Mark 8 - BAIBEL (BSI)

Timi 4000 Lojikeu

¹ Ado kushuwa kumolo, itaghi timi aqokitikhi lakhi kumqolu. Timi qoye kiumu chukepu kuhave kehu Jisu no pa khopemi kuno panoqo vilo ishipi,

² “Timi hipaqo shou imloighiqhiyivae, kughengu panonguye igholo atsala kuthu ngova eno itehiye kiumu chukepu kuhava.

³ Ino panongu pelo akhuava shi pano kilo puwoaye, panongu ye alalo lhove nani, kughengu panoqo gholo khamiye ala kushuwa lono ighikemike.”

⁴ Pa khopemino pa khochile pa iniju, “Timino ngochemokeu-a hileye khuuno timi hijejehi sala achuqu lukumkha aghini kya?”

⁵ Jisu no ishi iniju, “Nonguye asho khije ani kya?” Panonguno pi “Ashopa tsuni ani.”

⁶ Timi aqokitikhi vilo ayeghi shou iqa lopi ahza tsu.Tishieno pano asho tsuni ikhilu puzu, Alhou shikimthitsuno tipaqo supho eno timiqo kijetsu lopi pesu pa khopemiqo tsu, ike akhopemino tihutoi shi.

⁷ Panonguye akha kititi ghi hami ae. Jisu no tighi pesu Alhou shikimthi, eno pa khopemi pelo tighi timiqo lau kijetsupe.

⁸ Timi kumtsuno chupuzu aghaqilue, tilehi timi 4000 kutolo ae.

⁹ Akhopemi qono munomugho chukhakumo kichekutsuju kelo ashoghi tsuni chhitoi kichelue.

¹⁰ Jisu no timiqo kughuxa puwove, eno mtazu pa khopemi sasu ashukalo iku puzu Dalmanutha yeghi kudau wuve.

Farisimi no Amchipu Khu

¹¹ Farisimi khami ighieno Jisu sasu kutsalathu. Panonguno Jisu kitimeve niye pa vilo atsutsu kudauno amchipu lakhi piyelopi khu.

¹² Jisu no amlo ghujulo tuthu kishe toi pa tuthu sheno pi,”Kushiye hipa tiqhelimi qoye amchipu phucheni kya? Kuchouno ino nongu vilo pini, hipa tiqhelimi lau amchipu tsumo nani”. Tishino paye panoqo launo cheve eno ashukalo ilono azughi kathasu tuxau ikuve.

¹³ Tishieno paye panoqo launo cheve eno ashukalo ilo puzu azughi kathasu tuxau ikuve.

Herod ngo Farisimi kholaqhi

¹⁴ Akhopemiqoye asho lukumkha shi pe nikeuye kumsumave eno panonguye asho lakhi likhi pesu ashukalo iku.

¹⁵ Ikehu panongu pelo kutokupuyi peniye pano ishi pi, “Jukutoluvelo, Farisimi ngo Herod kholaqhi lono kutokupuyi lulo!”

¹⁶ Akhopemiqo dolono kuptsa ghi pi, “Ninguno asho peighimo kehu pianie.”

¹⁷ Panonguno kiu piakeno Jisu no ithiveno ishi iniju: “Nonguno asho peighimokeu ghenguno kushiye kutsala ani kya? Nonguye itaghi mtha aphi momu vethamla kesha? Nongu mlo mukamughayive akesha?

¹⁸ Nonguye anhethi puani puzu ithumla kesha? eno akini puani puzu chimla kesha? Nonguye kumsumla kesha?

¹⁹ Ino timi 5000 ghenguno ashopa pungu suphokelo, nonguye munomugho ashoghi khije kichekutsulu kya?” Panonguno pi, “Ashoghi chighikini.”

²⁰ “Eno 4000 ghenguno asho tsuni suphokeloye nonguye munomugho ashoghi khije kichekutsulu kya?” ipi Jisu no iniju. Tile panonguno ishi khochile: “Ashoghi tsuni.”

²¹ Ikelo Jisu no panoqo vilo iniju, “Tishiaye nonguye vethamla aphi kesha?”

Anhethi Kighichemi Shipivi

²² Jisu no pa khopemi sasu Bethsaida lo ighi. Tile timi khamino anhethi kighichemi Jisu lau saghi eno timi tipau jutsulo pi pa qhuyiniju.

²³ Jisu no anhethi kighicheu a-u lono sunhepeno sasu aphu kubalalo wuve. Jisu no timi tipau nhethilo musupuku eno a-u pesu pa nhethi butsu puzu pa vilo iniju, “Noye kiukiumu ithulu anima?”

²⁴ Timi huno pa gi peqhe ithu jupuzu ishi pi, “Niye timiqo ithulu ani, ikemu panonguye asubono ala checheketoi ani.”

²⁵ Jisu no itaghi pa-u pesu timi tipau nhethilo butsu. Ike timi huno pa nhethi pilepe jukelo pa nhethino thwokha kumtsu mtsuqheyi ithuluve.

²⁶ Tishieno Jisu no timi tipauye pa kilo puwove eno ishi pi, “Aphulo ideilo kevilo.”

Pitor no Jisu ghili Piphetsu

²⁷ Jisu ngo pa khopemiye chesu Kaisaria Filipi qhalo aphu akeqolo wuve. Alalo chekelo panoqo vilo ishi iniju, “Timi qoye niye khuuepi cheni kya?”

²⁸ Panonguno ishi pa khochile “Khamino noye Johan Baptist ke ipi cheni, eno kutami khamino noye Elija kepi cheni, itaghi khamino noye tungkupmi gholo lakhiepi cheni.”

²⁹ Tile pano panoqo vilo iniju, “Imaye, nonguye niye khuu kepi cheni kya?” Pitor no ishi khochile, “Noye Mesiya ke.”

³⁰ Ikelo Jisu no panoqo vilo ishi pinikeu lakhave, “Khuu vilomu niye khuu keno pi kevilo.”

Jisu no Ime thinikeu Ghili

³¹ Tileno Jisu no pa khopemi vilo akukutsu tsukeuno “Timi Nu ye aghime kitikhi shimasa, eno Judami kichimi achinetomi eno Ayezah kukutsumi qono pa ikhilumo nani eno pa pithive nani ikemu atsala kuthu thiuye pa xuputhuve nani” ipi.

³² Pano kiumu kusumono hipau pi. Ikehu Pitor no pa sawu puzu pahakhakeu tsa pi.

³³ Ikemu Jisu no tsughu ighieno pa khopemiqo jupuzu Pitor lomi pi, “Ilauno chevelo, Satan! Kughengu noye Alhou launo ighikeu kukumsu kumsumo puzu timi kukumsu kumsu ani.”

³⁴ Tithiu Jisu no pa khopemi gholono timi aqokitikhi ku, eno panongu vilo pi, “Timi khuno igholo ighini keno pa likhi pa ghili kumsumave puzu paw kros xapuno ipape masae.

³⁵ Kughengu timi khuno pa kuxu pukhani keno puhave nani, ikemu timi khuno ighenguno eno alokivipu-tsa ghenguno pa kuxu puwove nikeno ti xalu nani.

³⁶ Timi lakhino ayeghi kuchopu pe pawu shiluve pinamu pa kuxu puhave kepu shive aye kiu ala shiluni kya?

³⁷ Kughengu timi khumu pa kuxu kuchou thelilo kiumu tsu mlae.

³⁸ Tishiaye, timi khuno Alhou phimokeu eno kusakugha tiqheli hipaulo paye ilaumike ipinikeu eno itsa pinikeulo kiumu shitsumove aye, ni Timi Nu ghi kughou papu jukuvu lono akimthe kungumi sasu ighikelo timi tipau ghenguno kiumu shitsumove nani.”