MATTHEW 20 - BAIBEL (BSI)

Atsayilu Kumlami

¹ “Kughengu Kungugha yehkipeye aki-alu pighimi lakhino inaqhe itheno wupuzu pa tsayilulo hupenike ghenguno aqekiqemi ghawukeu hutoike.

^2-3 Aqekiqemi sasu atsala lakhilo ajume tsunikeu shi kughave puzu panoqoye pa tsayilulo puhuve. Tulhu ghulokilo pano alhikishi-alo itaghi wuju kelauye timi khami kiumu shimono puthugho aghi.

⁴ Ikelo panoqo vilo ishipi, ‘Nongu ghi atsayilulo hulo, eno nongu jume kiuno achipiu keno ino tsunike.’

⁵ Ikehu panonguno huve. Itaghi pano puchou lhuba ghulokilo wu puzu kutamiqo sasu ghi puzuu tholono kughatha.

⁶ Phitsu ghulokilo pano alhikishi-alo wuju kelauye itaghi timi khami tile puthugho aghikeu ithulu. Panoqo vilo pano ishi iniju, ‘Nonguye kushiye ajupuka kiumu shimono hile puthugho ani kya?’

⁷ Panoqono pa vilo ishi khochile, ‘Khunomu ajume ningu piqe kepushi ghayighimoke.’ ‘Tishemaye, nongu ghi atsayilulo huno mlalo’ ipi pano panoqo vilo pive.

⁸ “Kughou tsuzu keno, atsayilu ampiu huno pa kini peithakutsuu vilo ishipi, ‘Aqekiqemiqo kulo, eno ashekhashi hukemi launo huthususu atughushi hukemiqo kutolo panoqo jume tsuwolo.’

⁹ Phitsu shivekethiuno timi hukemiqono ighikelauye milakhi khino atsalalo jume ithulu.

¹⁰ Ikelo kughou atughushi hukemiqono ighi keno, panonguye alau ithulu nani kepi kumsuae, ikemu panoqo ghi lakhikhino aphiphi shi ithulue.

¹¹ Ti ikhiluve puzu panoqoye alu mipeu shou muchho ghi

¹² ishipi, ‘Timi hi atikhashi hughi kemiqoye asuchedo lakhi likhi mla, eno ninguye atsala kupuju aghimeshi eno tsukinheno phuqhi mla akeghi nono panongu tsuke qhemi ningu tsue!’

¹³ Ikemu alu mipeu no panoqo gholo lakhi vilo ishipi, ‘Qele akusau, niye kiumu opishi puamoe! Noye atsala kupuju jume isasu kughatha kekumo kesha?

¹⁴ Owu kiukeno ti luveno wuvelo. Timi ashekhashi hukeu ghi otsuke qhemi niye pa tsunikeu shi anie.

¹⁵ Ino pisa akeu pesu kiu shinishi keno tipau shipemoni kesha? Ikeo, ino alokeu shike ghenguno onheshuve kya?’ ”

¹⁶ Jisu no ishi kishekha ghi pive, “Ikehu atikhamino atughu shive nani eno atughumino atikha shive nani.” Kughengu kutomo kulue ikemu aghuloshi kishelue.

Ghuthu akuthuu Jisu no Pano thinikeu ghili pi

¹⁷ Jisu no Jerusalem lo wuniye chekelo, pa khopemi chighi kini kutashi sawu puzu, alalo checheke lono pano panoqo vilo ishipi,

¹⁸ “Julo, ninguye Jerusalem lo iqho cheni tilano ni Timi Nu ye achinetomi ngo Ayezah kukutsumiqo lau kughaphepe tsuveni cheni, eno pa pithive penike panonguno kughathabeve nani,

¹⁹ eno Ashiayeh kutami lau sawo tsuve nani eno tipaqono pa thaqhi, pa heqhi puzu kros lo pa yedave nani, eno atsala akuthuniye pa xuputhuve nani.”

Aza lakhino Qhuyiniju

²⁰ Tileno Zebedi nuliqo pazano li nuli sasu Jisu lau ighi eno lino pa vilo avehu lakhi qhuyiniju niye pa zulo qhoqhunhepe ngo.

²¹ Jisu no li vilo ishi iniju, “Noye kiu lunishi ani kya?” Lino ishi khochile, “Oyehkipe ighikelo inu hi pama pelo lakhino o-u ajeu kudau eno lakhino o-u piyiu kudau iqape kepushi piqhive tsulo!”

²² Ikemu Jisu no ishi khochile, “Nonguye nonguno kiu khu ani keno mtha aphie. Ino shoniye akeu jukhu nonguye sho kulupu kesha?” Pamano ishi pa khochile, “Nikujoye sho lunanie.”

²³ Pano pama vilo ishipi, “Nokujoye mutsuqheyino ijukhu sholu nani, ikemu i-u ajeu eno i-u piyiu iqanikeuye ighoshive mlae, tiye iPuh no khunoqo ghenguno kutope puani keno tipaqo ghengunoke.”

²⁴ Kughou akhopemi chighino ti chilu keno, panonguye pama athiazu shou axuideve.

²⁵ Ikehu Jisu no panongu kumtsu ku-kumqo puzu ishipi, “Nonguno ithi ani, ike Ashiayeh kutamiye ayehkipemi no timiqo shou Ampeu shi acheni, eno panongu wu kijemino panoqo shou ka cheni.

²⁶ Nongu gholoye hikitipu shimoni. Tsala nongu gholo milakhino kije shinishi aye paye kutami kumtsu qeu shimasa.

²⁷ Nongu gholo milakhino atughumi shinishi aye, paye aqu-axeu shivemasae.

²⁸ Timi Nu thotsu kutami pelono pa qepeniye ighike kumoe, ikemu kutami qeniye ighike eno timi kutomo xaphelu nike pa kuxu tsuniye ighie.”

Anhethi Kighichemi kini Shipivi

²⁹ Panonguno Jerikho phu qhiveno wuchekelo timi kumzapuno Jisu papesu che.

³⁰ Anhethi kighichekemi mikini ala phelo iqa ake, Jisu ye tipala zususu wu cheni ipi chilu puzu pamano ishi ighamuku, “David Nu! nikimiyekutu tsulo, Akijeu!”

³¹ Timiqono pama vilo iquneyivelopi pama lompi, ikemu pamano alaushi ighamuku ishi igha, “David Nu, Akijeu, ni kimiyekutu tsulo!”

³² Jisu no ngove eno pama ku-puzu ishi iniju, “Ipelo nokujo ghenguno kiu shitsu penishi ani kya?”

³³ Pamano ishi khochile, “Akijeu nikujoye opelo ninhethi xukhovetsu penishi ani!””

³⁴ Jisu no pama kimiyeqhiyive eno pama nhethi chojutsu, ikelauye paikhavino pama nhethi tsukholuve, eno pa papewuve.