akughuvumi kumghae, kughengu Alhou no tsuniepi puakeu mheghi panoqono ithulu nani!

⁶ ‘Achipiu-mikucho shi nishikeuno apulou akiqheu shi chekemi kumghae, kughengu Alhou no panoqo lopiqitsu nani!

⁷ “Kutami gholo amlo saqhiyikeu kuqhakemi kumghae, kughengu Alhou no panongu shou amlosaqhiyi tsu nani!

⁸ ‘Akukumsu mithemitheikemi kumghae, kughengu panonguye Alhou ithulu nani!

⁹ “Timi dolo alashitsukemi kumghae, kughengu panonguye Alhou nuliqo ipi ku nani!

¹⁰ ‘Achipiu-mikucho shikeu ghenguno kutamino ghimeqhikemi kumghae, kughengu Kungugha yehkipeye panoqo wuke!

¹¹ “Ighenguno timino nongu thaigha eno nongu shikimighi eno akimiki lono alhoksa jeli kumtsu pesu nongu shou pini shini keno, nonguye akumgha pue.

¹² Alokiqipushi alovilo, kughengu kungughalo osaxu kije kutope ani. Nongu zuu tungkupumi achekeqo ghi timiqono tihutoi shikimighi cheke.”

Amti eno Akuvu

¹³ “Nonguye ayeghilomi ghenguno amti toike. Amti no qhumzayi keu hauve aye, tipau qhumzayi kithe kulupu kuhave cheni. Tiye avehupu kiumu kuhaveno peleve puzu timino apukhuno nedaqodave cheni.

¹⁴ “Nonguye ayeghiqha ghenguno akuvu toike. Atoghilo aphughi akeuye kusuve mlae.

¹⁵ Khunomu akulu kuqu pesu alino qhove chemoe, ikemu akibepulo be cheni, tishianguno akilo akemi kumtsu lau akuvu tsu cheni.

¹⁶ Titoi timi zulo nongu kuvu yevuqai masae, tishianguno panonguno nongu kumla kivi ithulu no nongu paPuh kungughalo akeu akishe tsu nani.

Ayezah vehu Kutsukeu

¹⁷ “Niye Muse no sughikeu yezah eno tungkupmino kutsukeu shipuhave tsu nike ighi kepi kumsu kevilo. Niye tipaqo shipuhave tsu nike kumo puzu tipaqo shikupu tsu nike ighi.

¹⁸ Kughengu kuchouno ino nongu vilo pini, atsutsu eno ayeghi haumoke kutolo Ayezah lo chosupuakeu momu hetha puakeu thwokha kumtsu shi kishekha moke kutolo lakhimu hauvemo nani.

¹⁹ Tighenguno khuuno ayezah gholo aghulou pimu kughuchoveni eno kutami ghi tipaphi shipe nike kutsuni keno kungugha yehkipelo aghulou shi nani. Ikemu khunono Ayezahqo pelu eno tipaqo pesu kutsuni keno kungugha yehkipelo akijeu shi nani.

²⁰ Ino kuchouno nongu vilo pini, nonguno amikucho shikeu huno Ayezah kutsuchekemi ngo Farisimi no amikucho shichekeu shou alau shilumo aye nonguye kungugha yehkipelo ilomla nani.”

Amloidekeu vehu Pitsukeu

²¹ “Khaghiye timiqo vilo ishi pikeu nonguno chiluve aghi nani, ‘Nonguye timi ghiqhi kevilo, khunono timi ghiqhini keno kughakuthau zulo sawu nani.’

²² Ikemu ino nongu vilo pinikeuye khunono pa thikuzuu shou amlo ideni keno kughakuthau zulo sawukepu shi nani; khunono pa thikuzuu vilo thaighakeu tsa pini keno Alhou zulo sawukeu shi nani, eno khunono pa thikuzuu vilo ‘No aghuzuu’ ipini keno ami pesu aghimetsuni keu-alo. wunikeu msakepu ani.

²³ Ike nono okumllagho pesu agho pitikeu-a lo Alhou mlla niye kuto ake lono othikuzumi lakhino oshou amlo kishi kumo akeu nono kumsulu aye,

²⁴ okumllaghoye aghokipti-a zulo qhipuaghi puzu wono othikuzuu sasu kulashive paghilo, eno tithiuno ighi puzu okumllagho pesu Alhou mllalo.

²⁵ “Timi lakhino oshou atsa kughakepushi aghi puzu osasu kughakutha- alo wuaye, kughakutha-a tomphi lono osasu atsakugha niye akeu sasu kula shiluvelo, tikumo aye osasu atsakugha niye akeu huno kughakuthau lau okughape tsuve nani, eno kughakuthauno okughape yekhemi tsuve no noye akughukilo suve nani.

²⁶ Kuchouno ino nongu vilo pini, oshou asuchukeu pisa akuhu kutolo tsukhamphi loye noye tile auve nani.”

Asalha vehu Kutsukeu

²⁷ “Hitoi pipuakeu nonguno chiluve aghi nani, ‘Noye salha kevilo,’

²⁸ Ikemu ino nongu vilo pinikeuye timi khuno totimi lakhi jupesu li jumineni keno pa mlo lono li sasu salhave keu kipimi shivae.

²⁹ Tsala onhethi ajeu akeuno omsu sasu axinelo ilove kepushi aghi aye chixejope pevelo. Kughengu ophi kuchopu aghime tsukeu alo vesuve kepuye ophi a-ulo hami kupumove keumu pavike.

³⁰ O-u ajeuno omsu sasu axinelo ilove kepushi aghi aye ti michepe pevelo. Ophi kuchopu aghime tsukeu-alo vesuvepeni kepuye hami kupumove keu mu pavike.”

Akughuxa vehu Kutsu

³¹ “Highi ishi pipuani, ‘Timi khuno pa nipu sasu ixa nikeno paye akughuxa shepe kaku lakhi li tsulo.’

³² Ikemu ino nongu vilo pinikeuye khuuno pa nipu sasu ixave nikeno tsala lino kutami sasu kuquveaghi keu ghengu likhino kumo aye paye li pesu salhavepe anie, eno khuuno totimi tipau luni keno pa ghi salha anie.”

Ashoqhi vehu Kutsu

³³ “Nonguno itaghi highi chiluve aghi nani, khaghilo timiqo vilo ishi pipuani, ‘Nonguye akimki lono tushoqhi kevilo, ikemu nonguno Ampeu zulono kiu shinipi tushoqhi puani keno tipau shilo.’

³⁴ Ikemu ino nongu vilo pini, nonguno kiu kiumu piqhikelo ashoqhi shi kevilo; kungugha pesu tushoqhi kevilo kughengu tiye Alhou lakhu-ake,

³⁵ momu ayeghi pesu shi kevilo, kughengu tiye Akukau akijeu phughike.

³⁶ Okutsumu pesu tushoqhi kevilo, kughengu noye asa lakhimu pesu metsughoyi momu tsubuyi shivetsu mlae.

³⁷ Nono pikeulo vejoi ‘Iye’ momu ‘Moe’ ipilo; hinguno alau nono pikeu shiaye tiye Alhoksau launo ighikeu.

Amukhukulu vehu Kutsu

³⁸ “Ishi pipuakeu nonguno chiluve aghi nani, ‘Anhethi lakhi theli anhethi lakhi, ahu lakhi theli ahu lakhi,’

³⁹ Ikemu itehiye ino nongu vilo pini, alhoksa shikemi mujochile kevilo. Timi khualano ogimuchu ajeu ghatsu aye ogimuchu piyiu ghi pa lau kughopuwo tsulo.

⁴⁰ Khualano ophikuzu luvetsu niye kughakutha-alo osasu wuaye pa pelo owu hekuuphi ghi luvepelo.

⁴¹ Ghushimi noghakhu kheakemi lakhino ovilo tsukhomo pa kho kilomiter lakhi xapuwupe aye kilomiter kini kutolomu puwutsulo.

⁴² Timi lakhino ovilo qhuiniju khu ighi aye pa tsulo; eno khualano olau tusutuna shi ighi aye pa puna tsulo.

Aghumi Kimiyelo

⁴³ “Ishi pipuakeu nonguno chiluve aghi nani, ‘Ow shompami kimiyelo eno aghumi mithilo.’

⁴⁴ Ikemu ino nongu vilo pini, noghumi kimiyelo eno nongu peithapusa chekemi ghenguno inikhutsulo,

⁴⁵ tishianguno nonguye nongu paPuh kungughalo akeu nuliqo shilu nani. Kughengu pano pawu tsukinhe pelo alhoksami ngo akivimi shou aphiphi shi tsunipe cheni.

⁴⁶ Nongu kimiyekemi likhi nonguno kimiye aye, kushiye Alhou pelo asaxu otsupe nike huqhe ani kya? Asuqha kuqhami thotsu tipaphi shichemo kesha?

⁴⁷ Tsala nongu thikuzumi likhi sasu petha shiaye, kutami nguno nongu pachi kiu shipuani kya? Ashiayeh kutami ghi tipaphi shichemo kesha?

⁴⁸ Nongu paPuh kungughalo akeuye thwokhalo viwotolue, tighenguno nongu ghi viwotolu masae.”