MATTHEW 28 - BAIBEL (BSI)

Xuchilethuve

¹ Sabat tsala thiu tughakhani inaqhe vuqai ipeche kelo, Magdala noghami Maria ngo kutami Maria ishiye akumoki juniye wu.

² Tile zuleno ayeghi kughutha kije lakhi ighi, tiye Ampeuw kungumi lakhi kungugha lono iqighi puzu atulupha hu tukuluveno tipau shou iqa-a.

³ Pa jukogheye tsutsukulomusu toi eno pa phiminiye murasu toi metsughoyike.

⁴ Tilehi akhemiqoye pa musake launo khokhoshive eno akithi kumlhoshive.

⁵ Tile kungumi huno totimiqo vilo pi, “Nonguye musakepu kuhae. Nonguye kros lo yedavekeu Jisu juniye chenikepi ino ithi ani.

⁶ Pa ye hile kuhae, pano pivekeu toi pa ye xuithuvae. Hila ighilo eno khile pa qhipua keno tipa-a julo.

⁷ Itehiye mtazu wulo eno pa khopemi vilo pilo: ‘Pa ye akithi lono xuthuvae eno pa ye nongu zuuno Galil lo wuni cheni ike nonguno tilauno pa ithulu nani!’ Ino nongu vilo pivekeu kumsuchile lulo.”

⁸ Ikehu panonguye musa pulaghi alokivino chhitoive puzu akumoki lono mtazu wuve eno Jisu khopemi vilo pinike panonguno posu wuve.

⁹ Paikhavino Jisu no ala lono panoqo sasu kushono ishipi, “Alokughuno nongu gholo alo!” Tile panonguno pa kupunu ighi eno pa pukhu tsuqupe puzu itsaiqino pa mlla.

¹⁰ Jisu no panoqo vilo pi, “Musakevilo! Wulo eno ithikuzumi vilo Galil lo wulo pilo eno tilano panonguno isasu kusholu nani.”

Akhemiqono Pikeu-tsa

¹¹ Totimi qono wuchephi lono akumoki khemi ghushimi khamino aphughilo ilo puzu achinetomi vilo kishivekeno kishekulu pive aghi.

¹² Achinetomino Judami kichimiqo sasu kusho puzu panongu kumquveno pisa kutomo pesu ghushimiqo tsuno

¹³ ishi pive: “Nonguye, nonguno zuaphi lono pa khopemino putho lono ighi puzu pa sukumo puka suwuveke, ipi pivelo.

¹⁴ Tsala Ahng no hipau chilu aye, ninguno pa vilo pikidekudayive nani eno nongu pelo kupunapemo nani.”

¹⁵ Akumoki khemi ghushimi qono pisa hu luve eno panongu vilo pivekeu toi shie. Ishi kutolo Judami gholo hipatsa pesu pekishe acheni.

Jisu no Akhopemi lau Ipeghi

¹⁶ Ike akhopemi chighi qhaqhi huye Galil lo khipau naghutolo Jisu no panoqo vilo wulo pi keno tipaulo wuve.

¹⁷ Kughou panonguno pa ithulu keno itsaiqi puzu pa mlla, ikemu panoqo gholo khamiye amlo lipiveno ae.

¹⁸ Jisu no kupunu ighi puzu panoqo vilo ishipi, “Kungughalo ngo ayeghilo akuka kumtsu itsuvae,

¹⁹ Ike aqha kumtsulo ashiayeh kumtsu lau wulo eno ino kutsukeu lukemi shilupelo; Apuh jeku, Anu jeku eno Aghungu Kimthe jeku ishieno panoqo baptiz shitsulo;

²⁰ eno ino nongu lau ahza tsuvekeu kumtsu panoqo pelo pelupe nike kutsu tsulo. Eno julo! ayeghi kishekhake kutolo niye pulhapuju nongu sasu ache nani.”