LESHELE 51 - BAIBEL (BSI)

Axine Pevetsupenikeu Kighini

¹ Ikimiyekutu tsulo, O Alhou owu iqemokeu kimiyekini, eno okikimiye kupukunoshi akeu kiqi lono ixine nuxa puhave tsulo!

² Ilhoksakugha kumtsu qhukimthe vetsulo eno ixine lono ishikimthe vetsulo!

³ Ino ilikhi ikipimi ithuluvae, ixineye pulhapuju izulo anike.

⁴ Kutami kumono oshou likhi ino axine shivae eno ozulo alhoksa ipichekeu ino shivae. ike noye ishou kughatha nikeulo achipi shianike; ikughape akumou kepi pinikeu noye achipike.

⁵ Niye punu kelono alhoksalo acheghi imishike lono niye axinelo acheghike.

⁶ Noye akikhi eno kuchou avehupushi anike, tighenguno olokutsu pesu imlo tuqhou shika piye tsulo.

⁷ Ixine peivetsulo, niye mithelu nani; iqhuvetsulo, niye murasu nguno metsughoive nani.

⁸ Ipelo alokivi eno alokughunopu sutsa chilu pelo; nono inedaqoda eno iheqhitha pinyive namu niye itaghi alovikithelu nani.

⁹ Ixine launo onhethi miyiluvelo eno ilhoksa kumtsu isuvetsulo.

¹⁰ Kikhikighi mlo ilolo lhophe tsulo, O Alhou, akitheu eno ophe monikeu nguagha ilolo sutsulo.

¹¹ Olauno ihapupo kevilo; oGhungu Kimthe ilauno suwuvetsu kevilo.

¹² Owu xakulu lokivi akeu itsuchilelo, ipelo oghokulu shini shi qhiyi pelo.

¹³ Tishianguno ino oyezah pesu axinemi shikapiyelu nani, eno panonguno olau xaide ghilu nani.

¹⁴ Timi pithivekeu kipimi launo ixaphelulo, O Alhou nono ixakulupu Lhou, nono ixaphelukeu ino vekipighi asheshutsu nani.

¹⁵ O AMPEU, imtsu xukhotsulo eno ikichi pesu osheqhelu nani.

¹⁶ Noye aghakishi lunishi chemo kethono niye tipau pe omllani cheke. Noye lhoxu piti pesu omllakeulo aloqilu chemoe.

¹⁷ Alhou no ikhilutsu nikeu kumllaghoye amlo kughujuke; O Alhou, amlo kughuta kughuju shi olau ighikeu noye mithive chemoe.

¹⁸ O Alhou, Zion lau akivipu shitsulo eno li kuphu tsulo; Jerusalem putukhakeu putukithe tsulo.

¹⁹ Tishianguno noye kithikiyikeu kumllagho shou amloqi nani, niwu pitipesu omllakeulo amloqi nani eno akhachelo amshitsu piti pesu mlla nani.