Mark 5 - BAIBEL (BSI)

Tughakusano sa-akemi Shipivi

¹ Ike panonguno azughi tuxakudau Gerasen ghakhulo ighi.

² Jisu no ashuka lono ipeghi kemtsa, timi lakhi akumokilive kudauno ighieno pa sasu kusho.

³ Timi huye tughakusa sa akehu akumokilivelo acheke. Khunomu ayikichhe ghi pesu pa tshupe qhimla,

⁴ kughengu ghuthu kutomo pa phi a-u tshuvetsue ikemu tishi ke kumtsulo pano ayikichhe suthave eno pa pukhulo ayikhada pukukeu sutha piniyivetsu eno khunomu pa chhikughuvulu kepu kumto kuhae.

⁵ Putho-pucho akumokilive lo eno naghutolo paye pulhapuju vekipighi ighache, eno atu pesu pa likhi pa hepungo-qhiche.

⁶ Kughou pano putouno Jisu ithulukeno, posu ighino pa zulo gihukeu shi-ghi qhoqhunheluve,

⁷ eno asutsa kumgha lono ighaghi pi, “O Jisu, shishe Akiqheu Lhou Nu, noye ikughape kiu shivetsu niye ani kya? Alhou jekuno ino ovilo iniju anike, ishikighime kevilo!”

⁸ Pano hi pikeuye kutauno kumo puzu Jisu no pa vilo ishipiae: “No tughakusa, timi hipau launo ipeghivelo!”

⁹ Ikehu Jisu no pa vilo ishi iniju, “Oje khuu kya?” Timi huno ishi khochile, “Ije ye ‘Aqokitikhie,’ kughengu ninguye kutomoke!”

¹⁰ Eno pano shishe Jisu qhuinijukeuno tughakusaqo pelo tipa ghakhuqha lono puwuvetsu kevilo pie.

¹¹ Awo aqo lakhi tipau phivilo naghuto-vekudalo achu mza ae.

¹² Tughakusaqono Jisu qhuiniju, “Awoqo lau ningu puwuvelo, ningu pelo tipaqo philo ilo pelo.”

¹³ Ikehu Jisu no tipaqo vilo chevelo pi. Tughakusaqono timi launo ipeve puzu awoqo philo ilove. Awo aqo kuchopu kelo 2000 kutoloke, atuxulo kohakivesu iqieno azughilo ilove eno azughi lono putsuqhive.

¹⁴ Awoqo khechekemino pove eno hipau sutsa pesu taun lo eno aghakhuqhalo kulhavetsue. Kiu shive keno juniye timiqo no ighi.

¹⁵ Panonguno Jisu lau ighi, eno timi khuu philo tughami aqokitikhi achekeno tipau ithulu, paye aphimini pepuve, pa kukumsu achipishi kitheveno tile iqa ae; eno timi kumtsuno msave.

¹⁶ Khunoqono ti ithulu keno tipaqono tughamino sa achekeu timi huye kushivetsu keno eno awoqo ghili ishi kutami vilo pi.

¹⁷ Ike timiqono pano yeghi sukumxa qhiveno wuvelopi Jisu qhuiniju auve.

¹⁸ Jisu no ashukalo ilochekelo, timi tughamino sa-achekeu huno Jisu qhuiniju pi, “Ipelo ogholo chepenima?”

¹⁹ Ikemu Jisu no pa milive eno pa vilo ishi pi, “Nobolomi lau akilo wolo eno panoqo vilo Ampeu no oghenguno kiu shitsu keno eno Ampeu no kishi okupuqhiyi keno pilo.”

²⁰ Ike timi huno cheve eno Taun Chighiqo kumtsulo wu puzu Jisu no pa ghenguno kiu shitsukeno pia; eno ti chilukemi kumtsu akumzaqhiyive.

Jairus nga eno Jisu Phishe Bukeu Totimi

²¹ Jisu no ashuka lono itaghi azughi katha susu tuxa kudau ighikelo timi aqokitikhino pa lau kumqo ighi, paye azughi mukulo ae.

²² Ikelo Sinagog lo sakipheu Jairus no ighino Jisu ithulu kelo pa pukhu phivilo iluikiqi,

²³ eno Jisu vilo tsu-momo qhuinijughi pi, “Ninga ilimi kitila lakhi anike liye thivenikeshi su ani. Ighi puzu li shou o-u betsulo, tishianguno liye viluve nani!”

²⁴ Ike Jisu no pa gholo wuche. Tile timi aqokitikhino pa papesu wuche eno aqha kumtsu lono pa suhupe che.

²⁵ Tilehi totimi lakhi ampe chighikini aji po chekemi ae,

²⁶ shikipivi mi kutomono li tucho chenamu liye ighono su-ache. Liye pisa akeu kumtsu puwokhavemu kutakeu kuhae ikemu alhoksa shikitheuve.

²⁷ Jisu ghili pikeu lino chiluche eno timi aqokitikhi gholono pa thiu ighi.

²⁸ Kughengu lino ishi kumsu, “Pano uchekeu phi likhimu ino bulu aye, niye vive nani.”

²⁹ Pano uchekeu phi lino bulue ike paikhavino lino aji pochekeu tave, eno liye akusu suakeu lono viluvea kepi li philo ithi ighive.

³⁰ Jisu ye akuka pa launo ipeve keu ithive puzu timi aqokitikhi lau igho-ighino pi, “Khuno ino uchekeu phi bu kya?”

³¹ Pa khopemino pa khochile pi, “Nono ithulu anike, timi aqo kitikhino osuhupe chenie, ikeghi noye kishi puzu ‘Khuno ibu kya?’ ipi ani kya?”

³² Ikemu khuno hi shikeno juniye Jisu no pa homxa jukutoae.

³³ Totimi huye li shi-ajilo kiu shivetsu keno ithive puzu akumsano khokhoshi ighi eno Jisu zulo ilu iqiveno pa vilo kishivekeno abo- akeshi pi.

³⁴ Jisu no li vilo pi, “Anga, okupuluno oshipivivae. Alokughunoshi wolo, eno okusu lono noye vithai luvae.”

³⁵ Jisu no hi pi aphi lono, Jairus ki lono timi khami ighino pi, “Ongaye thivae noye kushiniaye kutsuchekeu hinguno alau punaqhi ani kya?”

³⁶ Panonguno pikeu Jisu no inikumghaleyi vetsu eno pa vilo ishi pi, “Musakevilo, puluke likhi pulualo.”

³⁷ Pitor ngo Jems eno pa thikuzuu Johan kumo aye kutamiye khumu pa gholo wupemo nikeu shive.

³⁸ Panonguno kughou Sinagog lo sakipheu kilo ighi keno, mubumghuyi aghike ithulu, eno timiqono shishe ighamukuqa aghie.

³⁹ Jisu no sholoku-u ilo puzu panoqo vilo pi, “Nonguye kushiye mubumughuyi ani kya? Kushiye qah ani kya? Angaye thimphie, liye zu anie!”

⁴⁰ Panonguno pa junu, ikehu pano panoqo kumtsu hapipeve, eno anga pu-aza ngo pa khopemi mikuthu ishi likhi sasu anga puzupe puakeu chebolo ilo.

⁴¹ Pano li-u tsuqupe puzu li vilo ishipi, “Talita qum”, tipau kiqiye “Ilimi kitila-o! Ino ovilo pi ani, ithughivelo!”

⁴² Paikhavino liye ithughive eno alacheluve; liye ampe chighikini nga shiae. Hi shi kemtsa panonguye akichiqhi kelauno kiumu kumsumlave.

⁴³ Khuu vilomu hipau ithi pekevilopi Jisu no tsatsayi lakhave, eno chukepu kiuala pesu li tsulopi pano panongu vilo pive.