Mark 4 - BAIBEL (BSI)

Apitikiveu Kimighipiye Tsa

¹ Itaghi Jisu no Galil zughi phivilo kutsuniye wu. Timi aqo kumzapuno pa suholuve kehu pano ashuka lakhilo ilo puzu tipau lo iqae. Ashukaye azu shou ae eno timi aqokitikhiye azughi mukulo ae.

² Pano kimighipiye keutsa lono thokha jeli kutomo timiqo vilo kutsue. Pano kutsu kelo panoqo vilo ishi pi,

³ “Tsaquyi inijulo ! Apitikivemi lakhino apiti veniye wu.

⁴ Pano alulo apiti veche kelo apiti hamiye alalo ikiqi iku, ikelo aghauqono ighi puzu ti mighive.

⁵ Apiti hamiye atu shou yeghi ipumihei akeulo ikiqi iku.Ayeghi shicho thonheimo kehu apiti hu paikahavino lhoipeghive.

⁶ Kughou tsukinheno puchomugho shive keno tipau hu phuqhi, eno tiye akuhu thonhei quilomo kehu kimghoive.

⁷ Apiti hamiye asahulilo ikiqi ilo, kughou asahuno thuipeghi keno tipau ghusuveno athi pithimove.

⁸ Ikemu apiti hamiye ayeghishicho akivilo ikiqi ilo eno tipaqo ye lhoipeghino thuwu puzu athi pithie, hamino shighi hamino lhotsugho eno hamino aqhe ishi pithie.”

⁹ Jisu no ishi pi, “Chilunishikemi pelo inilu pelo.”

Kimighipiyekeu-tsa Kimji

¹⁰ Kughou Jisu likhi akeno, puzu-u pa tsa iniakemi khamino akhopemi chighikini sasu ighi puzu pa vilo kimighipiyekeutsa kiqi iniju.

¹¹ Jisu no panoqo vilo pi, “Alhou yehkipe tuqhou hu nongu tsuvae, ikemu kutami hipa bocholo kuhakeqoye thwokha kumtsu kimighipiyekeutsa lono chilu anie;

¹² tishianguno, ‘Panonguno jukeye juanamu kiumu ithumla Panonguno inikeye inianamu kiumu chimla. Tishimoke aye, panonguno Alhou lau xaideghiluni cheke, Alhou no panongu xine pevetsuni cheke.’ ”

Apitikiveu tsa Kiqi

¹³ Tishieno Jisu no panoqo vilo iniju, “Nonguye hi kimighipiyekeu tsa mtha kesha? Tishiaye kishi puzu kimighipiyekeutsa kutauqo ithikuthuni kya?

¹⁴ Apitikiveu huno Atsa hu vesu.

¹⁵ Alalo vepukuve keqoye khunoqo shou Atsa vesukeno panonguno ti chilu kemtsa Satan no ighieno panoqo lolo atsa vesupuakeu hu pewuvetsu.

¹⁶ Kutau hamino atu akeu yeghi shou apiti ikiqi ilolu kehutoi. Panoqoye Atsa hu chilu kemtsa alokivishi ikhilu.

¹⁷ Ikemu pano thonhei quilo pemoe, ikehu panonguye ngopushulu chemo. Eno Atsa ghenguno kughou shilukusa eno shikighimekeu ighini keno, panonguye paikhavino ikiqive cheni.

¹⁸ Kutau hamino asahulilo apiti ikiqi iloluke hutoike. Panonguye Atsa chiluvekemiqo ke,

¹⁹ ikemu ayeghilo kuxu kumsupe kutakihikeu eno akini ju aghichipokeu eno kutau thwokha minekeuno iloghive puzu Atsa hu ghusuve cheni eno athi pithipemove cheni.

²⁰ Ikemu kutau hamiye ayeghi shicho kivi shou vesulukeu toi ke, panoqoye Atsa hu chilu puzu ti ikhiluno hamino alothi shighi, hamino lhotsugho eno hamino aqhe ishi pithilu.”

Akulu Kuqupe Alino Nhavekeu

²¹ Jisu no panoqo vilo hi iniju, “Akulu kuqupe alino qhove momu alupa qholo qhi cheni kesha? Tiye akulu kibepulo qhi chenike kumo kesha?

²² Kughengu kiumu kusulukepu kuhae, tiye ashou ipeghive nani eno kiu kusupuaghi nikeno akuvu lono lhapheve nani.

²³ Chilunishi keu kini puaghikemi pelo ini pelo.”

²⁴ Pano highi panoqo vilo pi: “Nonguno kiu chilukeno tsaqui amlo tsulo! Nonguno kiu qhemi lono kutami shou kughathabe cheni keno Alhou no tipa qhemi lono nongu shou kughathabe nani, eno tinguno ghi alaushi nongu shou kupha tsu nani.

²⁵ Kughengu khuuno aghi nikeno alauashi tsukupha nani, ikemu khuno kiumu kuha keno pano kiu aghikeno tighi ikhisuwuvetsu nani.”

Apiti Thuwuakeu Kimighipiye

²⁶ Jisu no pi:”Alhou yehkipeye timi lakhino pa lulo apiti vesukeu toike.

²⁷ Pano putholo zu-ano inaqhe ithughi tishi akelo apitino lhoipeghi puzu thuwu ae, tiye kishino tishilu acheni keno timi huye mthae.

²⁸ Ayeghino pakutoshino axabo thuwupe cheni, atughushi anipa, tipashelo amzu, tipashelo amzu lono athi pubeyi pithi cheni.

²⁹ Ikemu kughono athi niveni keno timino hashiwo pe aghi ghotha cheni, kughengu ghiletusho ighivekehu.”

Aghanethi Kimighipiye tsa

³⁰ Jisu no ishi iniju “Ninguye kiu pesu Alhou yehkipe kimihi shitsuni kya? Momu hipau ghenguno kimighipiyekeutsa kiu pesu lhepiyeni kya?

³¹ Hiye aghanethi lakhi toike, alulo yisu kelo hiye ayeghilo apiti kumtsu nguno akitilauke.

³² Ikeghi, kughou hipau yisuni keno thu-iku cheni eno atsunibo kumtsu nguno akijeu shive cheni eno aloka kijeje ikoipeghi cheni, tishikeu lono aghauno ighi puzu tipau kiche qholo apusu pesu cheni.”

³³ Kimighipiyekeutsa titoikeu kutomo pesu Jisu no timiqo vilo akukutsu-tsa piche, tiye panoqono ithikuthulu kepu qhemi lono piche.

³⁴ Kimighipiyekeutsa sumokeloye paye panoqo putsamoe, ikemu kughou pa khopemiqo likhi sasu anikeno, thwokha panoqo vilo pano chixechilei lheche.

Pasapagha pelo Iqunheivepe

³⁵ Tipani avela shivekelo Jisu no pa khopemi vilo pi, “Ningu azughi kathasu tuxa kudau wunie.”

³⁶ Ikehu panonguno timi aqo kitikhi qhive puzu akhopemi ye Jisu no ngoakeu shukalo ilono Jisu sasu kumtsa wuve. Ashuka kutau ghi tile ae.

³⁷ Ikelo, pasapagha mulhu kije lakhi ipeghino ashuka alou azu fukucholesu, ikehu ashukaye azuno chhini keshive.

³⁸ Jisu ye ashuka shelo pa kutsu bepesu zuae. Akhopemi no pa kudaputhuno pi, “Kutsupiyechekeu! ningu kumtsu thiveni cheni puzu noye alokumsu kuha kesha?”

³⁹ Tileno Jisu no idathughino amlhu lomi pi eno azughi vilo ishi pi, “Iqunei inaqhoivelo!” Ikelo amlhuno tave eno tilehi shishe qumuyive.

⁴⁰ Jisu no pa khopemi vilo pi, “Nonguye kushiye msa kya? Nonguye akupulu kuha kesha?”

⁴¹ Ikemu panonguye shishe msave eno lakhino lakhi vilo ishi iniju ae, “Timi hipauye khuu keno amlhu ngo azughi thotsu pa gholu kya?”