Luke 1 - BAIBEL (BSI)

Kilethitsa

¹ Shishe Akiqheu Thiofilos tsa: Timi kutomono tolukivi thaqhulo ningu gholo shivekeu thimeqo ghili yehpe qhinikeu shie.

² Abothu lono thebei shi ithulukemi eno asutsa pe vekuphakemino kiu ningu vilo pikeno tipaqo panonguno yeluve.

³ Tishikehu, Thiofilos, hipaqo kumtsu abothu lono ino tsaqui phukide kudajuve ake ghenguno osala, apasu shi yeh nikeu kumsuluvae.

⁴ Tishikeu lono opithi puakeu thwokha kumtsu hu kuchou kepi opelo ithipe niye ke.

Johan Baptist Punu Ghili

⁵ Hi kumtsu Herod no Judia lo Ahng shi ake lono huthue. Abija chine ghola lono shikemi achinemi lakhi ache, pa je ye Zakharia eno pa nipu Elizabet ghi Aron achineu kibo lono ighi kemi.

⁶ Pama kini kujo Alhou zulo amikuchoshi xu ache eno Ampeu no ahza eno ayeh tsukeu aghokulu shi peche.

⁷ Pamaye anuli kuha, kughengu Elizabet ye anuhami eno pama kini kujo kitemi shive.

⁸ Pa kikiphi tsalani tsalakipe kumlla ghenguno Zakharia no Alhou zulo achineu kumla mla-a.

⁹ Achinemi yeh kiqi lono asaqhi kelo pa shou qhibeluno pa pelo Ampeu kilo ilono akumllagho kipitialo musughuta pitinikeu kishepheve. Ike pano Ampeu chinekilo ilono

¹⁰ musughuta piti ake dolo khalacheu akemi kumtsuno akighini shia.

¹¹ Ampeu wu kungumi lakhi pa zulo ipeghino musughuta piti akeu akumllagho kipti-a ajeu kudau puthugho.

¹² Ike Zakharia no hi ithulu kelo paye thughui musave.

¹³ Ikemu kungumi huno pa vilo pi: “Zakharia! Musa kevilo Alhou no okighini chiluvetsua, onipu Elizabet ye anu lakhi punu nani eno nono paje Johan kutsulo.

¹⁴ Kughono pa punu ni keno no eno timi kutomono alokiqi eno alokivi shi nani.

¹⁵ Kughengu paye Ampeu zulo akughushumi lakhi shinani. Pa ye kiu ji kumkamu shomo nani. Paye punuke mtsano Aghungu kimthe no chhitoi nani.

¹⁶ Pano Israilmi kutomo panongu Lhou Ampeu lau saideghi tsu nani.

¹⁷ Tungkupu Elija kuka kumto toi pano Alhou ghinimi shi wu nani.Pano apuh noqo eno anuliqo saidewo kughokulu shitsu nani. Pano hekibidemiqo amikuchomi kukumsu lalo saideghi nani; eno kutope akeqo Ampeu wu timi shitsu nike hekutsu nani.”

¹⁸ Zakharia no kungumi vilo pi: “Tishi nani kemo keno kishino ithini kya? Ni ghi inipu ghi kitemi shiva.”

¹⁹ Kungumino khochile pi: “Niye Gabril, niye Alhou phivilo puthugho acheni, oputsa penike eno hi atsakiviu olau peighi penike ipuwue.

²⁰ Julo, hi kumtsu shikupu moke tsala kutolo noye atsa pilumono inaqhoive nani, kughengu ado achipi lono shikupuniye akeu itsaqo nono pulumoe.”

²¹ Timiqoye Zakharia khea, eno paye kiushiyeno achinekilo ado kushuwa lu auveakela pi akumza ae.

²² Kughou pano khalau ipeghi keno panongu putsa mlave tighenguno paye achinekilo kiula ithulu akena pi panonguno ithive. Pano pa-u pesu panongu kulo piye eno atsa pimlano auve.

²³ Achinekilo akumla shikeu tsalaqo kupu khave kethiu Zakharia ye pa kilo idewove.

²⁴ Ado kitila thiu pa nipu Elizabet ye mishiluve eno lino aqhi pungu kuto akilo pukhope ngove. Lino pi:

²⁵ “Ampeu no ishou jupuku ke tsala lono ikuphu ani, mishi gholono ikukujo peve tsuani.”

Jisu Pununikeu Pithi tsu

²⁶ Elizabet no mishikeu aqhi tsugho shi akelo Alhou no kungumi Gabril hape Galil lo Nazaret phulo puwu.

²⁷ David laghalomi Josef no ini puakeu ilimi lakhi lau puwue, ayiliu jeye Maria.

²⁸ Kungumi no li lau ighieno pi: “Aloino alo, Ampeu ogholo ani eno pano shishe okumghatsu ani.”

²⁹ Ikemu Maria ye kungumino hitoi pikeulo shishe thughuive, eno hipau sutsa kiqiye kiu kela pi akumza ae.

³⁰ Ike kungumino li vilo pi: “Musakevilo, Maria, kughengu Alhou no oqhuivukeu ani.

³¹ Julo, opo lono anu lakhi mishieno punu nani eno nono pa je Jisu ipi kutsu nani.

³² Paye kije shi nani eno Alhou Akiqheu Nu huke ipi ku nani, Ampeu Alhou no pasu David kuka lakhu pe pa tsu nani,

³³ paye pulhapuju ghenguno Jakob lagha kukau shi nani eno pa kukaqhaye ashekha shimo nani.”

³⁴ Tile Maria no kungumi vilo pi, “Niye akimi kuha aphike kishino hi shiluni kya?”

³⁵ Kungumino li vilo pi: “Aghungu Kimthe no oshou ighi nani eno Alhou kuka oshou ngo nani. Hi ghenguno akimthe nga khikhi punu nani keno tiye Alhou Nu ipi ku nani.

³⁶ No sholokumi Elizabet julo, li ghi kitemi shive mu anu lakhi mishikeu hi aqhi akutsughou shi ani. Liye anuhau ipi chekehu.

³⁷ Kughengu Alhou no shimlakeu thimeye kiumu kuhae.”

³⁸ Maria no pi, “Niye Ampeu qeliu, otsa kiqi lono ilau ti shilu peni.” Eno kungumino li launo wuve.

Maria no Elizabet Xujuwu

³⁹ Tipa thiu Maria no mtazu chesu Judia yeghilo naghuto kudau aphu lakhilo wu.

⁴⁰ Eno lino Zakharia kilo ilono Elizabet putsa.

⁴¹ Elizabet no Maria sutsa chiluke mtsa angano li polono ithauve, Elizabet ye Aghungu Kimthe no chhitoive,

⁴² lino asutsa qhemghai keu lono pi: “Noye totimi gholo akumghau! opolo xuthiye akumghapue!

⁴³ Impeu pa za pelo ixuju ighipe keu hiye kiutoi ilau thime kije shitsu ani kelahe!

⁴⁴ Kughengu nono putsakeu sutsa chiluke mtsa ipolo angano alokivi launo ithawuve.

⁴⁵ Nono hi pulukeu akumghapu, Ampeu no ovilo pivekeu shikupu nanike.”

⁴⁶ Maria no pi: “Imlo kuchopuno Ampeu she ani,

⁴⁷ Ilolo alokivi ani, Alhou ye ixakuluu ke.

⁴⁸ Kughengu pano paw aqhokigheu qeliu ikhilue! Hinguno hilauye timi kumtsu no ivilo akumghau ipi kuniae;

⁴⁹ Kughengu akumto Lhou no ighenguno akumla kije mla tsue, Pa jeye akimthe.

⁵⁰ Pa sumsakemi kumtsu shou tiqhelino tiqheli kuto kimiyekeu piye cheni.

⁵¹ Pano pa kumto-u chhopuwono aqhekuzami kukughu hexave tsue,

⁵² Pano akumto kukami panongu kuka lakhu lono sunheqhive, Ikemu aqhokighemi sunheqheve.

⁵³ Pano muzuthikemi thime kivi pesu aghapiqitsu, ikemu kinimi a-u kumsa shi puwuve.

⁵⁴ Pano nipuasu lau ashoqhi shikeu iqemoe; Pano pa qeu Israil kuphu nike ighie.

⁵⁵ Kikimiye pulhapuju Abraham eno pa lagha kumtsu lau piye nike kumsuche.”

⁵⁶ Maria no Elizabet sasu aqhi kuthua ngoano li kilo idewove.

Johan Baptist Punu

⁵⁷ Elizabet no anga ithulu kepu ghuloki tove kelo lino anu lakhi punu lu.

⁵⁸ Li kisughumi eno asholokumino Ampeu no akumzapu kivi li lau piyekeu chiluno panongu kumtsuno li gholo alovi kuqhae.

⁵⁹ Atsala tache thiu panonguno anu phighu yiko ghanike ighi; eno papuh je paphi shighi pa je ghi Zakharia kutsuniye kuto.

⁶⁰ Ikemu pa zano pi: “Moe, pa jeye Johan ipi kunie.”

⁶¹ Panonguno li vilo pi: “Hikithipu je lono kukemi nosholokumi lakhimu kuha aphie.”

⁶² Tithiu panonguno amchi shi-ghi papuh vilo anu je khuu kutsu peniye anikela pi iniju.

⁶³ Zakharia no yepuku kepu lakhi khu eno yepuku ghi ishi piphe, “Pa je ye Johan.” Eno panongu kumtsu no akumzave.

⁶⁴ Tipa mtsa Zakharia kichi eno amili xukho kithe luveno pano Alhou sheqhe thu.

⁶⁵ Panongu cheaxulo akemi kumtsu akumsano chhive eno Judia yeghilo naghutolo aphu akeqo kumtsulo hipau sutsa kugha wove.

⁶⁶ Hi chilukemi kumtsuno pututa mlo lono kumsu kuto ju ghi pi, “Anu hipauye kiu shini cheni kela? Kughengu kuchouno Ampeu wu akuka pa gholo anie.”

Zakharia wu Tungkupu Tsa

⁶⁷ Papu Zakharia ye Aghungu Kimthe no chhitoi lu eno pano tungkupu tsa pi:

⁶⁸ “Ningu Israil Lhou Ampeu sheni nolo!

⁶⁹ Pano pawu timiqo kuphunike eno panongu xaphe nike ghenguno ighie.

⁷⁰ Pano ni ghenguno akumto xakuluu lakhi pa qeu David lagha lono suqhe.

⁷¹ Hi puzuuno pawu tungkupumi akimthemi kichi vechewono pi puakeu toi:

⁷² Nighumi ni mithi chekemi kuka launo ni xalu nikeu pano piqhie.

⁷³ Kikimiye ni puasu lau piye nikeu eno pa kimthe shoqhi kumsuchile lunikeu pie.

⁷⁴ Pano nisu Abraham lau ashoqhi lakhi shie, pano ni ghumi launo ni xachile nikeu shoqhi shie.

⁷⁵ Nipelo musa ichimono pa qepe nike,

⁷⁶ Ni kuxu kupuju pa zulo akimthe eno akumzu shipenike.

⁷⁷ Apuo, noye Alhou Akiqheu wu tungkupu lakhi ipi kuni kughengu nono Ampeu zuu wuno pa laghi kutope puaghi tsu nani,

⁷⁸ Panongu xineqo pevetsu keu vechewono pawu timiqo vilo xakulu kighithi tsu nani. Kughengu niLhou ye kimiyekini eno kupukini ke;

⁷⁹ Pano xakulu kuvu ni shou ipeghipe, Akithi yekukhu kuzulo akemi shou atsutsu lono yepuvutsu, Hi aloinokeu laghilo ni la mijetsu penike.”

⁸⁰ Anuye aphimpi eno aghungulo mutotoi thuwuve, paye Israilmi gizulo pephepiye moke tsala kutolo yenguyelei keu-alo xuache.