Luke 16 - BAIBEL (BSI)

Amqukinishi Peithakutsuu

¹ Jisu no pa khopemi vilo pi: “Ghuthu lakhi kinimi lakhino peithakutsumi lakhi qhipua, peithakutsumino pawu kuakini pepukavetsu ani pikeu sutsa pa tove.

² Pano pa kusaghipeno pi, ‘Oghili chiluakeu hipauye kiu kya? Inhemgha peitha akeu kihikulaikeu kumtsu sughivelo, kughengu hinguno hilauye noye iwu peithakutsuu shipemo ake!’

³ Timi huno pa likhi pa vilo pi, ‘Impiuye ikumla lono ipuwuvenia puzu niye kishinikela? Niye aka-aghashi ghi alu hokide mla eno ino khuchunike kujoe.

⁴ Niye kiu shimasa keno ithivae!Hi shianguno kughou ikumla kuhave namu niye shompami aghi puzu tipaqono pano kilo isasulu nani.’

⁵ Ikehu khijeno pa mpiu lau api puakeno tipaqo kumtsu pa lau kusu. Atughiu vilo pano pi, ‘Noye impiu pi khije pu ani kya?’

⁶ Timi huno khochile pi, ‘Teli azubohu 100!’ Peithakautsu-u huno pa vilo pi, ‘Opi yesukeu kaku hilo, iqalo eno lhopungu ipi yesuvelo.’

⁷ Itaghi milakhiu vilo pano pi, ‘Eno nono api khije ani kya?’ Timi huno khochile pi, ‘Athi abi 1000 anie.’ Peithakutsu-u huno pa vilo pi, ‘Opi yesukutsu kaku hilo, eno 800 yesuvelo.’

⁸ Amikucho kumou peithakutsuu hipauno amqukini hitoi shikeu ghenguno pa mpiuno pa sheqheke sha? Kughengu ayeghilo kuxu likhi phukichemiye pano kumlapu saje peithani keulo akuvulo auvekemiqo nguno alau amuqukiniue.”

⁹ “Ikehu ino nongu vilo pini, ayeghilo kinikulu ithulukeu pesu nongu sala shompami shi, tishianguno kughouno ti kuhaveni keno, lhokta-kungoa lo nongu sasulu nani kesha?

¹⁰ Khunono ighono kitila lomu pichebekulu shi nani keno kutomo loghi pichebekulu shi nani. Khunono ighono kitila lomu pichebekumlapu keno kutomo loghi pichebe kumlapu shinani.

¹¹ Tishi aye nonguno ayeghilo kini thotsu pichebekulu shi peitha mla aye, khuno kuchou kini pesu nongu pichebetsuni kya?

¹² Kutami mheghi pesu nongu shou pichebetsu mla aye, khuno nongu mheghi nongu tsuni kya?

¹³ Khunomu ampiu kini quaxe shimlae. Paye lakhi mithino lakhiu gihu nani; momu paye lakhi gho-apulou shi puzu lakhiuye qepusa pughai nani. Nonguye Alhou eno kinikulu kinikujo qemlae.”

Jisu no Pikeutsa Hami

¹⁴ Farisimiye akini kupu chekemi kehu, kughono Jisu no hi kumtsu pikeu chilukeno panonguno pa junu.

¹⁵ Jisu no panongu vilo pi: “Timi zulo nongu likhi nonguno achipiu kepi acheni, ikemu Alhou no nongu mlo ithi anie. Kughengu timino kiu pesu amekuapu kije kepi kumsu cheni keno Alhou zuloye kiumu ame kuhae.

¹⁶ Muse no sughikeu zahkutsu eno tungkupmi no pikeu tsaye Johan Baptist ighike kutolo pepimhe cheke. Tileno huthusu akivi sutsa hi Alhou yehkipe ghili pi ighivea, eno lakhikhino hile ilonike anguka vesu cheni.

¹⁷ Ikemu Muse no sughikeu zahkutsu lo chosukeu aghuloumu adou shive nike nguno alau atsutsu eno ayeghi puhavekeuno mlalei keu.

¹⁸ Khuno pa nipu jumuve puzu kutami totimi sasu kulau nikeno salha anie, eno khuno jumuvekeu totimi sasu kulau nikeno pa ghi salha anie.”

Kinimi eno Lazar

¹⁹ “Ghuthu lakhi kinimi lakhi shishe amekusho phimini pepu eno tsalakipe nibonile keulo xu ache.

²⁰ Tilehi kumlhomi lakhi ghi ache, paje Lazar, aphi kumtsu apiyi pususu akiniu hukikhalo saighi che,

²¹ akiniu ghulhu lupa lono munomugho ikiqikeu mu pesu pa mzu vethanishi kutu kehuke; atsuqo thotsu ighino pa piyi mine che.

²² Kumlhomi hu thive eno kungumino Abraham phivilo, kungugha ghulhulo xapuwuve. Kinimi ghi thiveno qhove,

²³ paye Hades lo shishe aghime kije sholua. Pano pagi peqhe ithu jukelo Abraham phivilo Lazar akeu putouno ithulu.

²⁴ Tile pano ighamuku, ‘Apu, Abraham! Ikimiye tsulo eno Lazar pelo pa-uloti azulo chosuno imili dikumko tsupelo, kughengu niye ami hipaulo shishe ime ani.’

²⁵ Ikemu Abraham no pi, ‘Kumsuchilejulo, anu, okuxu kupuju akivi nhemgha ithulu ache eno Lazar ye shilukusa kumtsu ithulu ache ikemu hileye paye alokughuno tsu ani eno nono ime ani.

²⁶ Tinguno alauno ningu dolo akuthoku thonheike ani kehu khunomu hileno kathasu nongu lau wunikeu shimlae, momu khunomu nono akeu lono hilau kathasu ighimlae.’

²⁷ Kinimi huno pi, ‘Tishiaye, apu Abraham, ipuno kilo Lazar puwu lepi ino oqhuiniju ani.

²⁸ Kughengu niye athikuzumi pungu ani, tishianguno pano wuno panongu kutughu keu lono panongu likhimu hipau pitipuzakeu-a lo ighipemo nike.’

²⁹ Ikemu Abraham no pi, ‘Othikuzumi ye Muse kaku eno Tungkupmi kaku ani, panongu pelo tipaqo tsa ini pelo.’

³⁰ Kinimi huno pi, ‘Tiye luzulae, apu Abraham, ikemu khualano akithi lono ithughino panongu lau wu aye, tileno panonguno pano xine lono xaidelu nani.’

³¹ Abraham no pa vilo pi, ‘Panonguno Muse kaku eno Tungkupmi kaku inimo aye, akithi lono timi ithughi namu panongu mlo ithani chemoe.’ ”