Luke 21 - BAIBEL (BSI)

Chimemino Alhou mllakeu Agho

¹ Jisu no tsughuwo ju kelo, khinimino panongu kumllagho achineki kini-khukilo pheqhisu akeu ithulu,

² pano topu chimemi ighono kumlhomi lakhino pisa kuhu kini pheqhisu akeu ghi ithulu.

³ Tile pano pi: “Ino nongu vilo pini, topu chimemi kumlhomi hipauno kuchouno kutami kumtsu nguno alau suvae.

⁴ Kughengu kutamiye pututano kupukuno shi akeu lono qhasu tsue, ikemu liye li kumlho lono pukhubepe akeu kumtsu tsuveke.”

Achineki Kutsavenikeu Tsa

⁵ Timi khamino Achineki ghili pia, tiye kiutoi jukivi aghile kelapi— hiye atukivino shipua eno Alhou lau agho mllakeu pesu koghekughu shipe puake. Jisu no pi,

⁶ “Hipaqo khikhi nonguno ithulu akhani keno, ghulo lakhiloye atu lakhinomu lakhi shou qhimove nani, ikemu kumtsu tukiqeve nani.”

Akupuna eno Shikimighi

⁷ “Kutsuchekeu, kughono hi shive nani kya?” ipi panonguno iniju. “Hipau shini cheke zulo kiuno amchi shi nani kya?”

⁸ Jisu no pi: “Jukuto alo, nongu pishive pekevilo. Kughengu timi kutomo ije lono ighi puzu, ‘Niye pake’ eno ‘Aghuloki hu tovae!’ ipi namu panongu papewu kevilo.

⁹ Kughono aghukishi eno mutomushukeu sutsa chilu nikeno msa kevilo; tikithipu paghi shi nani, ikemu ashekha ghuloki kupunuve ake kumoe.”

¹⁰ Tishi pi puzu pano panongu vilo pi, “Ashiayeh lakhino ashiayeh lakhi shou aghushi nani, eno akukaqha lakhino akukaqha lakhi le nani,

¹¹ eno ayeghi kughutha kije, puqumiye keu, pusa kusu aqha kumtsulo ighi nani; eno akichiqhipu kije eno timi shikughuthu kepu michipu kije atsutsu lono ipeghi nani.

¹² “Hipaqo kumtsu shimphi lono panonguno nongu kughaluve puzu shikighime nani, nongu kughape Sinagog tsakukugha zulo suvetsu nani eno akughukilo suve nani. Ighenguno nongu sasu kukami ngo ayehkipemi zulo wunani.

¹³ Hino nongu pelo ashepe shilukepu dokivi shi nani.

¹⁴ Nongu mlolo hipau mtsu mishei shilulo—hi shimphi lono kishi khochileni kela pi kumsukimghei monike

¹⁵ kughengu noghumi lakhi nomu nonguno pikeulo puthugho mla momu lamla kepu tsa eno alokutsu ino nongu tsu nani.

¹⁶ No-puaza, nothikuzumi, nobolomi eno shompami ghi nongu kughape kutami ulo suvetsu nani, eno nongu khamiye pithivepe nani.

¹⁷ Kumtsuno ighenguno nongu mithi nani,

¹⁸ Ikemu nongu kutsu-sa lakhimu puhamo nani.

¹⁹ Mutotoi tsuqupelo, kughengu ishikeu lono nolikhi no-xalu nani.”

Jerusalem Kutsavenikeu Pi

²⁰ “Kughou ghushimino Jerusalem suhope aghikeu nonguno ithuluni keno, ti kutsave nikeu kupunuvea pi ithilo.

²¹ Tilehi khunoqono Judia lo ani keno naghutolo povelo, khunono aphughilo ani keno ti qhivelo eno khunono aphulo ani keno aphughilo ilo pekevilo.

²² Kughengu hiye amukhukulu tsala, kucho yesulo pi puakeu kumtsu kupuni kehu ke.

²³ Tipa tsala lo mishi puchekemi eno akichhi kipinimi ghenguno ahakusapue! Aghime kitikhi hipau yeghilomi shou ighi nani, eno Alhou loghu pesu timi hipaqo shou be nani.

²⁴ Timi hipaqoye azutakihino ghiqhi nani, eno kutami shiayeh qholo akughumi shisasu sawuve nani, eno Jerusalem ye Juda kumomino nedaqoda nani, ti Juda kumomi ghuloki tomo ke kutolo.”

Timi Nu Ighinikeu

²⁵ “Tileno tsukinhelo, aqhilo eno ayepulo amchipu ipeghi nani, ayeghilo ashiayehqoye azughi ghugha eno azufukukuchono kutakihikeu lono pitipuzaqhi nani.

²⁶ Timiye ayeghiqha shou kiu cheni kela msaqhi kheakelo anguh yewuve nani, kughengu kungulo akuka jeli panongu-a lono kusulepe tukiqeve nani.

²⁷ Tithiu Timi Nu ipeghi nani, khungkusu lono akuka kije eno mulapuyi ighini.

²⁸ Kughono hipaqo shithuni keno puthugholo eno nongu kutsu peqhe lulo, kughengu nongu xachilekulupu kupunuvae.”

Khughuthibo launo Ithilulo

²⁹ Jisu no aholetsa lakhi panongu vilo pi. “Khughuthibo eno asubo kutauqo kumtsu kumsukutoju lo.

³⁰ Kughouno tipaqo nipa mini ipe chekeu ithulu nikeno mutsu tsala kupunu wochea kepi nonguno ithi cheni.

³¹ Tihutoi, kughono hipaqo shi ipeghikeu nonguno ithulu nikeno Alhou yehkipeye kupunuva ipi nonguno ithi nani.

³² Hi kumsululo! Kuchouno ino nongu vilo pini. Itehi timi xuakemi thi mphi lono hipaqo kumtsu shikupu nani.

³³ Atsutsu eno ayeghi ashekha shive nani, ikemu itsaye ashekha shivemo nani.

Jukuto kepu Avehupu shi Akeu

³⁴ “Nongu likhi nongu jukuto alo! Chumzu shomzu eno hipa kuxu sala phukeu lono nongu mlo sunheqhi auve pekevilo, ipuzu tipa tsala zuleno nongu shou ikughi pe kevilo.

³⁵ Kughengu tiye alichhe shipuakelo toi phayi ayeghi qhalo timi kumtsu shou ighi nani.

³⁶ Ike ado kumtsulo jukutokupui inikhu alo, tishianguno hipaqo kumtsulo ime mono hechewu kulupu kumto aghilu puzu Timi Nu zulo puthugho kulupu shilo.”

³⁷ Tipaqo tsalalo Jisu ye achinekilo kutsukeu lono ado puwo ae, eno kughono kijiliu shive nikeno paye wu puzu Oliv to lono putho tsala puwo che.

³⁸ Timi kumtsuno inaqhe itheno achinekilo wupuzu pa tsa ininike ighiche.