MATTHEW 24 - BAIBEL (BSI)

Achineki Kutsavenikeu

¹ Jisu no achineki lono ipeghi no wu chekelo pa khopemino pa lau ighino achineki shipuakeqo kichepiye.

² Panongu vilo pano ishi pitsu, “Nonguye hipaqo kumtsu ithulu ani kema? Kuchouno ino nongu vilo pini, hile atu lakhimu lakhi shou bepe ngo move nani, hipaqo kumtsu tule qhive nani.”

Shiluksa eno Shikighime keu

³ Jisu no Oliv toghilo iqa akelo, akhopemino lomo shighi pa lau ighi eno ishi iniju, “Kughono hi shini cheni keno nivilo pitsulo eno nono ighinikeu ngo hipa yeghi aghuloki shekha shini kelo kiu michipu shi nani kya?”

⁴ Jisu no ishi panoqo khochile, “Kutokupuyi alo eno khuu pelomu nongu sakughuzu sawuvepe kevilo.

⁵ Kughengu timi kutomono ije lono ishi piighi nani, ‘Niye Mesiya ke,’ eno tipaqono timi kutomo sakughuzu sawuve nani.

⁶ Nongu kupunulo aghushi akeu chilu nani, aghachelo aghushi anie pikeu sutsa nongu vilo pi nani, ikemu nonguye thughuyive kepu kumoe. Hikithipu ighimasae, ikemu tiye ashekha tsala ighiveake kumoe.

⁷ Kughengu ashiayeh lakhino ashiayeh lakhi sasu aghushi nani, ayehkipeqha lakhino ayehkipeqha lakhi le nani. Puqumiyekeu ngo ayeghi ithakeuno aqha kumtsulo anani.

⁸ Hipaqo kumtsu apunu kusu huthu akeu toike.

⁹ “Tileno timino nongu shikighime nike kughaluve nani eno nongu pithive nani. Nonguye ilaumi ke ghenguno timi kumtsuno nongu ju axesu nani.

¹⁰ Tipa ghulokilo timi kutomono pano kupulu pheve nani, lakhino lakhi pesu thechu shi nani, eno lakhino lakhi ju axesu nani.

¹¹ Kichile tungkupmi kutomo ipeghi puzu timi kutomo sakughuzu sawuve nani.

¹² Ayezah phimokeuno ihulove kehu timi kutomono kimiyekeulo mukomghayive nani.

¹³ Ikemu timi khunono ashekha kutolo tsuqupe aghini keno tipano xaluve nani.

¹⁴ Kungugha yehkipe sutsa kiviu hipau pesu ayeghiqha kumtsulo kutsuwo nani eno tino ashiayeh kumtsu lau thopi lakhi shi nani eno tithiuno ashekha tsala ighi nani.

Akuighupu Kutsakungo

¹⁵ “Akuighupu kutsakungo keu khikhi Danel tungkupuno pipuani keno tipauno akimthe-alo puthugho aghikeu nonguno ithulu aye, (phi akeuno hipau kiqiye kiu keno ithi kututa shilulo),

¹⁶ khunoqono Judia lo ani keno naghutolo povelo.

¹⁷ Aki kutsuqalo akemino pa ki alou anhemgha lunike aqhou iqi kepu kumoe.

¹⁸ Alulo huakemino pa kuuphi lunike ideighi kepu kumoe.

¹⁹ Atsala tipaqo loye mishi chekemi ngo anga pinichekemi ghenguno ahakusapue!

²⁰ Susu tsala momu Sabat tsala lono koha-pokepu shipemo nike Alhou vilo khuini alo!

²¹ Kughengu ayeghiqha huthuke lono ishi kutolo hitoi shimphikeu eno khilemu hitoikeu shinichemo keu ghime kitikhi tileno shini chenie.

²² Tipa tsalaqo Alhou no kihi kughukhovetsumo keaye timi khumu puxumoni cheke. Ikemu kisheluvekemiqo ghenguno Alhou no tipaqo tsala kihi kughukhove tsuni cheni.

²³ “Tilehi khualano nongu vilo, ‘Julo, Mesiya ye hile anie!’ momu ‘Paye hule anie!’ ipi aye, tipau pulu kevilo.

²⁴ Kughengu kichile Mesiya eno kichile tungkupumi ipeghi nani eno panonguno amchipu ngo akumzapu kumla shipe piye puzu, shikulupu shi aye kisheluvekemi ghi sakughuzu sawuve nikeu shi nani.

²⁵ Julo! ino asheazu shi nongu vilo hi pive ani.

²⁶ Ikehu, khualano nongu vilo, ‘Julo paye timi kughunamokeu-alo anie!’ ipi namu, tilau wu kevilo; momu panonguno, ‘Paye hilau itshu anie! ipi namu, tipau pulu kevilo.

²⁷ Kughengu tsutsu kukulono kipelau ipeghi kelo kulolau kutolo yepuvuke toi Timi Nu ghi tihutoi ighi nani.

²⁸ Khile no akithi kumo ani keno tilehi aluquqono kuho kumqo nani.

Timi Nu ighini keu

²⁹ “Atsala tipaqolo aghime kitikhi shive kemtsa tsukinheno zumoyive nani, aqhino vuqayi move nani, ayepuqono atsutsu lono ikiqive nani eno atsutsulo akuka jeli akeqo sukiniqhi nani.

³⁰ Tileno Timi Nu michipu atsutsulo ipeghi nani, ayeghilo ashiayeh kumtsu mlo-qah nani, Timi Nu no khungkusu lo akuka eno akimthe jukuvu lono chekeu timiqono ithulu nani.

³¹ Afuko ghugha kije igha nani, pano pawu kungumi ayeghi cheku bidi kutolo puwu nani eno ayeghi shekha halau lono halau kutolo kisheluvekemi panonguno hekutsu nani.

Khughubo launo Kichepiye

³² “Khughubo pe kimighipiye keu lakhi nonguno ithi lulo. Kughono tipa loka apishe ipeghi puzu ani mini ipeghive nikeno mutsu tsala shiwo chea kepi nonguno ithi cheni.

³³ Tihutoi, nonguno hipaqo thwokha kumtsu ithulu kelo aghulokiye kupunuvae eno ahukikha tove akepi nonguno ithilo.

³⁴ Kuchouno ino nongu vilo pini, itodolo xuakemi kumtsu thikhamphi lono hipaqo kumtsu shi nani.

³⁵ Atsutsu ngo ayeghiye hauve nani, ikemu itsaye khilemu hauvemo nani.

Khunomu Ado Mthae

³⁶ “Ikemu tipa tsala eno tipa tuqhudoye khunomu mthae, kungumi thotsu mthae, anu ghi mthae, ikemu Apuh likhino ithi anie.

³⁷ Noha tsalalo kiu shikeno Timi Nu ighi nikelo ghi tihutoi shi nani.

³⁸ Azuno yimikeu tsala ighimphi lono-wo Noha no ashukakilo iloke tsala kutolo timiqoye chu shoa eno kulakupu shi ake.

³⁹ Azuno yimi ighike kutolo panonguno kumsu chilelumono ake lono kumtsu yipesu wuve. Timi Nu ighi keloghi tihutoi shi nani.

⁴⁰ Tilehi timi kini alulo hu akelo lakhi sawuveno lakhiuye qhive nani.

⁴¹ Totimi kini a-o shesu akelo lakhi sawuveno lakhiuye qhive nani.

⁴² Tighenguno kutope khealo, kughengu kiu tsala lono nongu Mpeu ighi nani keno nonguye mtha.

⁴³ Ikemu hi ithi alo aki mipeuno putholo kiu ghuloki lono kupkami ighini keno ithi ake napi aye, paye kheani cheke eno kupkami pelo pa ki hepho iloghi pemo nicheke.

⁴⁴ Hi ghenguno nongu ghi kutope khe-amasa, kughengu Timi Nu ghi nonguno huqhe moke ghuloki lono ighini cheni.

Pukhubekulu momu Pukhubekumla Qeu

⁴⁵ “Tishiaye, khuno pukhubekulu eno alokutsu qeu kya? Paye pa mipeuno pa pelo aqemi kutamiqo peitha peniye qhike, tipaqo ado achipi lono kuchukusho tsupeniyeke.

⁴⁶ Aqeuno tishi mla ake lono pa mipeu akilo ighi puzu ithulu aye aqeu tipauye alokivipue!

⁴⁷ Kuchouno ino nongu vilo pini, pa mipeuno aqeu tipau pelo akuakini kumtsu pa lau kulhuqhive tsu nani.

⁴⁸ Ikemu aqeu lhokusa huno pa likhi pa vilo, ‘Imipeuye munu ighini cheni’ ipi puzu

⁴⁹ pa kusami aqemi ghaqhini, eno chumzu shomzukemi sasu kuchukusho shi aye,

⁵⁰ pano huqhejumoke tsala lakhi lono eno pano mthakeu tuqhudo lono, amipeu ighive nani.

⁵¹ Ampiu huno pa kughape ghaqhitha piniyive nani, eno kuhakughamiqo gholo qhive nani, tilehi pa ye igha qah ahu-tsughu nani.”