Luke 10 - BAIBEL (BSI)

Jisu no Lhotsuni Puwu

¹ Hipa thiu Ampeu no kutami lhotsuni kishelu eno kininino pano wuniepi akeu phughilo pa zuuno puwue.

² Pano panongu vilo pi, “Ghile hukepu kumzapu ani, ikemu ajumi aghuloshi, tighenguno ghile mipeu pelo ajumi pawu ghilelo puhutsu penike inikhulo.

³ Bheritiqono atineqo gholo ilolukeu toi, ino nongu puwu anike, wulo!

⁴ Pisabo, jolabo, apukhu kuqho namu pewukevilo; eno alalo khumu sasu petha shikile kevilo.

⁵ Nonguno kiu kiu toike kilo wulu namu, atughushi hipilo, ‘Aki hipaulo aloinokeu alo!’

⁶ Aloinokemi tile aghi aye, nongu lokiqi pano shou alu nani, moaye ikhichileve pelo.

⁷ Tipa kilo ngolo, eno panono kiu kutotsu keno chu sholo; kughengu akumlami lakhiye pa jume ithulukuzue. Aki lakhi lono aki kutaulo wuve kevilo.

⁸ Kughou nonguno aphughi lakhilo ilo kelo timino nongu sasuno kiu pesu nongu tsuni keno ti chulo,

⁹ tipa phughilo kusukinimi shipivilo, eno tile akeqo vilo pilo, ‘Alhou yehkipe ye nongu kupunu ighi anie!’

¹⁰ Nonguno aphughi lakhilo ilo kelo timino nongu sasumo aye, tipa laghilalo ipeno pilo,

¹¹ Ninguye nongu sasu alau kiumu shikepu kuhavae nophughi lono nipukhulo dape aghivekeu ayeghi mukhu ghi kukhuqhive ani, ikemu hi ithilo, Alhou yehkipe ye nongu phivilo ighi anie!

¹² Ino nongu vilo piani, atsakukugha tsalalo tipau phughi nguno Sodom noghami lau Alhou no kimiyeqhiyi keu alau piye nani.

Pulumokeu Phughi

¹³ “Khorazinmi, oghengu aha! Bethsaidami, oghengu ghi aha! Kughengu olau akumzapu kumla shitsukeu Tur ngo Sidon lau shi kenapi aye, panonguye yeqhiye phi pepu puzu ayevu kuchhuno khaghino xukitheluve aghini cheke.

¹⁴ Ikemu atsa kukugha ghulokiloye nongu lau nguno alauno Turmi ngo Sidonmi ghenguno kusuqhivetsu nikeu anani.

¹⁵ Eno no Kapernaummi! Noye atsutsu kutolo suqhe ikuniye ani keshea? Noye Hades lo sunhesuve nani!”

¹⁶ Jisu no pa khopemi vilo pi, “Khuno nongu tsa chiluni keno itsa chilu anie, eno khuno nongu miliveni keno imilive ani eno khuno imiliveni keno ipuwukeu milive anie.”

Lhotsuni Ideighikeu

¹⁷ Lhotsuni huno alokivishi ideghino pi, “Ampeu, tughami ghi oje ghenguno ni-qhoqhue.”

¹⁸ Pano panongu vilo pi, “Tsutsukukulo musu toi kunguu atsutsu lono Satan ikiqikeu ino ithulue.

¹⁹ Julepi, ino nongu pelo apighi, achuwapaza, eno aghumi kuka kumtsu shou qodalu penike akuka tsuvea, eno kiu nomu nongu ghuzamo nani.

²⁰ Tishinamu hipaqo ghahwuno nongu qhoqhulu pekeulo alokivi shikevilo; ikemu nongu je kunguu yehpuakeulo alokivi shilo.”

Jisu Lokivi

²¹ Tipa dolo Aghungu Kimthe no alokivi pesu Jisu hupitetsu, eno pano pi, “Atsutsu eno ayeghi Mpeu, Apuo, ino oshikimthi ani, kughengu nono thime hipaqo alokutsumi ngo ithishekemi launo kusuluveno, mthakemi lau pephepiyeke. Iye, Apuo, nono hi shitsukeuye tino opulou kehue.

²² Ipuno thime kumtsu pesu itsuvae; Apu likhino thono Anu ye khuu kela khunomu mthae,eno Anu likhino thono Apuye khu kela eno Anu no khuno lau pephepiye niye kishelu keno tipano likhino thono khunomu mthae.”

²³ Tithiu Jisu no akhopemi lau tsughu ighieno panongu vilo likhi pi: “Nonguno kiu kiu ithulu keno ti ithuluke nhethi aghi keqo kumghae!

²⁴ Ino nongu vilo pini, tungkupmi eno kukami kutomono nonguno kiu ithulu ani keno ti ithulu nishi cheke, ikemu panonguye tishi mlave, eno nonguno kiu chilu ani keno chilu nishia, ikemu panonguye tishi mlaveke.”

Samariami Akiviu Holetsa

²⁵ Tileno Ayezah kukutsumi lakhino puthugho ithughi eno pa ghujughi pi, “Kutsuchekeu, niye lhokta kuxu ithulu nike ghenguno kiu shimasa kya?”

²⁶ Jisu no pa vilo iniju, “Kuchoyesulo kiu yehpuani kya? Noye tile kishi philu puania?”

²⁷ Timi huno khochile pi, “Noye omlo kuchopu ongulho kumtsu okumto kumtsu eno okukumsu kumtsu pe Ampeu Alhou kimiye masa eno okitomi olikhi otoi kimiye masae.”

²⁸ Jisu no pa vilo pi, “Mutsumishei shi khochilevae; hi shilo eno noye akuxupu aniae!”

²⁹ Ikemu Ayezah kukutsumi huno pa likhi paye achipie pinishive kehu pano Jisu vilo iniju, “Khuuno ikisughumi kya?”

³⁰ Jisu no khochile pi, “Timi lakhi Jerusalem lono Jerikho lo iqiche eno paye kupukami ulo ilove, ikelauye panonguno thwokha xalukhave eno akithi kumlho shi pa heqhipe qhiveno wuve.

³¹ Khileno kela achinemi lakhi ghi tipau lalo iqiche, kughou pano timi hu ithulu keno kughowuno muxusu wuve.

³² Tihutoi Levi laghami lakhi tipau-alo ighi, kughou pano timi hu ithulu keno kughowuno muxusu wuve.

³³ Ikemu Samariami lakhi tipa lalo izuwuche eno tipa-a lo ighi kelo timi hu ithulu puzu pa mlolo ighono kimiyeqhiyive.

³⁴ Pa lau wu puzu pa zakuqolo teli ngo aji lepukuno khavetsu; eno timi hu khape pawu gadaha shou kughuqano pa sasu aghuzumikilo saghi eno pa tuchomujo ae.

³⁵ Tishiwo thoghiu pano tsandiyi kini ikhipe aghuzumi ki-kheu tsughi pi, ‘Pa tuchomujo aghilo, nono hinguno alau puwove aghi namu ino ideghi kelono otsu chileni.’ ”

³⁶ “Hipano kuthu gholo noye khikhiuno kupukami ulo ilovekeu lau akisughumi kivi ghili pephe piye kepi kumsulu ania?”

³⁷ Ayezah kukutsuu no khochile, “Kimiyekini kumla shikeu hunoe.” Jisu no pa vilo pi, “Wuno tipaphi shilo!”

Jisu no Martha ngo Maria kilo Wu

³⁸ Jisu ngo akhopemi izu susu wuche kelo aphu lakhi tolu, tile Martha no li kilo Jisu kusu.

³⁹ Li tsunipu Maria ye Ampeu pukhu philo iqano pano kiu pi akeno inia.

⁴⁰ Ikemu Martha ye akumla kutomo shikepushi akehu mighimghai kelauno lino ighino pi, “Ampeu, itsunipuno akumla kumtsu kulhuqhipe itsuve ake noye jumo kesha? Li vilo ikuphulo pilo.”

⁴¹ Ampeu no khochile pi, “Martha! Thime kutomo kehu noye mighimghai eno kutakihi ani.

⁴² Ikemu thime lakhi avehupu shi ani. Maria no thime akiviu kisheluvae eno tiye li launo ikhisuwuve mla nani.”