Luke 24 - BAIBEL (BSI)

Xuchilethuve

¹ Totimiqoye tughakhani inaqhe itheno axokutsungu kutope puakeu pesu akumokilo wue.

² Akumoki hukikha tuqu hu tukulove aghikeu panonguno ithulu.

³ Tighenguno panonguno vejoi alou ilo, ikemu panonguye Ampeu Jisu sukumo phumlave.

⁴ Panonguno highenguno avehu izu akelono paikhavi lono timi kini yevuqai keu phi upuzu panongu phivilo puthughoe.

⁵ Panonguye thughuyive eno itsaqive, ikemu timi pamano pi, “Kushiye kithimi gholo kuxumi phuju chenia?

⁶ Paye hile kuhae; paye ithuvae. Pano Galil lo aphi lono nongu vilo kiu pikeno kumsuchile julo.

⁷ ‘Timi Nu ye kros lo yedave eno akuthunilo xuithuve penike axinemi ulo suvetsu, masae!’ ”

⁸ Tithiu totimiqono Jisu tsaqo kumsuchileluve.

⁹ Panonguye akumoki lono ideghino hipaqo kumtsu akhopemi chighi qhaqhi vilo eno kutami kumtsu vilo pi.

¹⁰ Totimiqo ye Magdala lono ighikeu Maria; Joana ngo Jems paza Maria panongu gholo totimi kutamiqo ishino apostolmi vilo pike.

¹¹ Ikemu apostolmiye totimiqono pikeu akiqi kuhamithekeu shi kumsuno panongu tsa pulumoe.

¹² Pitor ye posusu akumokilo wue. Pano itsaqino jukelo akumo chijekeu phi thono kutau kiumu ithumlae. Tithiu paye akilo idewove eno kishino ishive kelapi akumza qhiyive.

Emaus Lalo Chekelo

¹³ Tipani panongu dolo mikiniye Emaus phulo wuche. Emaus ye Jerusalem lono kilomiter chighiqhaqhi shia.

¹⁴ Pamaye lakhino lakhi vilo Jerusalem lo kiu shiveakeno kumtsu lhekileche.

¹⁵ Pamano kuptsa kugha chekelo, Jisu ampino pama kupunu ighi eno pama gholo cheche wuve.

¹⁶ Pamaye pa ithulu, ikemu kishikela mthano Jisu kepi michimla.

¹⁷ Jisu no pama vilo iniju, “Nokujoye alalo chechekelo kiu tsa kutsalakile chenikya?” Pamaye agi khummuyi inaqhoi puthughove.

¹⁸ Pama dolo Kleopa ipikeuno pa iniju, “Jerusalem lo akemi dolo olikhino ishi dolo kiu shiakela mtha ketoino kwa?”

¹⁹ “Kiu keno?” ipi pano iniju. “Nazeret noghami Jisu kiu shivekela wa,” ipi pamano khochile. “Timi hipauye tungkupmi lakhike, Alhou zulo eno timi kumtsu zulo paye atsalo pina akumlalo pimu mishisheyi kemie.

²⁰ Niwu kishekiphe achinemi eno ayehkipemino pa ikhiphepe pithive nikeu shiveno panonguno kros lo pa yedave.

²¹ Ikemu nino laju achekeuye pano Israilmi xachileluni chekeu shiake! Tinguno alauno ti shivekeu ishi kuthu shi ani,

²² eno totimi khami nigholo akeqono ni-shithughuyi puani. Panonguye inaqhe zughuyi aphi lono akumokilo wue,

²³ ikemu pa sukumo phumlaveno ideghive eno panonguye kungumi sholuepi. Eno kungumino panongu vilo paye xuaphiepi pikeu pi ighi.

²⁴ Niqomi khami ghi akumokilo wue eno totimiqono pikeu tiye thwokha kumtsu tishi aghiepi, ikemu panongu ghi Jisu ye ithumlae pike.”

²⁵ Tileno Jisu no panongu vilo pi: “Nonguye kiutoi mbomzu kela; tungkupmi kumtsuno pivekeghi nonguno pulu lunikeu kiutoi qei kela!

²⁶ Alhou no Kishephe puwukeu Mesiya ye hipaqo ime kupuno pawu ajukuvulo ilonikeu shike kumokesha?”

²⁷ Muse kakuqolo eno tungkupmino yehpe puakeqo kumtsu lono huthu susu Kuchoyesu kumtsulo pa ghili pi puakeu Jisu no chixechilei pama vilo pi.

²⁸ Khipa phulo pamano wuchekeno tipaphu kupunu ighive eno Jisu no itaghi chekithethu shinike hutoi shi,

²⁹ ikemu pamano pa hachileghi pi: “Atsala ghi tsuzuva, eno zumoi wocheake nigholo ngovelo.” Tighenguno pano pama gholo ngonikeu shi wue.

³⁰ Kughou pama gholo chuniye ngokelo Jisu no asho ikhilu eno kumghakeu khuvekethiu asho suphono pesu pama tsu.

³¹ Tileno pama nhethi xukhove eno pamano pa michiluve, ikemu paye pama nhekithe lono hauve.

³² Pamano lakhino lakhi vilo pi, “Kughou pano alalo ni putsa eno Kuchoyesu chixechilei nivilo pikelo ni-mlolo ami iqukeshi ighike kumokesha?”

³³ Pamano ngomono ilhethuve puzu Jerusalem lo cheide ighi. Tile apostolmi chighi qhaqhino kutamiqo sasu kuho kumqo aghi.

³⁴ “Kuchouno Ampeu ye ithuvae! Simon no pa ithuluvae!” ipi aghikeu phulue.

³⁵ Tile pamano panongu vilo alalo chekelo kiu shikeno eno kughou asho supho kije akelo pamano kishi Ampeu michilu keno chixechilei pie.

Jisu no Akhopemi lau Ipeghi

³⁶ Pamano hipau pesu panongu vilo pi aphi lono, paikhavino Ampeu no panongu gholo puthugho aghiveno panongu vilo pi, “Alokiqi nongu gholo alo.”

³⁷ Panonguye akichiqhi msaveno aghahwu ithulu ani kughashive.

³⁸ Ikemu pano panongu vilo pi, “Nonguye kushiye thughui ani kya? Nongu mlolo kushiye ‘Hiye khuu kela?’ ipi ani kya?

³⁹ I-u eno ipukhu julo eno nike kughengu nonguno ni ithulu ake toi aghahwuye aphimpi puaghi chemoe.”

⁴⁰ Hi pi puzu pano pa-u eno pa pukhu panongu piye.

⁴¹ Tishimu panonguno alokivi launo eno akumza kelauno pulu mlano auve kehu pano panongu vilo pi, “Hile kiuala chukepu ani ma?”

⁴² Panonguno akha ghuvekeu aleqhi lakhi pa tsu,

⁴³ pano tipau ikhilu puzu panongu nhekithe lono chuve.

⁴⁴ Tishino pano panongu vilo pi, “Ino nongu gholo aphi lono hipaqo kumtsu nongu vilo pivae!Muse yezahlo,Tungkupmino yehpe puakeulo,eno Leshele lo Ighili yehpe puakeu kumtsu shikupu masae.”

⁴⁵ Tishino kuchoyesu ithikuthulu penike pano panongu kukumsu lhaphetsuno

⁴⁶ panongu vilo pi, “Ishi yeh puani: Khristo ye ime puzu akuthuni akithi lono xuthumasae.

⁴⁷ Eno paje lono xukidekeu, axine pevetsukeu sutsa ashiayeh kumtsu lau Jerusalem lono huthu tughu shino asheshu masae.

⁴⁸ Nonguno hipaqo vehu thopimi shinikemiqoe.

⁴⁹ Julo, ipuno kiu piqhi puani keno ino nongu shou puwuni. Ikemu kunguuno akuka nongu shou ighi mphi kutolo nonguye aphughilo ngokhe aghilo.”

Jisu Kungughalo Sakuve

⁵⁰ Tithiu pano panongu sasu Bethani kutolo ipe puzu pau chhope panongu kumghatsu.

⁵¹ Pano panongu kumghatsu aphi lono, paye panongu launo kututa shive eno kungughalo sakuve.

⁵² Panonguno pa mllae eno shishe alokivishi Jerusalem lo idewove,

⁵³ eno ado kumtsu tamo puzu achineki lono Alhou shikimthi ae.