Luke 22 - BAIBEL (BSI)

Judas no Jisu Thechu Shivenikeu

¹ Kholaqhi sumokeu sho pesu aghulhu shichekeu, Hechekulu ipi chekeu ghulhu kupunuve.

² Achinetomi eno Ayezah kukutsumino kishieno Jisu pithiveni keno alaghi hami pukaputsa phua, kughengu panonguye timiqo msave.

³ Tileno Satan no Judas, Iskariot ipi pichekeu lolo ilove. Paye akhopemi chighi kini gholo lakhi.

⁴ Ike Judas no wupuzu achinetomi eno achineki khemi shou akijeu sasu kishieno Jisu thechu shipesu panongu ulo suvetsuni kela kuptsave.

⁵ Panonguye alokivi shive eno pisa pa tsunikeu shi kughave.

⁶ Ike Judas ye tipaulo pulove ipuzu aqokitikhi kukuha lono Jisu thechu shive nike adokivi phu auve.

Jisu no Hechekulu Ghulhu chuniye Kuto

⁷ Kholaqhi sumokeu sho ghulhu ghulokilo Hechekulu Ghulhu ghenguno bheritiqo ghiqhi chekeu tsala ighive.

⁸ Jisu no Pitor ngo Johan pama vilo piputo ghi puwu: “Nokujoye wu puzu ninguno chukepu shi Hechekulu Ghulhu kutolo.”

⁹ Pamano iniju, “Noye ningu vilo khileno kuto aghilo pi kya?” Pama vilo pano pi:

¹⁰ “Julo, nokujo no aphughilo ilo kethiu timi lakhi azubo hughi xapusu nokujo sasu kusho nani. Pano ilokeu kilo pa papewulo,

¹¹ eno aki mpiu vilo pilo:’Kutsuchekeuno ovilo pike pano pa khopemi sasu Hechekulu Ghulhu chunike a-a khile ani kya ipi ani?’ ipilo.

¹² Tileno pano aki jolha kunguu lo a-a kije nokujo piye nanike, tipa-alo thwokha kuto aghilo.”

¹³ Pamano wu kelo Jisu no pikeu toi thwokha tishi ithulu, eno pamano Hechekulu Ghulhu kuto.

Ampeu Ghulhu

¹⁴ Kughou ado tove keno, Jisu no apostolmi sasu chunike iqa.

¹⁵ Pano panongu vilo pi: “Niye Hechekulu Ghulhu hipau ino aghime shimphi lono nongu sasu chunishi kutu cheke!

¹⁶ Kughengu ino nongu vilo pini, Alhou yehkipelo hipau kiqi kupuve mphi kutoloye niye hipau khilemu chumae.”

¹⁷ Tishino Jisu no ajukhu ikhiluno shikimithi Alhou tsuno pi: “Hi ikhilulo eno nongu kumtsu kumtsa showolo.

¹⁸ Kughengu ino nongu vilo pini, hinguno hilauye niye atsayiji hipau Alhou yehkipe ighimo ke kutolo shomae.”

¹⁹ Tishieno, pano asho ikhiluno shikimthi Alhou tsu puzu hi suphope panongu tsuno pi, “Hiye iphimpike khikhi nongu ghenguno tsuvekeno.Ikumsuchilelunike hi shilo.”

²⁰ Tipau gholauno ilhuve kethiu, pano ajukhu ikhipe panongu tsuno pi, “Ajukhu hipauye ihji lono ashoqhi kithe shikeu nongu ghenguno pelevekeu ke.”

²¹ “Ikemu julo, timi khuno ikughape thechu shi keno igholo hile chu anie!

²² Alhou no kughuthakeu toi Timi Nu ye thive nani; ikemu timi khuno pa kughape thechu shikeno pa ghengu kiutoi ahakusapu kela?”

²³ Tileno panongu likhi panongu dolono khuuno hi shini cheni kela pi kighinikile thuve.

Khuno Akijeu kya?

²⁴ Akhopemiqo dolono panongu gholo khuuno akijeu shikepu kela pi muto ithughive.

²⁵ Jisu no panongu vilo pi: “Judakumomi kukamino paw timi shou ka cheni eno timiqo shou ayehpekemi pesu Sushokuluu ipi ku cheni.

²⁶ Ikemu nonguye tishimo nani; ti kumo puzu, nongu gholo akijeuno aghulou toi masae, eno sakipheuno aqeu toive masae.

²⁷ Iqano chuniye kuto akeuno keo pa lojiniye akeuno akijeu kya? Iqano chuniye akeuno ke kumo kya? Ikemu niye nongu gholo lokijimi toi anike.

²⁸ “Nonguye iwu shilukusa eno pejukeu kumtsulo igholo ngo ighivae;

²⁹ eno iPuno ayeh pelu kepu kuka itsuve kehu toi, ino nongu pelo tishilupe anie.

³⁰ Nonguye ikukaqhalo igholo kumtsa chusho nani, eno nonguno akuka lakhulo iqano Israil lagha chighi kini shou ayehpe nani.”

Pitor no Jisu Milivenikeu pi

³¹ “Simon, Simon, inilo! Satan ye timino athi mu-u fuleveke toi nongu kumtsu pejunikeu khuluvae.

³² Ikemu Simon oghenguno ino inikhuvae, ti okupulu iqeve pemo nike. Kughou nono ilau ideghive nikeno othikuzumi shikumto masae.”

³³ Pitor no khochile pi, “Ampeu, niye akughuki lomu ogholo wuni eno ogho lono thinike kutope anie!”

³⁴ “Pitor ino ovilo pini, tipa tsalalo awuduno ighamoke kutolo noye ghuthu kuthu kutolo ni mthakepi nanie” ipi Jisu no pa khochileve.

Pisabo, Jolabo eno Azutakihi

³⁵ Tishieno Jisu no panongu vilo pi, “Puzuu ino puwu kelo pisabo, jolabo eno apukhu kuqho ishi pumo kemu nonguye kumu kuhakeu shimoke kumo kya?” “Lakhimu tomovekeu shimoe” ipi panonguno khochile.

³⁶ Jisu no pi, “Ikemu itehiye khuno pisabo momu jolabo aghini keno ti pelo; eno khuno azutakihi kuha keno pa kuuphi mu jeve puzu lakhi qhuluve masae.

³⁷ Kughengu ino nongu vilo hi pini: Kucho yesulo, ‘Paye lhokusa kughami gholo kihisuve’ ipi puakeu hu ilauno shikupuve masavae. Kughengu khikhi ighenguno yehpe qhikeno ighini putsae.”

³⁸ Akhopemi qono pi, “Julo! Ampeu, azutakihi kini hi anie.” “Ti lumkhae” ipi pano khochileve.

Jisu no Inikhu

³⁹ Puzuu toi Jisu ye Oliv tolo wuve eno pa khopemiqo ghi pa gholo wue.

⁴⁰ Kughou a-a hu tolukeno pano panongu vilo pi, “Ghukujulo ikiqivepemo nike inikhulo.”

⁴¹ Tithiuye paye panongu launo atu vepuwo tolukepu qhemilo wuno qhoqhunhepe inikhua. Pano Alhou vilo inikhu ghi pi;

⁴² “Apuo, opuloushi aghi aye ajukhu hipau ilauno pewuve tsulo. Tishimu igho kumoe, ikemu oghou shitsunie.”

⁴³ Kungugha lono kungumi lakhi pa lau ipeghi eno pa shikumtoe.

⁴⁴ Amlo kughuju kije launo pano alau thummuyi inikhu eno tishikehu pa tsunhizuno ahji muqo kighiji hutoi ayeghilo ijiqie.

⁴⁵ Pa kighini lono ithughino akhopemiqo lau ideighi, ikemu panongu mulo ghime kije akehu panonguye zu aghive.

⁴⁶ Ike pano panongu vilo pi, “Nonguye kushiye zu ani kya? Nonguye ghukujulo ikiqimo kepushi ithuno inikhulo.”

Jisu Kughaluve

⁴⁷ Pano panongu putsa aphi lono timi aqo kitikhi lakhi ighive. Judas ipikeu akhopemi chighikini dolo lakhi huno panongu sasu ighi eno paye Jisu kupununo Jisu mumanike ighi.

⁴⁸ Ikemu Jisu no pi: “Judas, noye kumuma lakhi pesu Timi Nu hu athe shiniye kesha?”

⁴⁹ Jisu gholo akhopemi akeqono kiu shiveni chenikela jupili luvekelauye panonguno pi, “Ampeu, niwu azutakihi hu peithania kene?”

⁵⁰ Panongu dolo milakhino achinetou qeu ghike pa kini ajeu kusavetsu.

⁵¹ Ikemu Jisu no ishi hachile, “Ivelo.” Jisu no timi kini butsu puzu pa shipivive.

⁵² Tile Jisu no kishekiphe achinemi eno achineki khemi sakiphemi eno muchomi khunoqo pa kughaluniye ighikeno tipaqo vilo pi; “Niye aqo-aho yeh hephove kemi toi nonguye azuta eno asuthalu pesu ighi ani kesha?

⁵³ Ino achinekilo ghulo atsu-tsu nongu gholo ache eno nonguye ikughalumoe. Ikemu hipau tuqhudoye nongu wue eno akuzu kuka wue. “

Pitor no Jisu Milive

⁵⁴ Panonguno Jisu kughaluve eno pa sasu Achinetou kilo wuve. Pitor ye putouno papeche.

⁵⁵ Aki khala mtalo ami shipe pua eno ami sumxa iqa akeqo gholo Pitor ghi kuhoe.

⁵⁶ Kughou aqelimi lakhino Pitor ghi ami phivilo iqa akeu ithulu keno lino thebei pa juno pi. “Timi hipau ghi Jisu gholo checheke.”

⁵⁷ Ikemu Pitor no lah ghi pi:”Totimi ghi,niye pa mtha keno kuu!”

⁵⁸ Ado kitila thiu timi lakhino pa ithuluno pi, “Noghi panongu gholo lakhike lae!” Ikemu Pitor no khochile: “Timi ghi, niye khilemu kumoe.”

⁵⁹ Ayikihedo lakhi thiu kutamino tsumomo pi, “Imapi, timi hipauye Jisu gholo chekemie, kughengu pa ghi Galilmi ke.”

⁶⁰ Ikemu Pitor no khochile pi, “Timi ghi lae,nono kiu piqhi ani keno niye tsamu ithi amoe!” Tipa mtsa, pano atsapi aphi lono awudu ighauve.

⁶¹ Jisu no homxa ideghi eno vejoi Pitor ju, tile Pitor ye Ampeu tsa kumsuchileluve, khikhi pano pi puakeu, “Awuduno ishi ighamphi zulo nono imthae pi ghuthu kuthu pi nani.”

⁶² Pitor no khalau ipeve eno shisheno qah auve.

Jisu Thaqhi eno Ghaqhi

⁶³ Khunoqono Jisu suhope aghukhu shi akeno panoqono pa tha eno pa ghaqhi.

⁶⁴ Panonguno pa nhethi khavetsuno pa vilo ishi iniju, “Khuuno ohe anikeno pijulo.”

⁶⁵ Panonguno pa thaighakeu tsa kutomo piae.

Jisu Judami Hoho zulo

⁶⁶ Kughou vu ipeghi keno Judami Muchomi ngo kishekiphe achinemiqo eno Ayeza kukutsumi kumqo kuhoe eno Jisu ye panongu Hoholo saghi, Panonguno iniju,

⁶⁷ “Nivilo pilo, noye Alhou no kishephe puwukeu Mesiya kesha?” Pano khochile pi: “Ino nongu vilo piaye nonguno ipulumo nani,

⁶⁸ eno ino nongu vilo kiuala inijumu nonguno ikhochile mo nani.

⁶⁹ Ikemu hinguno hilau ni Timi Nu ye Alhou akumtou ajeu kudau iqave nani.”

⁷⁰ Panongu kumtsuno pi: “Ike,noye Alhou Nu keo?” Pano panongu khochile pi: “Niye tikepi nonguno pie.”

⁷¹ Tithiu panonguno pi, “Ninguye kiumu thopimi kutau avehupu kuhavae, ningu ampino pa tsa chiluvae.”