Luke 19 - BAIBEL (BSI)

Jisu eno Zakhai

¹ Jisu ye Jerikho lo ilo puzu ti hechesu wuche.

² Ike tile zahme kuqhami shou atou paje Zakhai ipikemi ache. Paye kinimi lakhi.

³ Pano Jisu ye kiutoi kela juniye pukaputsa, ikemu timi aqokitikhi ghenguno jumlano ae, kughengu paye shitimi ke.

⁴ Ikemu paye aqokitikhi zuu powu puzu Jisu juniye mububo lakhilo mili iku, kughengu Jisu ye tipa lalo wuniye akehu.

⁵ Kughou Jisu no tipa-alo ighi keno pano kunguu jupuku eno Zakhai vilo pi, “Zakhai, mtazu iqighivelo; kughengu niye ishi okilo ngo masa nicheni.”

⁶ Zakhai no mtazu iqighive eno alokivi kije lono pa kilo Jisu sasulue.

⁷ Ti ithulukemi kumtsuno nhenheshi pi, “Timi hipauye axinemi lakhi kilo ngoniye wuvae.”

⁸ Ike Zakhai no puthughono Ampeu vilo pi, “Iniju tsulo, Ampeu! Ino pighiakeu tuxa pesu kumlhomi tsuni, ino khuala pishi puaghi aye, tipa theli ghuthu bidi tsukideveni.”

⁹ Jisu no pa vilo pi, “Ishino xakulu akibo hipaulo ighivae; pa ghi Abraham nu lakhia kehu.

¹⁰ Kughengu Timi Nu ye puhavekeu phu nike eno xalu nike ighie.”

Shuna muqo Holetsa

¹¹ Tileno Jisu no hipa tsa iniakemi vilo aholetsa lakhi pi. Paye Jerusalem kupunuwo chea eno panonguno kumsu akeuno Alhou yehkipe ipeghi niye kuto ani kughashi ake.

¹² Ike pano pi; “Ajekipishi xuchekemi lakhi no akukau shikepu kuka lunike ayeghi kushuwalo wupuzu ideghi nikeu shiae.

¹³ Pano wumphi lono aqemi chighi ku-kutsu eno panongu lakhi khi lau shuna muqo tsu puzu pi, ‘Ino ighimoke dolo hipaqo pesu kimje aghilo.’

¹⁴ Ikemu pa ghakhumino pa mithi, ikehu panonguno pa thiuno aghinimi hapesu ishi piwupe, ‘Ninguye timi hipau pelo ni kukau shipenishi moe.’

¹⁵ “Ajekipishi xuchekemi hu akukau shiluveno ideighi. Pa qemi khipaqo lau shuna muqo tsupuakeno tipaqo khije jehi ala kimjelu akeno ithini kehu mtazu pa zulo ighilo pi ahza tsu.

¹⁶ Atughiuno ighi puzu pi, ‘Akijeu nono shuna muqo lakhi itsukeu pesu niye chighi kimjeluvae.’

¹⁷ ‘Aghile’ ipi pano pi, ‘Noye aqeu kivi lakhie. Nono thime aghulo lomu pukhubelu keke, ino okughape aphughi chighi shou ayehpelu peni.’

¹⁸ Akiniuno pi, ‘Akijeu, nono shuna muqo lakhi itsukeu pesu niye pungu kimjeluvae.’

¹⁹ Hipau vilo pano pi, ‘Nono aphughi pungu shou ayehpelu nani.’

²⁰ Tithiu kutami lakhiye ighino pi, ‘Akijeu, owu shuna muqo hilo, ino aphi tachu pesu kuzupe kusupuaveke.

²¹ Noye tsatsaikemi kehu niye omsaveke. Noye owu kumoamu lucheni, eno nono shosu mo-amu xolu chenike.’

²² Pano pa vilo pi: ‘No aqeu lhoksau ino otsa pesu okileveni! Nono ithikeuno niye tsatsaikemi, khikhi iwu kumo keno tipau luve cheni, eno khikhi ino shosumo keno tipau xolu cheni.

²³ Imaye, kushiye iwu pisa akighishepu-alo sumo kya? Tishianguno ino ideghi kelo akighishe suno ithulu kepushi.’

²⁴ Tileno pano tilehi puthugho akeqo vilo pi, ‘Shuna muqo pa launo ikhiluvelo eno tipau pesu aqeu khuuno shuna muqo chighi ani keno pa tsuvelo.’

²⁵ Panonguno pa vilo pi, ‘Akijeu, paye shuna muqo chighi auve akehu.’

²⁶ Pano khochile pi, ‘Ino nongu vilo pini, khunono ani keno tipano alau tsu nani; ikemu khunono kuha keno, pano kitila aghikeu ghi pa launo ikhisuwuve nani.

²⁷ Ipuzu itehiye, ighumi khipaqono ipelo panongu shou ayehpe penishimo keno hilau saghilo eno izu lono panongu ghiqhivelo.’ ”

Jerusalem lo Hutti Ilo

²⁸ Jisu no hipau pive puzu panongu zuuno Jerusalem lo wuve.

²⁹ Pano Betpage phu eno Bethani phu kupunu ighi kelo, ti Oliv to ipi keulo, akhopemi kini atughushi puwu ghi

³⁰ pi, “Nokujo zuu aphu akeulo wulo, eno nokujono ilo kelo, gadahati khikhi timi khuu nomu ikumphi keno tipau tshupe puaghikeu ithulu nani. Ti kuqho puzu hilau saghilo.

³¹ Khualano nokujo vilo ‘Kushiye ti kuqho ani kya?’ ipi iniju aye, ‘Ampeu no hi avehupu shi anie’ ipi pa vilo pilo.”

³² Ikehu pamano wukelauye Jisu no pikeu toi kumtsu tishi aghikeu ithulu,

³³ Pamano gadahati kuqho akelauye tipau mipeuno “Nokujoye kushiye ti kuqho ani kya?” ipi.

³⁴ Pamano khochile, “Ampeu no hi avehupu shi anie” ipi

³⁵ puzu gadahati Jisu lau saghi. Tithiu panonguno panoqo kuuphi gadahati shou vebe eno Jisu pelo tipa shou iqape.

³⁶ Pano iqa puzu chechekelo, panonguno panongu ku-uphi alalo qhatsu.

³⁷ Kughou pano Jerusalem kupunuve keno, Oliv tolo ala khileno aqhou iqivekeu akeno, tileno pa papechekemi aqokitikhino ti kumzapu thime kumtsu panonguno ithulukeu ghenguno Alhou shikimthi eno asutsa kuloghi lono Alhou sheqhe.

³⁸ Panongu no pi: “Alhou no akukau kumghatsulo, khuuno Ampeu je lono cheni keno! Kungughalo alakishi eno Alhou jekipi shilo!”

³⁹ Tile Farisimi khami aqokitikhi gholono Jisu vilo pi, “Kutsuchekeu, opapechekemi ghasuvelo!”

⁴⁰ Jisu no khochile pi, “Panonguno inaqhoive namu, ino nongu vilo pini, atu noqouno igha ipeghive nanie.”

Jisu no Jerusalem kumsu Qae

⁴¹ Pano Jerusalem phughi kupunu ighive eno kughou ti ithulu keno tipau ghenguno mloqa ghi pi,

⁴² “Nongu ghi ishino ithike aye — kiu lono alashilu cheni kela! Ikemu nono ithulumlae!

⁴³ Ongukusa tsala ighi nani, oghumino ayeghino atozu toi pesu osumxa shipuku nani, eno okhasuluve nani, eno aqha kumtsu lono osuhuluve nani.

⁴⁴ Panonguno okutsave nani, no eno oti onuli obocho alou akemi kumtsu; eno panonguno atu lakhimu puzuu alo qhipemove nani, kughengu Alhou no oxaluni ke ighikeu ghuloki nono mthaveke!”

Jisu no Achinekilo Wu

⁴⁵ Jisu no achinekilo ilo puzu alhikishimi haphethu,

⁴⁶ eno panongu vilo pi: “Alhou no ishi pikeu Kuchoyesulo yepe puani, ‘Ikiye akighini ki ipi ku nani.’ Ikemu nonguno hipau pesu kupukami kughutshua lakhi kughulhove tsuae.”

⁴⁷ Tsalakipetsu Jisu no achinekilo kutsua. Achinetomi eno Ayezah kukutsumi eno sakiphemiqono pa pithiveni shive.

⁴⁸ Ikemu panonguye kishino shikepu kela phumlave, kughengu timi kumtsuno pa tsa ini auve eno atsa lothi lakhimu pheqhini shimoe.