Luke 7 - BAIBEL (BSI)

Jisu no Kijemi qeu Shipivi

¹ Kughou Jisu no hipaqo vehu kumtsu timi vilo pikepu shi akeu pikhave keno, paye Kapernaum lo wuve.

² Tilehi Rommi kijemi lakhino aqeu lakhi ae, tipau pano ighono kimiye cheke, tipau thiveni keshi su aghive.

³ Kughou akijeu no Jisu ghili chilukeno, pano Judami muchomi khami Jisu lau puwu eno pa vilo ighi puzu pa qeu shipivi penike iniju wupe.

⁴ Panonguno Jisu lau ighino tsuikhomo pa qhuiniju: “Timi hipauye okukuphu ithulu kuzupu shi anie,

⁵ kughengu pano ni shiayeh kimiye cheni, eno ningu ghenguno Sinagog lakhi shitsue.”

⁶ Ike Jisu no panongu sasu wu. Pano aki kupununi chekelo akijeu huno pa kusami hape Jisu vilo pilopi puwu: “Akijeu, oghime kevilo opelo iki sheqholo iloghi penikeu niye akuzupu kumoe;

⁷ momu ni ampino olau ighi nikeu ghi akuzupu kumoe. Ikemu atsauno pivetsulo eno iqeuye viluve nani.

⁸ Nighi akuchuqu kijemino pipuakeu qholo akemi lakhi, eno igholo ghushimi iqhou akhani: milakhi vilo ino ‘Wulo’ ipiaye pano wu cheni; eno lakhiu vilo, ‘Ighilo’ ipiaye pano ighi cheni; eno iqeu vilo, ‘Hi shilo,’ ipiaye pano ti shi cheni.”

⁹ Kughou Jisu no ti chilukeno akichiqhive, pano tsughu idewo aqo- kitikhi pa papechekemi vilo pi, “Ino nongu vilo pini, Israil lomu hitoikeu kupulu niye phumla aphie.”

¹⁰ Kughou hapuwu keqono akijeu kilo ideghi keno pa qeu vive aghikeu ithulu.

Jisu no Chimemi nu Xaputhu

¹¹ Tishiwo thoghiu Jisu no Nain pikeu phulo wue; pa khopemi ngo aqokitikhi pa gholo wue.

¹² Pano aliwo khagholo ighi kemtsa kithimi lakhi khapesu ipe cheghi. Akithiu huye topumi nu lakhi likhi akeuke, liye chimemi eno aphulomi aqokitikhino li sasu ae.

¹³ Ampeu no li ithulu kelo li kimiyeqhiyi keuno pa mlo chhitoiveno li vilo pi, “Qa kevilo.”

¹⁴ Eno pano wu puzu akumobo bue, eno khape chekemiqono inaqhoi puthughove. Jisu no pi: “Apumi! Ino ovilo pi ani, ithulo!”

¹⁵ Akithiu huno ithu iqa eno atsa timi putsa wuve; Jisu no pa za lau saghitsu.

¹⁶ Panongu kumtsu akuighuno chhitoive, eno panonguno Alhou sheqhe gh0i pi: “Tungkupu kije lakhi ningu gholo ipeghivae!” eno “Alhou no pawu timi xalunike ighi anie!”

¹⁷ Jisu ghili hipau Judia qha kumtsu eno tipa lughi sukumxa kumtsu vekuphave.

Johan Baptist ghini Kishimi

¹⁸ Johan papemino hipaqo vehu kumtsu pesu pa vilo pi. Johan no pa papemi kini kuno

¹⁹ Ampeu iniju penike pama puwu, “Ti ighiniepi chekeuhu, no kema? Ikeo ninguye kutami khe aghini kya?”

²⁰ Pamano Jisu lau ighi eno pi; “Johan Baptist no iniju lopi ni puwue, ‘Ti ighiniepi chekeuhu, no kema? Ikeo ninguye kutami khe aghini kya?’ ”

²¹ Tipa tuqhudolo kusukini, ghicheghime eno tughakusa akeqo kutomo shipivitsu, eno anhechemi kutomo ithukulupu tsue.

²² Pano Johan khopemi vilo khochile pi: “Idewono Johan vilo nonguno kiu ithuluvea eno chiluvea keno pilo: anhechemino ithulu ani, apukhu kighichemino chewulu ani, apughami shikimthelu ani, kithimi puxuve ani eno Asutsa Kiviu pe kumlhomi lau asheshulu ani.

²³ Iju pesu lipi mokemi kumghae.”

²⁴ Johan ghinikishimi wove kethiu, Jisu no Johan ghili aqokitikhi vilo pithu: “Nonguye kiu juniye yenguyike alo wukya? Amlhuno ayeghu fukinikeu keo?

²⁵ Maye, nonguye kiu juniye wu kya? Timi lakhi muduni keu phi mini ukeu keo? Julo, khunono titoikeu phimini uni eno nibonile xu ani keno akighekilo aghi cheni.

²⁶ Ikemu nonguye kiu juniye wukya? Tungkupu lakhi keo? Iye, ino nongu vilo pi ani nonguno ithulu puakeu huye tungkupumi nguno alaue.

²⁷ Johan ghenguno kuchoyesu no ishi pi, ‘Julo, ino ighinikishiu ozulo puwu ani, pano ozulo alaghi kutope aghi nani!’

²⁸ Ino nongu vilo pi ani, totimino punukemi gholo Johan nguno akijeu kuhae; ikemu Alhou yehkipe qholoye aghulou shiaghikeu mu Johan nguno akijeue.”

²⁹ Timi kumtsu eno akhotono zahme kuqhamino pa tsa chilu; panonguye Alhou mikuchono ighiju akeulo aghokulumi shie eno Johan pelo baptiz shitsupe.

³⁰ Ikemu Farisimi ngo Ayezah Kukutsumiye panongu ghenguno Alhou pulou akeu eno Johan no baptiz shitsunikeu milive.

³¹ Jisu no highi pi, “Itehi niye hipa tiqhelimiqo pesu kiu sasu kimighi tsuni kya? Panonguye kiu paphi kya?

³² Panonguye alhikishi alo itimino ghava shi ili ake hutoi. Aqo lakhino kutami vilo ighaghi, ‘Nino nongu ghenguno akukulalo le pheke, ikemu nonguno ilhe moe. Ninguno akumo qhokelo le pheke, ikemu nonguno qah moe!’

³³ Johan Baptist ighi, pano kumvu eno aji mu shomoe, eno nonguno pi, ‘Paye mbomzumi lakhi!’

³⁴ Timi Nu huno ighino chu shoe ikeghi nonguno pi, ‘Timi hipau julo! Paye akimihemi eno aji kumxomie eno zahme kuqhami ngo axinemi kusaue!’

³⁵ Tishimu, Alhou wu alokutsu ikhilukemi kumtsuno tiye achipiepi ithike.”

Jisu no Simon Farisiu kilo Wu

³⁶ Farisimi lakhino pa sasu ilhupeniye Jisu kusu. Jisu no pa kilo wuno chuniye ngoa.

³⁷ Julo, aphughi tipaulo axine shikichemi totimi lakhi ake, kughou Jisu ye Farisimi kilo kuchukusho shi anipi chilu keno, lino atu hughi kichhi axokutsungu teli pesu ighi,

³⁸ eno Jisu thiu puthugho, pa pukhu philo qa ghi eno li nhezuno Jisu pukhu putsaghi ae. Tishieno akutsusa pesu pa pukhu isuputhotsu; axokutsungu lepukuno nutsue.

³⁹ Jisu kusukeu Farisimi huno ti ithulu kelo pa likhi pa vilo ishi pia, “Timi hipauno tungkupu lakhi ke aye, totimi pa bu akeuye khuu eno kiu toikemi keno paye ithikepuke, kughengu liye axine shichekemi lakhie.”

⁴⁰ Jisu no pa putsa ghi pi, “Simon, niye ovilo kiuala pikepu shi anie.” Tile pano khochile pi, “Kutsuchekeu, kiu kela pilo.”

⁴¹ Tile Jisu no pi, “Pisa kupunami lakhino api kupumi kini ake, lakhino ghuka 500 pi eno lakhino ghuka 50 pi puae.

⁴² Pama lakhinomu lochilekulupu shimove, ikehu pano pama pi qhi khavetsu. Pama dolo khikhiuno pa kimiyekeu alau anikya?”

⁴³ Simon no khochile pi, “Ino kumsujukelo, khikhiu pachi qhivetsu keno pa shiaghi kepue.” Jisu no pa vilo pi, “Noye achipi lono khochile vae.”

⁴⁴ Tithiu pano atotiu kidiu tsughu ighino Simon vilo pi: “Noye totimi hipau ithulu anima? Ino okilo iloghikelo noye ipukhu kuqhupu ghenguno azu itsu moe, ikemu liye li nhezu pesu ipukhu qhuvetsua eno li sa pesu hipaqo isuvetsua.

⁴⁵ Noye mumakeu itsumoe, ikemu liye ino ighi kelono ipukhu mumakeu tave mphie.

⁴⁶ Noye teli pesu ikutsu nutsu moe, ikemu liye axokutsungu pesu ipukhu nutsue.

⁴⁷ Tighenguno ino ovilo pini, li xine akeu kutomo pevetsua kehu lino kikimiye pephe anie; ikemu khuno lau kitila likhi qhitsua keno, kikimiye kitila likhi pephe anie.”

⁴⁸ Jisu no li vilo pi, “Oxineqo pevetsuae.”

⁴⁹ Kutami tile ngo akeqono panongu dolo ishi pia, “Hiye khuu keno axine thotsu pevetsulu kya?”

⁵⁰ Pano atotiu vilo pi, “Okupuluno oxaluvae, aloino wolo.”