Mark 15 - BAIBEL (BSI)

Pilat zulo Jisu Sawu

¹ Achinetomiqoye inaqhe itheno Muchomiqo ngo Ayezah kutsuchekemi eno Ahohomi kutami kumtsu sasu kughakutha lakhi shi. Panonguno ayikighino Jisu tshu sasu wuno Pilat tsuve.

² Tile Pilat no Jisu vilo iniju, “Noye Judami kukau kesha?” Pano khochile, “Nono pivae.”

³ Achinetomino thwokha jeli pesu Jisu nguku,

⁴ ikehu Pilat no itaghi pa vilo iniju, “Noye kiumu khochilemoni kesha? Panonguye thwokha jeli pesu oshou nguku akhani!”

⁵ Ikemu Jisu no kumu khochile kithemoe, tishikehu Pilat ye akichiqhi auve.

Jisu pithivenike Kughathave

⁶ Hechekulu Ghulhu atsu-tsulo Pilat ye timiqono khukeu kiqi lono akughumi lakhikhi khaqhipheve che.

⁷ Tipa ghulokilo Barabba ipikeuye ayeh kipemi hekibide lono timi heqhi pithiveke ghenguno hekibidemi gholo akughu shiae.

⁸ Timi aqokitikhino ighino Pilat vilo pano puzu-u kishi panongu lau akughumi lakhi khaqhiphetsu che keno titoi shitsu lopi iniju.

⁹ Pilat no panoqo vilo iniju, “Nonguye ipelo nongu lau Judami kukau khaqhiphetsu penishi ani kesha?”

¹⁰ Kughengu achinetomino anhekushu launo Jisu sawo pa lau suvekeu Pilat no vetha luveke.

¹¹ Ikemu achinetomino timi aqokitikhi xukuthono Pilat pelo panoqo lau Barabba khaqhiphetsu penike khu.

¹² Pilat no itaghi timiqo vilo pi, “Tishiaye, nonguno Judami Kukau ipi kuchekeu timi hu pesu niye kiu shivelopi kya?”

¹³ Panonguno ighachile pi, “Kros lo pa yedavelo!”

¹⁴ Pilat no panoqo vilo ishi iniju, “Paye kiu lhoksa mlavekeno kya?” Ikemu timiqono “Kros lo pa yedavelo!” pi alau shi ighamuku.

¹⁵ Ike Pilat no timiqo pulou shitsunishi kelauno panoqo lau Barabba khaqhiphevetsu; eno Jisu ye akighi kichhe pesu ghaqhipe puzu kros lo yedave penike ikhiphepe tsuve.

Ghushimi no Jisu Qoqhi

^16-17 Ghushimino Jisu sunhe sasu kughaki kikhalalo wuve (tiye, Ahng no achekeu kikhalalo ke); eno panonguno kutamiqo kumtsu ku-kumqo. Panonguno lahuphi pa pu-ue, eno asahu pesu ghokunano pa kutsu qhopipe.

¹⁸ Tishi puzu panonguno pa gihukeu shi agigihu pa tsu: “Judami Kukau, axu pushulo!”

¹⁹ Panonguno akusu pesu pa kutsulo ghatsu eno pa shou musute puku eno qhoqhunhepeno pa gihuke ghilishi itsaqipiye.

²⁰ Panonguno pa thaigha tave kethiu, lahuphi xaluvetsu eno pa phi ikhipe pa pu-u. Eno panonguno kros lo pa yedanike sunhe saipeve.

Jisu Kros lo Yedave

²¹ Panonguno wuchekelo Simon ipikeu cheghike kusholu. Paye Kurinia noghami Aleksander ngo Rufa pama papuh, eno paye aphu lono aphughilo wucheghi. Ghushimino tsumomo Simon pelo Jisu kros xapupe.

²² Panonguno Jisu sasu Golgotha ipi chekeu-alo saighi, tipa-a pesu “Akutsu boghe-a” ipi cheni.

²³ Tilehi panonguno akukhu-zu pesu aji lo lekite puzu pa tsu, ikemu Jisu no shotsumoe.

²⁴ Panonguno kros lo pa yedave puzu pa phiminiye panoqo dolono khuno kiu luke pu keno asaqhi bejuno kuphalukhave.

²⁵ Panonguno kros lo pa yeda kelo inaqhe ayi toku kihe ghuloki shi ae.

²⁶ Pa shou akipimi tsukeu ishi yepe qhipua, “Hiye Judami Kukau.”

²⁷ Jisu gholono kupukami kini, lakhino pa-u ajeu eno lakhino pa-u piyiu ishi kros lo yedae.

²⁸ [Hino kuchoyesulo ishi pipuakeu shikupuve, “Pa pesu alhoksami paphishi kihi.”]

²⁹ Tipau vechesu wuchekemino panongu kutsu kungu Jisu thaigha ghi pi, “Noye achineki xaleqhiveno ghulo kuthu lono ti shiveni kuau hu.

³⁰ Kros lono iqighiveno olikhi oxaluvelo!”

³¹ Tihutoi, achinetomi ngo Ayezah kutsuchekemiqo ghi pa thaigha ghi lakhino lakhi vilo pi, “Paye kutami xalu, ikemu pa likhi pa xamlae!

³² Israilmi kukau Mesiya pelo itehino kros lono iqighive julo, tishianguno ningu no pa pulunike!” Jisu gholo kros lo yedapuakemi ghi pa thaighakeu tsa pi.

Jisu Thivekeu

³³ Puchou ayi chighi kini kihelo aghakhuqha kumtsulo zumoive, tiye ayikihedo kuthu kutolo tishi ae.

³⁴ Avelau ayi kuthu kihelo Jisu no asutsa kumghashi igha, “Eloi, Eloi, lama sabaktani” tipau kiqiye, “ILhou, iLhou, noye kushiye iqhive ani kya?”

³⁵ Timi khami tile puthugho akeqono pano pikeu chilu puzu ishi pi, “Julo, paye Elija ku ani!”

³⁶ Panoqo gholo milakhino posu wuno aghushi lakhilo akiqhizu chhitoi putsuno aqhaqhi lakhilo tsada puzu pa pelo mutsu peniye tsu eno ishi pi, “Qelo, Elija no ighi puzu kros lono pa ikhiqhini kemo keno ninguno junie!”

³⁷ Jisu no asutsa vekipighi igha puzu suthauve.

³⁸ Achinekilo aphino kotha puakeu hu atsuqa lono abo kutolo ala kini shi suxuve.

³⁹ Ghushimi 100 shou akijeuno kros zulo puthugho ae eno Jisu ye kishi igha puzu thive keno ithulu puzu ishi pi, “Kuchouno timi hipauye Alhou Nue!”

⁴⁰ Tilehi totimi khami ghi putouno juae. Tipanoqo gholo Magdala noghami Maria ngo Jems ayitiu eno Jese pama paza Maria eno Salome ishi ae.

⁴¹ Panonguye Jisu no Galil lo achekelo pa gholo che eno pa kuphu cheke. Totimi kutami ghi kutomo tile ae, panonguye pa gholono Jerusalem lo iqhoghikemiqoke.

Jisu Qhovekeu

⁴² Tipani avelau Sabat tsala ghenguno kutope qhiveni keu shive.

⁴³ Ike Arimathia noghami Josef no ighi. Paye Judami Hoho lo kihikusumi lakhi eno kutamino qhoqhughi achekemi eno pa ghi Alhou yehkipe ighinikeu juachekemi, ikehu pano amlo kuloghishi puzu Pilat lau wuno Jisu sukumo khu.

⁴⁴ Pilat no Jisu ye thivea pikeu chilukelo paye akichiqhive. Pano ghushimi 100 shou akijeu kupuwu eno pa vilo Jisu ye mtsuqheyino thive akeo mokeno iniju.

⁴⁵ Kughou ghushimi 100 shou akijeu launo Jisu ye thivae pikeu Pilat no chilukeno Josef pelo Jisu sukumo pelupe nikeu pulovetsu.

⁴⁶ Josef no aphi kumtsha-kimiye lakhi qhu, eno Jisu sukumo kros lono ikhiqhi puzu aphino tipau hechije kuzuve eno ti suwo atuquqhalo akumoki chhupe puakeu lo qhive. Tishieno pano atu kije lakhi tukulu sawo akumoki ikulola hu nhave.

⁴⁷ Magdala noghami Maria ngo Jese paza Maria ngo ishino khea, eno Jisu sukumoye khile kutsuve keno jupepuave.