LESHELE 9 - BAIBEL (BSI)

Alhou Chipiu Xakutha

¹ Imlo kuchopu pe osheni O AMPEU, Okumzapu kumla kumtsu ino pitsuni.

² Oghenguno niye aloqiqhiyi alovini, ino oje sheqheni, O shishe Akiqheu Lhou.

³ Okualo ighumiqoye tsughu chileve, panonguye ikiqi thive.

⁴ Nono akuka lakhulo iqano achipu eno mutsumisheyi kughutha cheni, nono ichipiu eno isaphughi xathatsuke.

⁵ Nono ashiayeh kutami kileqhive eno alhoksami kutsave; panongu jeye alhokupujulo ikhivetsue.

⁶ Nighumiye alhokupuju shipusave keulo hailovea, nono panongu phughi tulevetsu eno panongu kumsuma qhoivae.

⁷ Ikemu AMPEU ye alhokupuju akukauke; kughakuthapu shi pano pa kukalakhu kuto puani.

⁸ Pano amikucho shi ayeghiqha shou ayehpe cheni, pano achipiu lono shiyehqo shou kughatha cheni.

⁹ AMPEU ye aghimelo akemi kughutshupuake, shiluksa ghulokilo ghenguno akughutshupuake.

¹⁰ Eno khunono oje ithiani keno tipa qoye oshou pukhube cheni, kughengu khunono ophuju cheni keno noye tipaqo pheve chemo.

¹¹ Zion lo ayehpeu AMPEU lau alephe sheqhelo, shiyehqo gholo pano mlapuakeu lhelo.

¹² Alhou ye shiluksashi akemino ighamuku keu kumsuma chemo, Alhou amukhu kuluuye panoqo kumsulu acheni.

¹³ O AMPEU, ikimiyekutu tsulo, imithi chekemino ighimeqhi keu jutsulo, O AMPEU, losunito lono ixapheluvelo!

¹⁴ Tishianguno Zion mi khagho lono ino osheqhe akeu ghili kumtsu pini, nono ixalukeu ghenguno ino alokivi shini.

¹⁵ Ashiayeh kutamiye panono aqoh chhukeulo ilulovae; pano-likhi pano-lichhe lono kitimeluvae.

¹⁶ AMPEU no amikucho shi kughakutha shikeu lono pa likhi pa pephe piyevae, kusakughamiye pano likhi pano kumlano meluve cheni.

¹⁷ Alhou phevekemi ashiayeh eno kusakughami kumtsu Akithi ghimelo wuve nani.

¹⁸ Pulhapuju athokhami kughucho auvemlake; kumlhomino laju achekeu pulhapuju hauvepe mlake.

¹⁹ O AMPEU ithulo! Timi pelo otheqhi vepe kevilo, Ashiayehqo shou ozulo no kughathabe tsulo.

²⁰ Panongu shikumsavelo, O AMPEU! Ashiayehqo pelo panonguye thiveni kuau timi kepi ithi pelo!