Luke 14 - BAIBEL (BSI)

Jisu no Kusukinimi Shipivi

¹ Apinye tsala lakhilo Jisu ye Farisimi dolo sakiphemi lakhi kilo kuchu kusho shiniye wu, tilehi timiqono tsaqui Jisu jua.

² Aphi a-u kughungumi lakhi Jisu lau ighi,

³ ike Jisu no Ayezah kukutsumi ngo Farisimi vilo iniju ghi pi, “Ningu yezah kakulo apinenilo shipivi kepu pi puani ma?”

⁴ Ikemu panonguno kiumu pa khochilemo. Tile Jisu no timi hu sunhepe puzu pa shipiviveno puwuve.

⁵ Tithiuno panongu vilo pi, “Nongu dolo milakhino anu lakhi momu amshi lakhi apineni lono azu lakilo ikiqi ilove aye apineni shiamu sunhepheve chemo kesha?”

⁶ Panongu ye hipau pikeulo pa khochile mlave.

Hejukithi eno Mtshaivukeu

⁷ Inami kusukeqo gholo khamiye a-a akiviu kishe akeu Jisu no ithuluno hipau holetsa pesu panongu kumtsu vilo pi:

⁸ “Kughou akukula ghulhulo nongu kusu nikeno alakhu akiviulo iqa kevilo. Kughengu onguno akhotou timi kusu puaghi luvi,

⁹ eno nongu kusukeu huno ighieno, ‘Alakhu timi hipau tsulo,’ ipi aye noye kujo pula ghi alakhu chuninei keulo iqani ae.

¹⁰ Tishini ke zuqhu, okusu aye alakhu aqhokigheulo iqalo, tishi anguno okusu keuno ighino ‘Ishou, hilau alakhu kiviulo ikughilo’ ipi pelo. Hino inami kutamiqo zulo agigihu otsu anike.

¹¹ Kughengu khuno pa likhi pa pesu kije shi cheni keno aqhokigheu shivepe nani eno khuno alikhi apesu chuninei nikeno kije shivetsu nani.”

¹² Tithiu Jisu no pa kusukeu vilo pi: “Kughou nono aghulhu momu kuchukusho tsuni keno okusami, othikuzumi, nobolomi momu okisughumi kinimiqo kusu kevilo, kughengu panongu ghi okusu kithe nani eno titoi shipuzu nono kiu shikeno lochileve nani.

¹³ Nono aghulhu tsukelo kumlhomi, aphi a-u kighichemi, ayiku kughupami eno anhethi kighichemi kusulo,

¹⁴ eno noye kumghakeu ithulu nani; kughengu panonguye olochile mlae. Ikemu kivimi xuchileputhuke tsalalo Alhou no olochile nani.”

Aghulhu Kije Holetsa

¹⁵ Tile kuchukusho shiakemi lakhi ye hipau chilu puzu Jisu vilo pi, “Khunono Alhou yehkipelo kuchu kusho shi nani kela akumghae!”

¹⁶ Jisu no panongu vilo pi: “Ghuthu lakhi timi lakhino aghulhu kije tsukeulo timi kutomo kusu.

¹⁷ Aghulhu tsunike zulo pano pa qemi hapesu kusu akemiqo vilo ishi piwupe, ‘Ighilo, thwokha kutove ake!’

¹⁸ Ikemu panongu kumtsa kughano lakhi khino jeku jeli pithuve. Atughiuno aqeu vilo pi, ‘Niye alu lakhi qhu puanike ti juniye wumasake, ikimiye puzu amlo shimotsu kevilo!’

¹⁹ Tipashelou ghi pi, ‘Niye amishitsu tuna pungu qhu puani eno tipaqo peitha juniye wuniye ayeake, ikimiye puzu amlo shimo tsu kevilo!’

²⁰ Akuthuu ghi pi, ‘Niye kulakupu shipesu anike ghenguno ighimlae!’

²¹ Aqeuno idewo puzu hi kumtsu pesu pa mpiu vilo pive. Aki mpiu huye axu ideve eno pa qeu vilo pi, ‘Aphughi lapalo eno alaghila kumtsu mtazu wulo, kumlhomi, aphi a-u kighichemi, anhethi kighichemi eno apukhu kighichemi saghilo!’

²² Tishiwo kushokumolo aqeuno pi, ‘Akijeu, owu ahza kutsu shikupuvae ikemu itaghi a-a aphie!’

²³ Ike ampiuno aqeu vilo pi, ‘Lavela, atoghila eno bidola kumtsulo wulo eno timi pelo iloghi pelo, tishianguno iki chhitoi penike.

²⁴ Ino nongu kumtsu vilo pini, puzuu kusukemiqo lakhimu ighulhu michepemo nani.’ ”

Akhopemi Shilunikeu Mekusho

²⁵ Timi aqokitikhino Jisu gholo wuche, tile pano tsughuwo panongu vilo pi:

²⁶ “Khunono ilau ighi puzu pa pu aza, pa nipu anuli, pa thikuzumi, achelimi eno pa likhi pa milivemo nikeno paye ikhopemi shimlae.

²⁷ Khunono paw kros xapuno ipapemo nikeno ikhopemi shimlae.

²⁸ Nongu gholo lakhino akighiki shinike kughu anapi aye atughushi iqano kiutoi ame khije wove nani keno kihikulaju paghi cheni, ti shikulupu pisa lukumkha anikeo mokeno juni kehu.

²⁹ Pano tishimo aye, paye aghuza qhavekeu likhi thono akighiki shiwo tomlave nani.Tipau ithulukemi kumtsuno pa junu nani.

³⁰ ‘Timi hipauye akumla huthu kemu ashe tomova’ ipi panonguno pi nani.

³¹ Momu kukami lakhino timi 10,000 sasu kukami kutami khuu gholo timi 20,000 akeu sasu aghu shijuni pi aye, pano atughushi iqa puzu paye kutami kukami hu sasu aghu shikulupu mtotoi anikeo mokeno kiqiju cheni.

³² Pano tishimo aye, kutami kukami huno ala kushuwalo chephi lono paye alakishi vehu inijunike pa ghinimi hapuwukepu shimasave nani.

³³ Titoi, nongu khunono pano pighi akeu kumtsu phevemo nikeno ikhopemi shimlae.” Ipi Jisu no hipau pi-ghi kishekhave.

Adou shivekeu Miti

³⁴ “Amiti ye aloe, ikemu tipau kuqhu hauve aye, tipau alo kitheve penikeu la kuhae.

³⁵ Hiye alukichilo eno aghuma lomu sumlae, ikemu peleve cheni. Nongu akini puaghi aye inilo!”