Luke 20 - BAIBEL (BSI)

Jisu Kuka Iniju

¹ Ghulo lakhi Jisu no achinekilo timi kutsu eno atsakiviu asheshu akelo achinetomi eno Ayezah kukutsumino muchomiqo gholono ighino

² pa vilo pi, “Noye hipaqo shikepu kiu kukano otsukela nivilo pilo, momu khuno hipaqo shikepu kuka otsu kya?”

³ Jisu no panongu khochile pi: “Nighi inijukepu lakhi nongu inijuni,

⁴ Johan no baptiz shichekeu kukaye Alhou launo keo timi launo ighi kya? Ivilo pilo.”

⁵ Panongu dolono lakhino lakhi sasu hipau kighini kile ghi ishi pi, “Ninguno ‘Alhou launo’ ipini keno pano, ‘Tishiaye nonguye kushiye Johan pulumo kya?’ ipini cheni.

⁶ Ikemu ninguno ‘Timi launo’ ipini keno, aqokitikhi hi kumtsuno atu pesu ni-veqhini cheni, kughengu panongu mlolo Johan ye tungkupumi lakhi kepi mtsuqhei akhani.”

⁷ Ikehu panonguno ishi khochile, “Tiye khilano ighi kela ninguye mthae.”

⁸ Jisu ghi panongu vilo pi, “Tishiaye, nighi kiu kuka lono hipaqo shi cheni keno nongu vilo pimoe.”

Atsayilu Mishi Chichekemi

⁹ Jisu no hipau holetsa timiqo vilo pi: “Timi lakhino alu lakhi ache, tile atsayibo sho pua. Ike tipau mishi chichekemi lau qhivetsu puzu ado kushuwa ghenguno kutami yeghilo wuve.

¹⁰ Atsayi xoluke ghuloki tokelo, pa lu mishi chichekemi launo pa sala lupenike aqemi lakhi puwu. Ikemu mishi chichekemino aqeu heqhi puzu kiumu tsumono idewovepe.

¹¹ Pano aqeu kutau lakhi puwu, ikemu mishi chichekemino tipau ghi heqhi, pa shikukujo eno kiumu tsumono idewovepe.

¹² Pano aqeu akuthuu puwu, ikelauye mishi chichekemino pa ghuzaqhi eno sunhepheve.

¹³ Tileno atsayilu pighiuno pi, ‘Niye kiu shini kela? Niye inu iqhuu puwujuni;panonguno pa qhoqhu nani kenia ke.’

¹⁴ Ikemu kughono mishi chichekemino pa nu ithulu keno panonguno lakhino lakhi vilo pi, ‘Hino amheghi ighini keuke. Ningu pa pithiveni nolo, tishianguno amheghi niwu shiluveniae!’

¹⁵ Ikehu panonguno atsayilu lono pa sunhepheve puzu pa pithive. “Atsayilu pighiuye mishi chichekemi shou kiu shi nani kya?” ipi Jisu no pa tsa iniakemi iniju.

¹⁶ “Pano ighi puzu timi tipaqo pithive nani eno atsayilu pesu mishi chichekemi kutami tsuve nani.” Timiqono ti inia puzu pi, “Khilemu kumoe! Tishi pemoniu.”

¹⁷ Jisu no panongu gilo jupuku puzu iniju. “Tishiaye Kucho yesulo hipau tsa kiqiye kiu kya? ‘Atu khikhi aki kishimino avehupu kuhapi peve keuno, Shishe akhotou tu shive aghi!’

¹⁸ Khunono tipau tu shou veqhi ikuni keno vephopinive nani; eno atu huno khuala shou ikiqi ikulu aye, hino amukhu shi pa tsughuphove nani.”

Zahme Vehu Iniju

¹⁹ Ayezah kutsuchekemi eno achinetomi qono tipa-a lono Jisu kughalu nike pukaputsa, kughengu pano aholetsa hipau pikeuye panongu shou pikepi panonguno ithive, ikemu panonguye timiqo msave.

²⁰ Ikehu panonguno timi khami tuqhouno agho chheve puzu timi tipaqoye achipishi xuchekemi toi amuqushi ghi Jisu lau wupe eno Jisu no kiu pikeno tipauno kughapesu pa melu anguno panonguno pa kughape tipa yeghilo ayehkipemi tsuve nikeu shike.

²¹ Tuqhouno agho chuve keqo huno Jisu vilo pi: “Kutsuchekeu, nono kiu pi eno kutsu cheni keno tiye achipiepi nino ithi anie. Noye agi juchemo, ikemu Alhou laghi kuchou kutsu chenie.

²² Ningu ghenguno zahme pesu Kukami Atou Kaisar tsukeu ni-yehzatsalo achipi keo mokya?”

²³ Ikemu Jisu no panongu muqukini jupililuve eno panongu vilo pi.

²⁴ “Tsandiyi lakhi ipiyejulo. Hipau shou ajuhi chishida puku puakeuye khuu kya?”

²⁵ “Kukami Atou Kaisar wue.” ipi panonguno khochile. Ikelo Jisu no pi, “Tishiaye, Kukami Atou Kaisar wu no Kaisar tsulo eno Alhou wu no Alhou tsulo.”

²⁶ Panonguye timiqo zulo kiu lonomu pa thamlave, ikemu pano khochile keulo akichiqhiyi inaqhoi auve.

Akithi lono Xuthughini keu

²⁷ Judami gholo Sadukimi khami Jisu lau ighi. (Panonguno timiye akithi lono xuithughimo nani ipi pichekeqoke) Panonguno pa vilo:

²⁸ “Kutsuchekeu, Muse no hipau yezah yehpe nitsu puani, ‘Timi lakhino anipu lu puzu atianuli kuha ikemu pano thive aye, timi tipau thikuzuuno anipu tipau lumasae, tishianguno pama tianuliye akithiu ti anuli ipi kukepushi.’

²⁹ Ike ghuthu lakhi athiazumi tsuni ache, akichiuno anipu luke, ati anuli shimono thive.

³⁰ Tileno pa thikuzuu akiniuno li luke pa ghi thive,

³¹ eno pa shelo akuthuuno; eno tihutoi pano tsuni shou akithi ighive—khuu nomu ati anuli shimono thikhave.

³² Ashekhalo totimi tipau ghi thive.

³³ Ikelo, kughou kithimi xuputhuke tsalalo liye khuu nipu shive nani kya? Kughengu liye pano tsuni kumtsu nipu shipuani kehu.”

³⁴ Jisu no panongu khochile pi: “Hipa ghulokilo timiqono lukile wokile acheni,

³⁵ ikemu khunono akithi lono xuputhu kuzumi eno ighinikeu ghulokilo xukuzumiye kulakupu shi chemoe.

³⁶ Panonguye kungumi paphie eno thimlae. Panonguye akithi lono xuputhuve ake ghenguno Alhou nuliqo ake.

³⁷ Kithimi xuputhu nikeu Muse no mtsumishei piyepe puani. Asuminiphono iqukeu ghili yepe puakeu kihedolo pano pi puakeuno. Ampeu ye ‘Abraham Lhou, Isak Lhou eno Jakob Lhou.’

³⁸ Hipau kiqiye paye kuxumi Lhou kethono kithimi Lhou kumoe, kughengu pa lauye kumtsu akuxupue.”

³⁹ Ayezah kukutsumi khamino pa putsa ghi, “Kutsuchekeu, noye akivishi pivae!” ipi.

⁴⁰ Kughengu panonguno pa vilo itaghi kutau inijunikeu msave.

Mesiya vehu Inijukeu

⁴¹ Jisu no panongu vilo pi, “Kishi puzu Mesiya ye David tikughukomi ipi pini kya?

⁴² Kughengu David ampi no Leshele kakulo pikeuno: ‘Ampeu no iMpeu vilo pi: I-u ajeu kudau iqalo,

⁴³ Ino oghumiqo kughape opukhuno nepuku kepu shitsu moke kuto.’

⁴⁴ Tishiaye David ghi pa vilo ‘Ampeu’ ipi kue. Kishi puzu Mesiya ye David tikughuko shi aghini kya?”

Ayezah Kukutsumi Jukuto akepu

⁴⁵ Aqokitikhino pa tsa inia kelo, Jisu no pa khopemi vilo pi:

⁴⁶ “Ayezah kukutsumi jukuto alo, panonguye aphi kushuwa upuzu iqho iqi nishie, eno alhikishi-alo panongu gihu ghi petha panongu tsupe nishie; eno Sinagog lo pa kutakeu-alo iqanikeu kishi chenie eno aghulhulo a-a akhotou phu chenie.

⁴⁷ Panonguno topu chimemi shive aghikemi jupuzu tipaqo ki-ale ghesuqhi cheni, ipuzu timi piyeni aye ado kushuwa aqo gholo inikhu cheni. Kutami nguno panonguno aghime akusau ithulu nani!”