Luke 15 - BAIBEL (BSI)

Puhavekeu Bheri

¹ Ghuthu lakhi zahme kuqhami eno kutami aghilikusami ghi kutomo Jisu tsa ininike ighie.

² Farisimi eno Ayezah kukutsumi qono nhenheshi pithu, “Timi hipauye aghilikusami ghi ikhilu kile eno panongu sasu ghi chu cheni.”

³ Tile Jisu no ahole hipau panongu vilo pi:

⁴ “Kumsujukelo nongu gholo khuala bheri 100 akelo lakhi puhave aye kiu shinia? Paye bheri lhotoku toku kumza puaghino ti puhavekeu bheri phulumoke kuto juwu cheni.

⁵ Kughou pano ti phulu nikeno, alokivi launo pa mqalo xapusu

⁶ akilo idewono paw shompami ngo aki sughumi ku kutsu cheni. Pano panongu vilo picheni. ‘Igholo alovi kuqhalo, kughengu iwu bheri puhavekehu phuluvae’

⁷ Titoi, ino nongu vilo piani, kungughalo amikuchomi lhotoku toku khunoqo xukikithe avehupu shimokemi shou alokivi akeu nguno alauno axinemi lakhi xukithe ighilukeulo alokivi alau anie.”

Puhavekeu Pisa

⁸ “Momu kumsujukelo topumi lakhino ghuka chighi akelo lakhi puhave kelo liye kiu shinia? Lino akulu kuqu puzu phulumoke kuto aki khughi chekucheghu kumtsu ju cheni.

⁹ Kughou lino ti phuluve nikeno shompami eno aki sughumi kukutsu cheni. Lino panongu vilo pi cheni, ‘Igholo alovi kuqhalo, kughengu ino puhavekeu ghuka hu phuluvae.’

¹⁰ Ino nongu vilo pini: Titoi Alhou wu kungumi lokivi ghi axinemi lakhi xukithelu keu shou anie.”

Puhavekeu Nu

¹¹ Itaghi Jisu no pi: “Timi lakhino anu kini ache.

¹² Ayitiuno papu vilo pi, ‘Ipuo, amheghilo isaje khije ani keno itehino itsuvelo.’ Tighenguno apuno anu pama dolo amheghi kijevetsu.

¹³ Anu ayitiuye atsala hami thiu amheghi pa saje thaqhuye jekutsu, eno pisa pesu pano yeghi qhiveno wuve. Paye ayeghi kushuwalo wuve eno tilau lahilazakeu kuxu lono pisa kumtsu kilhekulhu puwokhave.

¹⁴ Pano akeu kumtsu puwo khave. Tishi akelo puqumiyekeu kije tipa yeghiqha shou ighive, eno paye kiumu kuhave.

¹⁵ Tishikehu tipa ghakhumi lakhi gholo ngolu, ikelauye timi tipauno pa pelo awo pighi penike puwu.

¹⁶ Paye awono khetsuthi koza chuakeu kutolo chunishi kutu anamu khunomu kiumu pa tsumoe.

¹⁷ Ashekhalo pa ghi pa likhi pa kuxu kumsu chileluno pi, ‘Ipu kilo qechuchekemi kumtsu kupukuno shi chu-sho ani eno niye hile akhuava shi ani.

¹⁸ Niye ithuno ipuh lau wuno pini, Ipuo, ino Alhou zulo eno ogizulo axine shivae.

¹⁹ Niye onu ipi ku kuzu kumovae, ikemu o-ulo qekuchumi lakhi toi ipeitha tsulo.’

²⁰ Pano ithuno papuh lau cheidewove. Pano aki tonikeu ala kushuwalo chephi lono papuhno pa ithulu, papuhye amlo ighiqhiyiveno posu ala lono a-u no panu valuve eno pa mumae.

²¹ Anuno pi: ‘Apuo, niye Alhou zulo eno ogizulo axine shivae, hinguno hilaye niye onu ipi ku kuzu kumoae.’

²² Ikemu apuhno pa qemiqo kuno pi: ‘Papashilo, akuuphi akiviu sughino pa pu-ulo. Anguthi pe pa-u lotilo sutsulo eno apukhu kuqho pe pa pukhu qhotsulo.

²³ Ningu aghulhu shinike amshiti athakupuu hu saghieno heqhilo!

²⁴ Kughengu inu hipauye thiveke ikemu itehiye pa akuxu auvae; paye puhave ikemu itehiye pa phuluvae.’ Tishino aghulhu shia.”

²⁵ “Hipa ghulokilo anu akichiuye alulo huve. Pano aki kupunulo ighikelo alekiphe eno ilhekeu sutsa chilu.

²⁶ Pano aqemi gholo lakhi kuno iniju: ‘Kiu shi ani kya?’ Aqeuno khochile pi,

²⁷ ‘Othikuzuuye akilo ide ighivae, tighenguno opuhye amishiti athakupuu hu heqhivae. Kughengu othikuzuu thimono aghino sasulukehu.’

²⁸ Akichiuye aloghu ideno akilo ghi ilomo piauve; tishikehu apuhno khalau ipeghi eno pa vilo alou iloghilo pi qhuiniju.

²⁹ Pano papuh khochile, ‘Julepi aqemi lakhi toi niye ampe hijejehi mla ighivea eno ghuthu lakhimu nono ahza tsukeu hebide mphi. Iwu shompami sasu kuchukusho shikepu noye ane lakhimu khileno itsu akya?

³⁰ Ikemu onu hipauye omheghi kumtsu kutuqhalimi launo kilhekulhuve eno kughono pano akilo ide ighi keno nono amshiti athakupuu pa ghenguno heqhie!’

³¹ Apuno khochile, ‘Inu, noye pulhapuju akilo acheni eno ino akeu thwokha owe.

³² Ikemu ninguye aghulhu lakhi shino alokivi shikepu shive, kughengu othikuzuuye thive ikemu paye xuaghie, paye puhave, ikemu itehiye pa phuluvae.’ ”