Luke 4 - BAIBEL (BSI)

Jisu Ghukuju

¹ Jisu ye Aghungu Kimthe no chhitoi puzu Jordan lono xaideghi, eno Aghungu no aghasalo sawuve,

² tilehi atsala lhobidi dolo paye Tughamino ghuju ae. Tipa dolo paye kiumu chumoe eno kughono hipaqo ashekha shive keno paye mzuthive.

³ Tughami huno pa vilo pi: “Nono Alhou Nu keaye, atu hipau ahza tsuno asho kughulhovelo.”

⁴ Jisu no pa khochile pi: “Kucho yesulo ishi yehpuani, ‘Timi ye achuqupu ghengu likhino xulu chemoe.’ ”

⁵ Tughamino pa sasu kunguu wuve eno anhekutsu khavi lono ayeghi wu akukaqha kumtsu pa piye,

⁶ eno pa vilo pi, “Ino hipaqo kuka eno ajukuvu kumtsu pe otsuvenie, kughengu hiye ikhiphepe itsu puani eno ino khu khumu tsunishikeu tsuluvi.

⁷ Nono itsaqi imlla aye hi kumtsu owu shive peni”

⁸ Jisu no pa khochile ghi pi: “Kuchoyesulo ishi yepuani, ‘Noye Ampeu oLhou mllalo eno pa likhi huthulo!’ ”

⁹ Tithiu Tughamino Jerusalem lo pa sasu wu eno achineki kutsuqalo pa kughuqa, eno pa vilo pi: “Nono Alhou Nu keaye, olikhi okutoshi hileno ilheqivelo.

¹⁰ Kughengu kuchoyesulo ishi yepuani, ‘Alhou no kungumi hapesu otucholuvepe nani.’

¹¹ Itaghi ishi pipuani, ‘Panongu uno okhapeluvepe nani, tishikeu lono atu shou opukhu kutsusuluno sakehu.’ ”

¹² Jisu no pa khochile, “Kuchoyesu lono pi, ‘Noye Ampeu oLhou ghuju kepu kumoe.’ ”

¹³ Kughou Tughamino thwokha la lono Jisu ghuju tave keno pano ado kivi ithulu moke kuto pa pheve.

Galil lo Jisu Kumla Huthu

¹⁴ Tithiu Jisu ye Galil lo ide ighi, eno Aghungu Kimthe kuka pa gholo ae. Ike pa ghiliye tipa sukumxa kumtsu vekuphave.

¹⁵ Pano panongu Sinagog qolo kutsu eno kumtsuno pa sheqhe.

Nazaret lo Jisu Milive

¹⁶ Tithiu Jisu ye pa saputhu keua Nazaret lo wu eno apineni pa lhoayehlo shichekeu toi Sinagog lo wu. Pano kuchoyesu phiniye puthugho.

¹⁷ ike Isaya tungkupu kaku ikhipe pa tsu. Pano likukuzu kaku lhaphe kelo hi yepuaghikeu ithulu:

¹⁸ “Ampeu Ghungu ishou ani, Asutsa kiviu kumlhomi lau asheshu penike pano teli pe ni nukishetsue, Akughumi lau khakiqhi kutughu penike, eno anhethi ichekemi lau ithukulupu sughi penike ipuwue. Nedaqoda puakeqo phepuwu penike ipuwue.

¹⁹ Eno Ampeu no pawu timi xalunikeu mipe pithi penike ipuwue.”

²⁰ Jisu no kaku hu likuzuveno akheu tsuchileve puzu iqave. Sinagog lo akemi kumtsu panongu nhethi sukuqumono pa jua.

²¹ Pano panongu vilo pithu: “Hi phisukeu nonguno chiluke toi, kuchoyesu tsajo hipau ishino shikupu anie.”

²² Eno kumtsuno pa shepekeu shie eno pa kichi lono kupukini tsa pikeulo akumzaqhiyive; eno panonguno pi: “Hiye Josef nuke kumo kesha?”

²³ Pano panongu vilo pi: “Mtsuqheino nonguye ivilo hipau tsa pi nani,’Shikipiviu, olikhi oshipivivelo’ eno ‘khipaqo Kapernaum lo shiepi ninguno chilukeno, nophu yina hilehi ghi tipaqo shilo!’ ”

²⁴ Pano pi: “Kuchouno ino nongu vilo pini, tungkupmi lakhiye pano phuyina loye pa ikhilu chemoe.

²⁵ “Ikemu kuchouno ino nongu vilo pinikeuye, Elija ghulokilo Israil lo topuchimemi kutomo ache kelo ampe kuthu aqhi tsugho ghumove kehu eno ayeghi kumtsulo puqumiye kije ave;

²⁶ tishimu Elija ye panongu lakhi laumu puwu moe, ikemu Sidon yeghilo Zarefat phulo topuchimemi lakhi lau likhi puwue.

²⁷ Elisha tungkupu ghulokilo Israil lo apughami kutomo ake, tishimu Siriami Naman thono kutami lakhimu shikimthe tsumoe.”

²⁸ Panonguno ti chilukelauye kumtsuno amlo ide keuno chhitoive.

²⁹ Panonguno ithuno pa sunhe sasu aphughi lono ipeve, eno panongu phughi shikeu toghi nhekikhi lo pa sawu, eno pa kughape atuxulo kulusuniye shie.

³⁰ Ikemu pano panongu puxusu pa lalo chesu wuve.

Tughakusa Akemi Lakhi

³¹ Tithiu paye Galil lo Kapernaum phulo iqive eno apineni timiqo kutsue.

³² Panonguye pa kukutsulo akichiqhive, kughengu pa tsalo akuka ae.

³³ Ike Sinagog lo tughakusa ghungu sa-akemi lakhi ae eno pano asutsa vekipighi ighamuku pi:

³⁴ “O Nazaret no ghami Jisu, noye ni pelo kishive peniye kya? Noye ningu kutsanike ighi ani kesha? No khuu keno ino ithi ani, noye Alhouw Akimtheu Lakhi ke.”

³⁵ Ikemu Jisu no pa lomipi; “Inaqhoi velo! eno pa launo ipeghivelo.” Tughakusano panongu zulono timi hu sunhekuluqhive ikemu kiumo ghime mono pa launo ipeve.

³⁶ Timi kumtsu akichiqhiveno lakhino lakhi vilo pi, “Hiye kiu shivetsu anikya? Kughengu pano akuka lono tughakusa ghungu ahza tsu kelo panonguno ipevae.”

³⁷ Jisu ghili kughakeuno tipaqha kumtsulo vekuphave.

Jisu no Kutomo Shipivi

³⁸ Sinagog lono ipe kethiu Jisu no Simon kilo ilo. Simon paniye mqhomzai aghamiki aghi eno timiqono li ghenguno Jisu vilo pi.

³⁹ Pano ighi eno li phivilo puthugho puzu aghakimki lomi pi eno tino li qhive. Paikhavi lono liye ithughi luve eno panongu lamlue.

⁴⁰ Avela shivekelo timi ajeli kusu lono su akhakemi panonguno pa lau saghi. Pano lakhi khi shou pa- u be eno panongu shipivitsu.

⁴¹ Tughami ghi timi kutomo launo ipeghino ighae, “Noye Alhou Nu ke.” Ikemu Jisu no panongu lomi pi eno panongu pelo atsa pipemo, kughengu tughamino paye Mesiya kepi ithiakehu.

Jisu no Judia lo Asheshu

⁴² Atsala ipeghi kethiu Jisu ye cheve eno yenguike alo wuve; ikemu aqokitikhino pa phujua. Panonguno pa lau ighi eno panongu qhivepemo niye pukaputsa pa sasu ngoe.

⁴³ Ikemu pano panongu vilo pi, “Niye Alhou yehkipew Asutsa Kiviu aphu kutau loghi asheshu masa. Hipau ghenguno ipuwu puani ke.”

⁴⁴ Eno paye Judiaw Sinagog lo asheshu wue.