Mark 3 - BAIBEL (BSI)

A-u Kithimi Lakhi

¹ Itaghi Jisu no Sinagog lo wu, ike tilehi timi a-u kithimi lakhi ae.

² Timi khamino Jisu ye Sabat tsalalo timi hu shipivi nani kemo kela tsaquyi Jisu juae, tishianguno pa pimi tsuniyeke.

³ Jisu no a-u kithiu vilo pi, “Ithuno azuuno ighilo!”

⁴ Tishino pano timiqo vilo iniju, “Sabat pinyeni ni Yezahlo ninguye kiu shikepu kya? Kuphu kepu keo, ghime kepu kya? Timi kuxu xalu kepu keo, ti kutsave kepu kya?” Ikemu panonguye kiumu pimono inaqhoive.

⁵ Jisu ye panoqo lau pishipuwo jupuzu amlo ideve, tishipulaghi panongu mlo kiqhi eno vimokeu jupuzu pa mloimeve. Tishino pano a-u kithiu vilo pi, “O-u xachho lo.” Timi huno pa-u xachho, eno tiye vive.

⁶ Farisimino ipeve puzu mtazu Herod kusamiqo sasu kushono panonguye Jisu pithive nike kughuve.

Ayizukucho Phivi lo Aqokitikhi

⁷ Jisu no pa khopemi sasu Galil zughilo wuve eno timi aqokitikhino pa papesu wu. Timiqoye Galil, Judia,

⁸ Jerusalem, Idumia, Jordan tuxauno eno Tur ngo Sidon phughi sukumxa lono ighi. Jisu no shikeu kumtsu timiqono chilu puzu pa lau ighie.

⁹ Timi kumzapu kehu Jisu no pa khopemi vilo ashuka lakhi pa ghenguno kutope aghilo pive, tishianguno timiqono pa tsakibi pemoniyeke.

¹⁰ Kughengu pano timi kutomo shipivive, ikehu kusukinimi kumtsuno pa diluniye pa koha ighi ae.

¹¹ Kughou tughakusa alolo akeqono Jisu ithulu nikeno, panonguno “Noye Alhou Nue.”

¹² Ikemu Jisu no tughakusa vilo paye Alhou Nu ke ipi khilemu pikevilopi hakhave.

Jisu no Chighikini Kishelu

¹³ Tile Jisu no atoghi lakhilo iqho puzu, pano khunoqo kunishi keno tipaqo pa lau kulu, eno tipaqono pa lau ighi.

¹⁴ Pano chighikini kishelue eno panoqo pesu apostolmi ipi aje kutsu; panoqo pelo pa gholo ape, asheshuwu pe,

¹⁵ tughami haphelu pe eno akuka tsuniyeke.

¹⁶ Pano hipano chighikini kishelu; Simon (Jisu no paje Pitor kuvetsu),

¹⁷ Zebedi nu Jems ngo pa thikuzu-u Johan pama (Jisu no pama je pesu Boanerges ku-kithevetsu, tipau kiqiye “Tsutsukusu-timi”);

¹⁸ Andrew, Filip, Bartholomi, Mathi, Thoma, Alfios, Jems, Thadius Simon aza yeghi kimiyekiniu,

¹⁹ Judas Iskariot, Jisu jekuchuu ngo ishi.

Jisu eno Belzebul

²⁰ Jisu no akilo wove, ike itaghi timi aqo kitikhi ighino kumqoluve, tishikehu Jisu ngo pa khopemiqo ye kuchu-kusho do ghi ithumlano ae.

²¹ kughou Jisu nobolomino hi chilu keno panonguno pa sunheluve niye wue, kughengu timino, “Paye aqho-izuwuvae!” ipi pike.

²² Jerusalem lo Ayezah kukutsumi iqighikeqono ishi pi, “Pa philo Belzebul ani, eno tughami shou atouno akuka pa tsukeu pesu tughami haphe chenie.”

²³ Ike Jisu no timiqo kupuzu kimghikeu tsa hami pesu pi: “Satan no kishi puzu Satan hapheni kya?

²⁴ Akukaqha lakhiye pututa muqoshi kijetha puzu aghushi kile wuve aye, tipa ghakhuye ipopiniyive nani.

²⁵ Akibo lakhiye pututa muqo shi kijetha puzu aghushi kile wuve aye tipa kiboye ipopiniyive nani.

²⁶ Tihutoi Satan kukaqhaye pututa muqoshi kijethave aye tiye ngopushumla eno ashekhaloye pa kukaqha hauveni.

²⁷ “Khunomu akumtomi ki hepho ilo puzu pa nhemgha pukapuwuve mlae, atughushi akumtomi hu tshuve anguno tithiuno pa kilo akeu pukapuwulu nani.”

²⁸ “Kuchouno ino nongu vilo pini, timi xineqo kumtsu eno panonguno kixikila tsa piqhi puaghikeu kumtsu pevetsu kulupu shi nani.

²⁹ Ikemu khunono Aghungu Kimthe shou thaighakeu piqhi nikeno khilemu axine qhivetsu mla nani, kughengu paye alhokupuju xine shivae.”

³⁰ Jisu no hi pikeuye kutau lono kumo puzu khamino “Paye tughakusa lakhi pa philo anie” ipi kehue.

Jisu Paza ngo Pa Thikuzumi

³¹ Tile Jisu paza ngo pa thikuzumi ighino aki khalau puthugho puzu aghinimi pelo pa kuwupe.

³² Timi kumzapuno pa suhupe iqa-a, panonguno pa vilo ishi pi, “Oza ngo othikuzumiqo ye khalau anie eno panonguye oyighi anie.”

³³ Jisu no ishi khochile, “Iza ye khuno kya? Ithikuzumiye khuno kya?”

³⁴ Pa suhope iqa akeqo kudau jupuzu pi, “Julo! Iza ngo ithikuzumiye hipaqo ke:

³⁵ Khunono Alhou pulou shi cheni keno tipaqono ithikuzumi, ichelimi eno izake.”