Mark 7 - BAIBEL (BSI)

Apu-asuqo Kukutsu

¹ Jerusalem lono Farisimi ngo Ayezah kukutsumi khami iqighikeqo no Jisu suhope kumqo ae.

² Panonguno Jisu khopemi khamiye a-u shikimthemono achuqupu chuakeu ithulu, tiye Farisimi no timi vilo a-u mutsulo pikeu ghola lono shimo kehue.

³ Kughengu Farisimi ngo Judami kumtsuno apu-asuno kutsukeu pekishe sughikeu papeche, tiye panongu yeh gholauno a-u mutsumokeloye chuchemoe.

⁴ Panoqoye kughou alhikishi-a lono ighini keno pano shikimtheve mphi loye chuchemoe. Tinguno alau ghi apu-asu launo pekishe sughikeu panonguno pepimhe che, ajukhu, alazayili, ali eno azu-a ngo ishi pano khuayeh gholauno shikimthe che.

⁵ Ike Farisimi ngo Ayezah kukutsumino Jisu vilo iniju, “Okhopemiqoye kushiye apu-asu launo pekishe sughikeu kukutsu kiqi lono xumo puzu a-u shikimthemono chucheni kya?”

⁶ Jisu no panongu khochile. “Isaya no kughou tungkuptsa nongu ghili pikeno pa ye achipishi pivae! Nonguye pano yepe qhikeu toi kuhakughamiqoe. ‘Timi hipaqoye akichilo likhino igihue, ikemu panongu mloye ilauno putou anie;’ ipi Alhou no pi.

⁷ ‘Panonguno adou lono imlla achenie, Timino shikeu yezah hu pesu Alhou launo ighikeu khuayeh kepi kutsu cheni!’ ”

⁸ Jisu no highi pi, “Nonguye Alhou no ahza tsukeu qhive puzu timi launo pekishe sughikeu kukutsu mutotoi tsuqupe acheni.”

⁹ Jisu no highi pikithe, “Nonguye muquijoyi shino Alhou no ahza tsukeu peveno nonguno pekishe pesu kutsuchekeu qhipuaniye shi cheni!

¹⁰ Kughengu Muse no ishi ahza tsu puani, ‘Opu eno oza gihulo’ eno ‘Khuno apu aza lhoksa pinikeno pa pithivelo.’

¹¹ Ikemu nonguno pikeuno, timi lakhino kiwala aghieno tipau peitha puzu pa puaza kuphukulupu shi ani,ikemu pano, ‘Hiye korban shive ake,’ tipau kiqiye, hiye Alhou wu shiveake, ipi aye,

¹² nonguno timi tipau pelo apu-aza kuphumonikeu jekukivi shivepe cheni.

¹³ Hitoi shikeu nonguno pekishepe kutsuchekeu kutami shikawokeu lono Alhou tsaye adou shivetsu cheni. Hitoikeu kutomo nonguno shi acheni.”

Timi Shikuchhubevepekeu

¹⁴ Tile Jisu no timi aqokitikhi itaghi ku-kumqono panoqo vilo pi, “Nongu kumtsu itsa inilo eno ithitoilulo.

¹⁵ Ashouno kiu timi lolo ilokeno tiye pa shikuchhubeve chemo, ikemu timi lakhi lolono kiu ipeghikeno tipauno pashikuchhubeve cheni.

¹⁶ Khuno chilunishi anikeno pa pelo inilu pelo.”

¹⁷ Kughou pano timiqo qhiveno akilo ilove keno, pa khopemiqono pa vilo kimighipiyekeutsa iniju.

¹⁸ Jisu no panoqo vilo pi, “Tishiaye nongu ghi kutami nguno alokutsu kumoe. Ashouno timi lolo ilokeuye pa shikuchhubeve lu chemo pi nonguye mtha kesha?

¹⁹ Kughengu tiye pa lolo ilo chenike kumoe, ikemu pa kivelo ilove cheni, eno tishieno ashou ipeve cheni.” [Jisu no hi pikeu huye achuqupuye kumtsu chulu nani kepi pano pitsuke.]

²⁰ Pano itaghi ishi pi “Timi lakhi lolono kiu ipeghi cheni keno tino pa pelo kuchhubeve kepu shipe cheni.

²¹ Kughengu alou timi mlo lono alhoksa kukumsu ipeghikeu lono hipaqo shi cheni: Asalha, akupuka, timi ghiqhi, kutami nipu sazukeu,

²² aghichikupo, kusakugha kumla, pishikiqhi, anhekushu, kuthakugha, aqhekuza eno mbomzushikeu.

²³ Alhoksa hipaqo thwokha kumtsu timi lolono ipeghi cheni eno tipaqono pa shikuchhubeve cheni.”

Topumi lakhi Kupulu

²⁴ Tithiu Jisu ye Tur ngo Sidon qhalo wuniye cheve. Pano ighino aki lakhilo iloe eno timi khuu pelomu paye tile ani kepi ithipemo nikeu shia, ikemu paye itshu khamlave.

²⁵ Topumi lakhi nga tughakusano sa-ake atopuuno Jisu ghili chilu puzu mtazu ighieno pa pukhu philo itsaiqi.

²⁶ Atopu-uye Judakumomike. Siriya lo Fonika lono punukemi. Lino anga phi lono tughami haphevetsu lopi Jisu qhuyiniju.

²⁷ Jisu no li vilo pi. “Angaqo paghi loji paghi pelo, kughengu angaqo chuqu ikhi pesu atsuqo lau veqhitsu nikeuye achipi kumoe.”

²⁸ Ikemu lino ishi khochile, “Akijeu tishike, ikemu alakhu qholo atsuqo ghi angaqono phekiqhikighi chu cheni.”

²⁹ Jisu no li vilo pi, “Nono hipau pikeu ghenguno noye akilo wujulo, tughamiye onga qhiveno cheveake.”

³⁰ Lino akilo ighi kelo anga zuaghi eno tughamiye cheve aghi.

Amlitshu, Akinikughupou Shipivi

³¹ Tithiu Jisu ye Tur qha lono cheveno Sidon vechesu Taun Chighi kudau Galil zughilo wuve.

³² Timi khamino akini ipo atsa ghi piphemlakemi lakhi palau saghi, eno Jisu vilo pa-u pesu timi tipau bujutsulo pi qhuiyiniju.

³³ Ike Jisu no aqokitikhi gholono timi tipau likhi sawu puzu, pa- uloti pesu timi tipau kinilo chope ngo eno amtti musuqhi puzu timi mili ditsu.

³⁴ Tishino Jisu no kunguu jupukuno amlo kughuju tuthu kishe toi sheno pi, “Efatha” tipau kiqiye, “Khaqhivelo”

³⁵ Eno timi tipau kini khaqhiluve, eno pa mili kuqholuve, eno paye kiumu kupunamono atsa piluve.

³⁶ Jisu no hipau pesu khuvilomu pikevilopi kumtsu hakhave, ikemu pano khije panoqo lakhakeno tijehi panonguno vekuphasu piwuve.

³⁷ Eno ti chilukemi kumtsuno shishe akumzaveno ishi pi, “Thwokha pano shipivivetsu: Pano akini kughupomi pelo chilupe eno atsa piphemlakemi pelo pilupe ke!”