Luke 2 - BAIBEL (BSI)

Jisu Punu

¹ Hipa ghulokilo Rom yeghiqha kumtsulo timi lhoxu hesa kutsu nike Akukau Agostus launo ahza puwu.

² Kurinia no Siria lo Ahng shi ake lono hi hesa keu atughiu shilue.

³ Kumtsuno kihikusulo sunike pututa phughilo wu.

⁴ Josef ghi Galil yeghilo Nazaret phu lono Judia lo David phughi Bethlehem lo wu. Josef ghi David laghalomi kehu tilewue.

⁵ Eno pa sasu tusutuxe shi achekeu Maria ye mishibei pa gholo wue.

⁶ Panonguno tile aphi lono liye punu kepu tsala tove,

⁷ lino anu atughiu punu lu, eno lino aphino kuzuno amshi khulo pa puzu, kughengu panongu ghenguno inami kuwu kilo akungoa kuhave.

Bherikhemi eno Kungumi

⁸ Tipa yeghiqhalo bherikhemi khami aluzalo ae, eno putholo panonguno bheriqo jukutsu ghi khea.

⁹ Tile Ampeu wu kungumi lakhi panongu phivilo ipeghi eno Ampeu jukuvuno panongu homxa yepuvu luveno panonguye shishe musave.

¹⁰ Ikemu kungumino panongu vilo pi: “Musa kevilo! Ino nongu lau asutsa kivi lakhi pe cheni, tiye alokivi kije timi kumtsu lau ighiniye akeu ke;

¹¹ kughengu David phughilo itijino nongu lau xakuluu lakhi punu ani, tiye Khristo Ampeu!

¹² Hino nongu lau amchipu lakhi: nonguno anga lakhi aphino kuzuno amshikhulo zu aghikeu ithulu nani.”

¹³ Paikhavi lono kungumi aqo kitikhino kungumi hipau gholo ipeghino Alhou sheqhe ghi pi:

¹⁴ “Kungughalo Alhou lau ajukuvu shilo! Eno ayeghilo pa lokiqi akemi shou aloinokeu apelo!”

¹⁵ Kungumino panongu launo ixa susu kungughalo wuve kethiu bherikhemi lakhino lakhi vilo pi, “Ampeu no pithi puakeu hu ningu Bethlehem lo wuno kiu shivea pi ani kela juni.”

¹⁶ Panonguno akimighi shi ighieno Maria ngo Josef eno anga no amshi khulo zu aghikeu phulu.

¹⁷ Kughou bherikhemino hi ithulu keno anga ghili panongu vilo pi puakeu panonguno kutami pithi.

¹⁸ Bherikhemino panongu vilo khikhi pi keno ti chikulumi kumtsuno akichiqhive,

¹⁹ ike hi pi keu kumtsu Maria no amlolo qhiluveno kumsukutoju ache.

²⁰ Bherikhemi vilo pikeu toi panonguno thwokha kumtsu chilukeu eno ithulukeu ghenguno Alhou je pipi eno sheqhe ghi idewove.

Jisu je Kutsu

²¹ Pa mishimphi lono kungumino pikeutoi atsala tache thiu pa phighu yiko ghaveno pa je Jisu kutsu.

Achine kilo Jisu sawu

²² Muse Yezah kiqi lono shikimthe keu tsala tovekethiu panonguno pa pesu Ampeu tsuniye xapusu Jerusalem lo iqho.

²³ Ampeu yezah lo yepua keu toi, “Kiptimi punu tughiu thaqhuye kumtsu Ampeu kudau akimthe shitsukeu ipi kuni.”

²⁴ Ampeu Yezah lo pi puakeu kiqi lono, “Amiqhi tuna lakhi momu titoi keu ghau kubtur alhothe kini,” pe akumllagho shighi mlla nikeu shie.

²⁵ Jerusalem lo timi lakhi ache, pa jeye Simon; timi hipauye akivimi, Alhou sukumsami, Israil lokughunotsu nikeu tsala huqhe ache eno Aghungu Kimthe no pa shou ae.

²⁶ Eno Aghungu Kimthe no pa lau pephepiye keuno Ampeuw Khristo ithulumo ke kutolo paye akithi sasu kushomo nikeu shia.

²⁷ Aghunguno pa mijetsukeu lono ighieno achinekilo wue eno kughou apuazano Ayezah lo akhu ayeh kiqi lono shikepu shiakeu shiniye anu Jisu peighi keno,

²⁸ Simon no pau lono khapeluno Alhou she ghi pi:

²⁹ “Ampeu itehiye otsa kiqi lono oqeu pelo aloino ghi wove pelo;

³⁰ Kughengu inhethino ow xakulu ithuluvea;

³¹ Timi kumtsu zulono kuto akeu hu;

³² Akuvu lakhi hi Judakumomi pephepiye anike, Eno ajukuvu owu Israilmi tsunike.”

³³ Ike pa puazaye pa ghenguno Simon no piqhikeulo akumzave,

³⁴ Simon no panongu kumghatsu eno pa za Maria vilo pi; “Julo, anu hipauye Israil lo timi kutomo sunhepuku eno sunheqhi nike qhipuatsu ani. Paye Alhou kudauno amchi lakhi shiamu timi kutomono phimokeu shi nani,

³⁵ eno ishikeu lono panongu wu tuqhou kukumsu pephepiye nani, eno kusakushono azutakihi toi omlo ghi ghixu nani.”

³⁶ Anna ipikeu tungupuliu lakhi ache. Liye Fanuel nga, eno Asher laghami. Liye kitemi shive, kulaukeu ampe tsuni shi ake lono akimi thive

³⁷ no chimekeu ampe lhotache bidi shia. Liye achineki phemono putho pucho akukhu akighini shi Alhou mlla ache.

³⁸ Tishi ake dolo lino ighino Alhou shikimthikeu tsu eno anu ghili pesu Alhou no Jerusalem xachilelu nikeu kheakemi kumtsu pithi.

Nazaret lo ide Wove

³⁹ Ampeu yezah lo akeu kiqi lono panonguno thwokha shikupuve kethiu Galil lo pano phu Nazaret lo idewove.

⁴⁰ Jisu ye mutotoi thuwuve eno paye alokutsuno chhitoi eno Alhou no qhuivu keu pa shou ae.

Jisu itilo Achinekilo wu

⁴¹ Ampe atsu-tsu Israilmi xaphekulu ghulhulo sunike Jisu puazaye Jerusalem lo wu ache.

⁴² Jisu no ampe chighi kini shi akelo puzuu toi panonguye aghulhulo sunike wu,

⁴³ aghulhu ashekha shive kethiu panonguye idewoche kelo anu Jisu ye athiu Jerusalem lo ngo auve; eno pa puazaye hi mutha;

⁴⁴ ikemu kumsujukeulo aqo gholo cheghi nani kenia kepi ghulo lakhi lachelo wuve. Pamano apami eno akusami gholo pa phuju puhave.

⁴⁵ Kughou pa ithumlave keno, pamano pa phususu Jerusalem lo ide ighi.

⁴⁶ Atsala kuthu thiu paye achinekilo Judami yeh kukutsumi gholo iqano panongu sutsa ini eno panongu vilo iniju aghike lono pamano phulu.

⁴⁷ Pa tsa chilukemi kumtsu pano alokutsu shi khochile keulo akumzave.

⁴⁸ Pa puazano pa ithulu kelo pamaye akichiqhive eno pa za no pa vilo pi. “Anu, noye kushiye ishi ni-peitha kya? Opu ikujoye amlokusa shi ophu cheni.”

⁴⁹ Pano pama khochile pi: “Nokujoye kishino iphuju cheni kya? Niye iPu kilo aghi kepue pi nokujoye mtha kesha?”

⁵⁰ Ikemu pano pama vilo pikeu pamano ithi kuthumo.

⁵¹ Pano pama sasu Nazaret lo iqighi,Pano pama gholu eno pazano hi kumtsu li mlolo qhiluve.

⁵² Jisu ye aphimpi eno alokutsu kini kujolo thuwuve, Alhou eno timi lopu shiwuve.