Mark 16 - BAIBEL (BSI)

Xuchilethuve

¹ Sabat tsala wove kethiu, Magdala noghami Maria, Jems paza Maria eno Salome ishino Jisu sukumo nupe qhi nike ghenguno axokutsungu qhu.

² tile Tughakhani inaqhe tsukinhe ipeghikelo panonguno akumokilo wu.

³ Alalo chekelo panongu dolo ishi kuptsache: “Akumoki ikulolalo atuqu akeu khuu pelo ningu ghenguno tukulove tsupeni kya?”

⁴ Tiye atuqu kijeke. Ike panonguno jupuwo kelo atuqu huye tukulove aghikeu ithulu.

⁵ Akumoki alou iloghi kelo apumi lakhi metsughoyikeu phimini chijeboyipepu puzu ajeu iqa aghike panonguno ithulu, ike panonguye thughuyive.

⁶ Panoqo vilo pano ishi pi, “Msakevilo, nonguye Nazaret noghami Jisu kros lo yedavekeu hu phuchenike. Ikemu paye hile kuha, paye xuthuvae. Julo, panonguno hilehi pa pewo qhike.

⁷ Nonguye wulo eno pa khopemi ngo Pitor vilo asutsa hipau pithilo: ‘Paye nongu zuuno Galil lo wuni cheni; pano nongu vilo pivekeu hutoi, tilauno nonguno pa ithulu nani.’ ”

⁸ Ikelo panonguye msakhokhoshive eno akumokilive lono posusu wuve. Panonguye khuu vilomu kiumu pimoe, kughengu panoqoye musaveke.

KISHEKHAKEU AQAU LAKHI Jisu no Magdala noghami Maria lau Ipeghipiye

⁹ [Jisu no kughou tughakhani akithi lono xuthuvekeno pano atughushi Magdala noghami Maria lau ipeghipiye, pano li launo tughami tsuni haphevetsukeu huke.

¹⁰ Lino wu puzu likusamiqo vilo hipau pi. Panonguye mlo-qa eno ighaqa ae.

¹¹ Ikemu kughou panonguno paye xuaphi eno lino pa ithuluvae pikeu chilukeno panonguno ti pulutsumoe.]

Jisu no Akhopemi Kini lau Ipeghipiye

¹² Hipathiu, Jisu no pakutakeu ghola lono panoqomi mikinino aphulo wuche kelono ipeghi piye.

¹³ Pamano ideghino kutamiqo vilo hipau pesu pi, ikemu panonguno ti pulutsumoe.

Jisu no Akhopemi Chighi-qhaqhi lau Ipeghipiye

¹⁴ Tipathiu Jisu no akhopemi chighi qhaqhino kuchukusho shi ake lono panongu lau ipeghi piye. Panoqo kupulukumo, amlo kumka pano xuthughive kethiu khunoqono pa ithulukeno tipaqo tsa pulutsumo ke ghenguno Jisu no panongu sakiyi.

¹⁵ Pano panoqo vilo pi, “Ayeghiqha kumtsulo wulo eno lokivipu sutsa pesu timi lhoxu kumtsu vilo asheshulo.

¹⁶ Khunoqono pulu puzu baptiz shilu nikeno xalu nani, ikemu khunono pulumo nikeno peve nani.

¹⁷ Kupulumi lau amchipukuka hipaqo panongu gholo anani: Ije lono panonguno tughami haphelu nani, panonguno amli kithe lono pi nani;

¹⁸ Panongu no apighi ikhiqhelu momu tughu yelu namu panongu shipsamla nani; panonguno kusukinimi shou au betsu kelo tipaqono viluve nani.”

Jisu Kungughalo Sakuve

¹⁹ Ike Ampeu Jisu no panoqo putsatave kethiu, paye kungugha lo sakuve, eno Alhou-u ajeu iqave.

²⁰ Akhopemino aqha kumtsulo wuno asheshu, eno Ampeu no panoqo gholo mla eno panonguno asheshukeu sutsaye kuchouke ipikeu shi-ghi amchipu kuka panoqo tsu.