Mark 14 - BAIBEL (BSI)

Jisu Pithivenike Kumqu

¹ Hechekulu eno Kholaqhi sumokeu sho chukeu Ghulhu tonike atsala kiniae. Achinetomi ngo Ayezah kutsuchekemino kusuwuno Jisu kughaluveno pithivenikeu lah phuae.

² Panonguno pikeuno, “Aghulhu ghuloki lono shikepu kumoe, tishiaye timiqono mutomughuve nosake.”

Teli pesu Jisu Kutsu Nutsu

³ Bethani lo Jisu ye Simon apughakupuuno kilo wuakelo paye alibe chuniye iqae. Tile totimi lakhino alabastor bohulo amekusho tsungquyikeu teli pesu ighi. Lino abohu hu supho puzu tsungquyikeu hu Jisu kutsulo lepukutsu.

⁴ Ikemu tile timi akeqo khamino amloshimo puzu panoqo dolo ishi piae, “Kushiye teli tishi kilheve ani kya?

⁵ Teli hipauye ghuka 2000 me shi jepuzu kumlhomi tsukepu shiake.” Panonguno atotiu tipau lomipi.

⁶ Ikemu Jisu no pi, “Li lokutolo,nonguye kushiye li shipunaqhi ani kya? Liye akumla kivi lakhi ilau mlatsu anike.

⁷ Kumlhomiye nongu gholo pulhapuju ache nani, eno kughokughomu nonguno pulo aye panoqo lau akivi kumla shilu nani. Ikemu niye pulhapuju nongu gholo ananike kumoe.

⁸ Lino shiluke thaqhu shitsu ani. Lino tsungquyikeu teli pesu ishou lepuku tsu puzu ikumo qhomphi lono kishekulu shi kutovetsu ani.

⁹ Kuchouno ino nongu vilo pini, ayeghiqha kuchopulo khilekhilemu lokivipu-tsa pesu asheshu kelo li kumsumamokeu shighi lino kiu shitsukeno tipau piwo nani.”

Judas no Jisu Jevenike Pulove

¹⁰ Tile Judas Iskariot, akhopemi chighikini gholo lakhino Jisu kughape achinetomi vilo thechu shiveni aye panoqo lau wuve.

¹¹ Achinetomiye hipau vehu chiluno alokivi shive eno pisa pa tsunikeu kughape qhive. Ike Judas ye Jisu kughape thechu shive nike ghenguno adokivi phu auve.

Jisu no Pa khopemi sasu Hechekulu Libe Chu

¹² Kholaqhi sumokeu sho pesu aghulhu shikeu tsala atughiu lo Judamino Hechekulu libe ghenguno bheriti heqhi cheke tsalani, akhopemino Jisu vilo iniju, “Noye nipelo khile wuno Hechekulu libe chunike kutolo pikya?”

¹³ Tile Jisu no pa khopemi kini puwu eno pama vilo ishi pi, “Aphughilo wulo, tile timi lakhi no azubohu xapu cheghi keu nokujo sasu kusholu nanike pa papewu lo.

¹⁴ Pano ilovekeu kiampiu vilo ishi pilo, ‘Kutsuchekeuno ishi pike, Ino ikhopemiqo sasu Hechekulu ghulhu shikepu chebo khile ani kya?’

¹⁵ Tileno pano aki kungu jolha lakhi thwokha kupukulayi kutopuakeu nokujo piye nani; tilehi ningu ghenguno kutope aghilo.”

¹⁶ Akhopemi pamano aphughilo ighi, eno Jisu no pama vilo pipuakeu toi thwokha tishi aghikeu phulu; eno pamano Hechekulu libe kuto.

¹⁷ Kijiliu shive kelo, Jisu no pa khopemi chighikini sasu ighi.

¹⁸ Panongu iqano chuakelo Jisu no ishi pi, “Kuchouno ino nongu vilo pini, nongu gholo milakhino ikughape thechu shive nani, igholo chuakemi lakhinoke.”

¹⁹ Akhopemi qoye amlokusa shive, panongu lakhi khino Jisu vilo ishi iniju, “Ino kumokema?”

²⁰ Jisu no panoqo vilo pi, “No chighikini gholo milakhino tishi nanike, isasu akhu lakhilo kumtsa asho putsu chu akeu hunoke.

²¹ Kughengu ni Timi Nu ye kuchoyesulo pa ye kishive nani keno pipuakeu toi thive nani, ikemu timi khuuno ni Timi Nu kughape thechu shiveni keno timi tipau ghenguno ahae! Timi tipau ghenguye pa punumokeu pavi nicheke!”

Ampeu Ghulhu

²² Panonguno chuakelo, Jisu no asho ikhilu eno shikimithikeu kighini inikhu, tipau supho, eno tipau pa khopemiqo tsu, eno ishi pi, “Hi ikhilulo, hiye iphimpike.”

²³ Tisheno, pano ajukhu ikhilu eno Alhou shikimithitsu, eno ti ikhipuwo panoqo tsu, panongu kumtsu tipaulo akeu sho.

²⁴ Jisu no panoqo vilo pi, “Hiye timi kutomo ghenguno peletsukeu ihjike, Alhou wu puloshoqhi kimetsukeu ihji ke.

²⁵ Kuchouno ino nongu vilo pini, Alhou yehkipe lono atsayiji akitheshi shonike tsala kutolo niye itaghi khilemu hi shomo nani.”

²⁶ Tithiu panonguno ale lakhi pheveno panongu ye Oliv to lo wuve.

Pitor ghili Azunatha ghi Pitsu

²⁷ Jisu no panoqo vilo pi, “Nongu kumtsu ipheve nani eno ilikhi qhive nani; kughengu kuchoyesulo ishi pipuani, ‘Ino bherikheu ghaqhi nani, eno bheriqoye apanagha kohave nani.’

²⁸ Ikemu ixuputhuve kethiuye, ino nongu zuuno Galil lo wuni.”

²⁹ Pitor no pi, “Kumtsuno oqhive namu niye khilemu ophemoe.”

³⁰ Jisu no Pitor vilo pi, “Kuchouno ino ovilo pini, itiji awuduno ghuthu akiniu ighamphi lono noye ghuthu kuthu imthakepi pi nani.”

³¹ Ikemu Pitor no tsumomo pi, “Niye ogholo thivekepu shiepinamu, khilemu omthake pimoe.” Akhopemi kumtsuno tishi pikhae.

Gethsemen lo Inikhu

³² Panonguno a-a lakhi Gethsemen ipichekeulo ighikelo, Jisu no pa khopemi vilo pi, “Ino akighini shi akelo, hile iqa aghilo.”

³³ Tishino pano Pitor, Jems eno Johan pano kuthu sasu wue, paye amlokusa eno amlo-kughujuno shishe ime thuve.

³⁴ Pano pano kuthu vilo ishi pi, “Niye thivenikeshi imlo shishe ime ani! Hile ngolo eno jukutolo.”

³⁵ Pano tileno chesu kitila wupuzu ayeghilo itsaqino, inikhu; “Shikulupushi aghi aye,aghime tuqhudo hu ilauno ikhipewuve tsu nima?”

³⁶ Pano ishi inikhu, “Apuo, o iPuo, noye thwokha kumtsu shikulupue, aghime jukhu hipau ilauno peuve tsulo, tishimu ipulou kumono opulou shilo!”

³⁷ Pano ideghi kelo pano kuthuye zucheyi aghive, ikelo pano Pitor vilo pi, “Simon, noye zuani kesha?” Noye asuchedo lakhimu jukuto khemla kesha?

³⁸ Eno panoqo vilo ishi pi. “Tsukhuyi khealo eno inikhulo, tishianguno nonguye ghukujulo ikiqivemo nani. Aghungu ye puloniqhiyi ani ikemu ashi ajiye qei-nai ani.”

³⁹ Itaghi pano wuve puzu inikhu eno puzuu pikeu toi pi.

⁴⁰ Itaghi pano ideghi kelo panoqoye zuaghi, kughengu panongu nhethiye kuma-kumayi ae, eno panonguye pa vilo kiu khochile kepu kela mtha.

⁴¹ Pano akuthuu ideghi kelo, ishi panoqo vilo pi, “Nonguye itehi kuto zuani eno nongu kulhoqhi ani kesha? Tino lumkhae, atuqhudo hu ighivae. Julo, ni Timi Nu ye axinemi ulo thechu shisuvae.

⁴² Ithulo, ningu chejuni, julo, ikughape thechu shivekeu hu hi cheae!”

Jisu Kughaluvekeu

⁴³ Jisu no atsa pi aphi lono Judas ighive, paye akhopemi chighi kini gholo lakhi. Achinetomi ngo Ayezah kutsuchekemi eno Muchomiqono timi aqo lakhi puwukeqo huno azuta ngo asuthalu pesu Judas gholono ighi.

⁴⁴ Ike thechu shiakeu huno timiqo vilo amchipu lakhi hi tsupua, “Ino timi khipau mumani keno timi tipau huke. Pa kughaluvelo eno pa kheputu sasu wuvelo.”

⁴⁵ Judas no ighi kemtsa, Jisu lau wuno ishipi, “Kutsuchekeu!” ipi puzu Jisu muma.

⁴⁶ Ikehu panonguno Jisu kughaluve eno mtotoi pa tsuquluve.

⁴⁷ Ikemu tipa phivilo puthugho akemi gholo lakhino pa zuta sujophe pesu achine tou qeu shou ghipuku eno akini kusavetsu.

⁴⁸ Jisu no timiqo putsa ghi tipi, “Niye kupukami toi nonguye kushiye azuta ngo asuthalu pesu ikugha eno itshuluniye ighi ani kya?

⁴⁹ Ghulo atsu-tsu niye nongu gholo achinekilo kutsu acheni, eno nonguye ikughalumoe. Ikemu kuchoyesulo yepuakeu shikupuve masae.”

⁵⁰ Akhopemi kumtsuno pa qhiveno pokhave.

⁵¹ Apumi lakhiye heku-uphi lakhi heu puzu Jisu papeche. Panonguno apumi hu tsuqu,

⁵² ikelauye pawu heku-uphi qhiveno aphi kumsa pove.

Judami Hoho zulo Jisu sawu

⁵³ Panonguno Jisu sasu Achinetou kilo wu, tilehi achinetomi muchomi, Ayezah kutsuchekemiqo kuhokumqo ae.

⁵⁴ Pitor ye putou no Jisu papesu Achinetou kughaki kikhalalo ilo. Tile paye aghukhemi gholo iqa eno ami pugha ae.

⁵⁵ Ike achinetomi ngo Ahohomi kumtsu no Jisu pithiveni aye pa nguku nikemi phua; ikemu panonguno lakhimu phumlae.

⁵⁶ Timi kutomono akimki tsa pesu Jisu nguku ae, ikemu panonguno pikeu tsa lakhimu aphiphi kumoae.

⁵⁷ Tile timi khamino puthughono Jisu nguku ghi akimki tsa hipau pi,

⁵⁸ “Pano ishi pikeu ninguno chilue: ‘Timino mlapuakeu chineki hipau ino hephopinyiveno, atsala kuthu thiu, timi no shimokeu kutau lakhi shiqhive nani.’ ”

⁵⁹ Ikemu panongu ghi panongu tsalo aphiphi shimlave.

⁶⁰ Achinetouno panongu mtalo puthughono Jisu iniju, “Noye onguku akeulo khochilekepu kuha kesha?”

⁶¹ Ikemu Jisu no inaqhoive eno kiumu khochilemo. Itaghi achinetouno pa vilo iniju, “Noye Alhou akumghau Nu, Mesiya kesha?”

⁶² Jisu no pi, “Iye, nike; eno nonguno ni Timi Nu huye Akughushu Lhou u-ajeu iqa akeu eno kungu-u khungkusu lono ighikeu ithulu nani.”

⁶³ Achinetouno pa phikuzu suxuve eno ishi pi, “Ninguye thopimi kutau kiumu avehupu shimae!

⁶⁴ Pano Alhou shou kixikilatsa pikeu chiluvae. Nonguye kishivenipi kumsu ani kya?” Panongu kumtsuno paye thivekuzupu kepi pa kileqhi auve.

⁶⁵ Panoqo gholo khamino Jisu shou musutepuku, eno pa nhethi khavetsu puzu pa ghaqhi eno pa vilo ishi pi, “Khuno ohe anikela pijulo!” Aghukhemino pa sawo ghaqhi.

Pitor no Paye Jisu mthae Pikeu

⁶⁶ Pitor no kughaki kikhala qhou akelo, achinetou qelimi lakhi ighi.

⁶⁷ Pitor no ami pugha aghikeu ithulukelo lino pa ju puzu pi, “Noghi Nazaret noghami Jisu gholo cheke.”

⁶⁸ Ikemu pano tiye kuchou kumoe pive. Pano pi “Niye mthae momu nono kiu pi anikela kitilamu vethaluamoe.” Paye ikipe la kudau wuve. Tipa mtsa awuduno igha.

⁶⁹ Aqeliu huno tile pa ithuluno tile puthugho akeqo vilo itaghi ishi pi, “Timi hipauye panoqo gholo lakhie.”

⁷⁰ Ikemu Pitor no tiye kuchou kumoe pive. Ado kitila thiu tile puthugho akeqono Pitor vilo pi, “Mtsuqheyino noye panoqomi gholo lakhie kughengu nonguye Galilmike.”

⁷¹ Ikemu Pitor no pa likhi pa ghusho eno ishi tushoqhi, “Nonguno timi khuu piani kela niye timi tipau mthae.”

⁷² Tipa mtsa awuduno ghuthu akiniu igha. Pitor vilo kishi Jisu no pipuakeno kumsuchilelu. “Awuduno ghuthu kini ighamphilo noye ghuthu kuthu kutolo imthae pi nani.” Pano kunotshutshushi qa.