MATTHEW 18 - BAIBEL (BSI)

Khuno Kumtsu nguno Akijeu

¹ Tipa tuqhudolo akhopemi qono Jisu lau ighi puzu ishi iniju, “Kungugha yehkipe qholoye khuno akijeu kya?”

² Jisu no itimi lakhi kusawo panoqo mtalo qhino

³ pano ishi pi: “Kuchouno ino nongu vilo pini, nonguno akuxu kililu puzu itimi hutoi shilumoke thaqhuloye nonguye Kungugha yehkipe qholo ilomla nani.

⁴ Timi khuno pa likhi pa pesu aqhokigheu shipuzu itimi hipau toi shiluve nikeno. Kungugha yehkipelo timi tipauno kumtsu nguno akijeuke.

⁵ Timi khunono ije lono itimi hitoi kemi ikhiluni keno ni ikhilu anike.”

Axine Shivepeniye Pejukeu

⁶ “Timi khuuno hi ipulu akemi kititiqo lakhi pelomu ilauno kupuxakuluve nikeno, pa ghenguye athi kutsughu tuqu aku-olo tshuqhipu puzu azughi kutho lono putsuqhive pekeu pavie.

⁷ Timi pelo axinelo ghukesawuve pekepu akeu ghenguno ayeghiqhalo ahakusapue! Kughengu ghukesawuve kepu ighimasakeu ani, ikemu timi khuuno vechewo ghukesawuve kepu ighi nikeno timi tipanoye ahakusapu ani!

⁸ “O-u momu opukhuno opelo axinelo ghukesawupe aghi aye, ti michevelo eno pevelo. Oghenguno apukhu momu a-u xapusu alhomilo vesuvepeni kepuye apukhu lakhi momu a-u lakhi kuhano akuxupulo ilokeu pavie.

⁹ Onhethino opelo axinelo ghukesawupe aghi aye, tilejo pesu pevelo. Oghenguno anhethi kini kujo xapusu amino aghimetsukeu a-lo vesuve peni kepuye anhethi lakhi likhi pusu akuxupulo ilokeu pavie.

Bheri puhavekeu

¹⁰ “Nonguye muthamini hipaqo kititi gholo lakhimu jukunatha kepu kumoe, kughengu ino nongu vilo pini, kungughalo panongu wu kungumiye iPuh kungughalo akeu zulo pulhapuju achenike.

¹¹ [Kughengu ni Timi Nuye puhavekeqo xalu nike ighie.] “

¹² Nonguye kiu kumsupu ani kya? Timi lakhino bheri 100 ani kelo tipaqo gholo lakhi kauve aghi aye, paye lhotoku toku hu atolo achu kumza puaghi puzu lakhi kauvekeu hu phuwumoni kesha?

¹³ Pano ti phulu aye, kuchouno ino nongu vilo pini, paye bheri lhotoku toku puhamono akeqo nguno alau hi bheri lakhi shou alokivi shikeu ananie.

¹⁴ Tihutoi kungughalo akeu nongu paPuh ye hipaqo kititi gholo lakhimu puhave penishimoe.

Athikuzumi Axine Shiaghiaye

¹⁵ “Othikuzuuno oshou axine shiaye, wupuzu pa vilo pa kipimi pilo. Ike tiye okujo dolono lomo shi kuptsaluvelo. Pano otsa initsu aye, noye othikuzuu zuluvae.

¹⁶ Ikemu pano otsa initsumo aye, ogholo timi lakhia kinia, sawulo, tishi anguno mikini momu mikuthuno thopi shino ashepe shikeu vechewo atsakughapu kumtsu xatha kepue.

¹⁷ Pano tipaqo tsa initsumo aye akukuhou vilo hi pilo. Pano akukuhou ghi phimove aye, paye ayehkumthami momu asuqha kuqhami lakhi toi pa peithalo.”

Tsughakeu eno Kuqhokeu

¹⁸ “Kuchouno ino nongu vilo pini, nonguno ayeghilo kiu tsughani keno kungughalo ghi tsugha nani eno nonguno ayeghilo kiu kuqhoni keno kungughalo ghi kuqhove nani.

¹⁹ Tinguno alau ino nongu vilo hi pini, kugho kughomu ayeghilo nonguno avehu kiuala ghenguno inikhu akeulo nongu gholo mikini nomu kumtsa kuqhalu aye, nonguye iPuh kungughalo akeu launo ti ithulu nani.

²⁰ Kughengu ije lono khilehi mikini momu mikuthu kumqoni keno niye tilehi panoqo gholo anie.”

Kutami Kipimi Pevetsumlakeu

²¹ Tile Pitor no Jisu lau ighi puzu ishi iniju, “Ampeu, ithikuzumi lakhiye ishou ghuthu khije axine shilu nani, eno niye ghuthu khije pa kipimi pevetsu kepu kya? Ghuthu tsuni keo?”

²² Jisu no pa vilo ishi khochile, “Niye ovilo ghuthu tsuni kutolo ipi moe, ikemu, lhotsuni no ghuthu tsuni kutolo pike thono.”

²³ Tighenguno Kungugha yehkipeye kukami lakhino pa qemiqono hekutsukiyi keu kihikulayiju keu hutoike.

²⁴ Kughou pano kihikulayithu keno, aqeu lakhiye ghuka 10,000 shou papi puake timi tipauno akusau lau saghi.

²⁵ Timi tipauno papi lomla kehu, pano api puakeu mipeuno pa vilo ishi ahza tsu, Api love kepushi no ngo onipu, onuli eno nono aghikeu kumtsu jevelo.

²⁶ Ikelo aqeu huno pa mipeu zulo qhoqhunhepe puzu pa qhuiniju ghi ishi pi, “Ampeu, nighi olo khave nanike, kimiyeno kutu-utsu aghilo!”

²⁷ Ampeu no tipau aqeu hu kimiyeqhiyive puzu papi qhi khavetsuno pa phepuwuve.

²⁸ “Ikemu aqeu tipauye wuve puzu pa kusami aqemi lakhino ghuka 500 a pa tsukepushi akeu sasu kusholukelo tipau ku-o lono tsuquqhi puzu ishipi, ‘Nono tsukepushi akeu tsuvelo.’

²⁹ Pa kusami aqeu huno itsaqino pa qhuiniju pi, ‘Ino olochileve nanike ilau kutu-utsu aghilo!’

³⁰ Ikemu pano tishimla piveno wupuzu pa kusami aqeu hu api lovemoke kutolo akughukilo khathave.

³¹ Hipaqo kiu shivekeno pa kusami aqemiqono ithulu puzu panonguye shishe amlo shimoveno panonguno panoqo mipeu lau wupuzu kumtsu kishivekela pive.

³² Tileno pa mipeu no aqeu hu ku-saghipe eno pa vilo ishipi, ‘Noye kusakughami aqeu kena! Nono iqhuiniju auveke ghenguno nono ipi- agha puakeu kumtsu qhi khavetsuke.

³³ Ino okimiyeqhiyi kehu toi, noghi okusami aqemi shou kimiyeqhiyi keu akepuke.’

³⁴ Pa mipeu ye axuideve puzu aqeu huno pa pi kumtsu lokhamoke kutolo pa pesu akughukilo aghime tsupenike puwuve.”

³⁵ Jisu no kishekhave ghi ishipi, “Nongu mlo lono nongu thikuzumi kipimi pevetsumo aye, iPuh kungughalo akeu ghi nongu lakhikhi shou hitoi peitha nani.”