MATTHEW 17 - BAIBEL (BSI)

Ajuhi Kilivekeu

¹ Atsala tsugho thiu Jisu no pa gholo Pitor, Jems eno Johan pama athiazu ishi sasu panongu likhi naghuto kuchuqu lakhilo iqho.

² Panoqo gizu lono Jisu ye ajuhi kilive, eno pa gino tsukinhe toi vuqayive eno paphiminiye akuvu hutoi miyetsughoyive.

³ Tileno Muse ngo Elija pamano panoqo lau ipeghi puzu Jisu sasu kuptsake ithulu.

⁴ Ikelo Pitor no Jisu vilo pi, “Ampeu, ningu hilau aghikeu hiye alovae; nono pulokepu shi aye, ino hile apusho kuthu shitsuni, lakhino oghenguno lakhi no Muse ghenguno, eno lakhino Elija ghenguno ishi shitsunie.”

⁵ Pano pi aphi lono, vuqayikeu hu khungkusu lakhino panoqo kuzupholuve eno khungkusu lono asutsa lakhino ishi pi; “Hiye ino kimiyechekeu nuke, pa lau ilokiqi acheni, pa tsa inilo.”

⁶ Kughou akhopemino asutsa hu chilukeno panonguye shishe msa khokhoshive puzu panongu gi pishiqhope itsaiqive.

⁷ Ikemu Jisu no ighi eno panoqo bupuzu ishipi, “Ithulo, eno musakevilo!”

⁸ Ike panonguno jupuku kelauye Jisu likhi thono kutami khumu ithumlave.

⁹ Panonguno naghuto lono iqi chekelo, Jisu no pano kuthu vilo ishi ahza tsu: “Ni Timi Nu akithi lono xuputhuve moke kutolo kungunhetsu hipau khuu vilomu pikevilo.”

¹⁰ Tile akhopemiqono pa vilo ishi iniju, “Tishiaye kushiye Ayezah kukutsumino pikeuye Elija paghi ighi masa pikya?”

¹¹ Jisu no ishi khochileve, “Elija paghi ighini chenike eno pano thwokha kutope qhinikeuke.

¹² Ino nongu vilo pini, Elija ye mtsuqheyino ighivae, ikemu timiqono pa mthaveke, eno panoqono pashou kiu shinishi keno shivae. Tihutoi, panoqono ni Timi Nu ghi peithapusa nani.”

¹³ Paye Johan Baptist pesu panoqo vilo pi anikenapi akhopemiqoye tileno ithikututa shilue.

Tughami Itimi philo akeu Shipivi

¹⁴ Kughou panonguno timi aqokitikhi lau ideghi keno, timi lakhi Jisu lau ighino qhoqhunhepe puzu ishipi,

¹⁵ “Akijeu, inu kimiyekutu tsulo, kughengu paye kilighakipemike eno shishe aghime sholu acheni puzu ghuthu kutomo amilo ngo azulo ilulove cheni.

¹⁶ Ino okhopemi lau pa saghikemu panonguye pa shipivimlavae.”

¹⁷ Jisu no ishi khochile, “Nongu pulumla kemi eno chighichilai kemiqo! Niye khitohi nongu sasu amasa kya? Niye khitohi nongu pukuphu alo pikya? Hila pa sasu ighilo.”

¹⁸ Jisu no tughami lomi pikelo tipauno pa launo ipeghive eno itimi huye paikhavino shipivive.

¹⁹ Akhopemino lomo shi-ghi Jisu lau ighi no pi, “Ninguye kushiye hi haphe mlave kya?”

²⁰ Pano panongu vilo ishi khochile, “Hiye kutaulo kumono nongu kupulu mikhelo kehue. Kughengu kuchouno ino nongu vilo pini, nonguno aghanethi pahi likhimu akupulu aghi aye, nonguno naghuto hipau vilo, ‘Hileno hulau iqewuvelo’ ipi kelo, tino iqewuve nani. Nonguno shimlakeu kiumu kuha nani.

²¹ Ikemu akighini eno kumvukeu likhino hikithipu haphelu nanike thono kutau kiunomu shimlae.”

Jisu no Akiniu Pa Kithi Vehupi

²² Akhopemi Galil lo kumqokutsupe akelo, Jisu no panoqo vilo ishipi; “Ni Timi Nu ye timiqo lau kughape tsuveni cheae,

²³ eno tipaqono pa pithive nani; ikemu atsala akuthuni paye xuputhuve nani.” Ikelo akhopemiye amloghime shive.

Achineki Suqha tsukeu

²⁴ Kughou Jisu ngo pa khopemi qono Kapernaum lo ighi keno, Achineki suqha kuqhamino Pitor lau ighi no pi, “Nongu kutsu chekeuye Achineki suqha tsumo nikesha?”

²⁵ Pitor no ishipi, “Tishi nani thono.” Kughou Pitor no aki alou iloghi keno, Jisu paghino pa putsa ghi pi, “Simon, noye kishikepu ipi kumsu ani kya? Ayeghilo kukami qoye khunoqo launo zahme momu asuqha qhalu cheni kya? Panongu ghakhumi launo keo inami launo kya?”

²⁶ “Inami lau noe,” ipi Pitor no khochile kelo Jisu no pa vilo ishipi, “Tipau kiqiye aghakhumiye tsumokepuke.

²⁷ Ikemu timi hipaqo puxamoni keghenguno azughilo wupuzu akha kumsupu yi lakhi vesulo, eno akha musulu tughiu sunhephe puzu tipau kichi sukhoju aye tile pisa aghi nani; ike tipau ikhilulo eno ighenguno ngo nongu ghenguno Achineki suqha panoqo tsuvelo.”