LESHELE 148 - BAIBEL (BSI)

Tsutsu Yeghino Alhou Sheqhelo

¹ AMPEU sheqhelo! Kungugha kudau AMPEU sheqhelo, nongu kunguu akiqheulo achekeqo!

² Pa sheqhelo, pawu kungumi kumtsu, kungughalo pawu ghushimi kumtsuno.

³ Pa sheqhelo, tsukinhe ngo aqhi; pa sheqhelo, ayepu phuphuyi akeqo.

⁴ Pa sheqhelo, kungugha akiqheu eno atsutsu shou azu akeqo.

⁵ Panoqo kumtsuno AMPEU je sheqhelo! Pano ahza tsuke eno tipaqo lhophe ke;

⁶ Pano ahza tsukeu lono tipaqoye pututa-alo alhokupuju ghope qhike, eno tipaqoye pa hebidemlae.

⁷ Ayeghi kudauno AMPEU sheqhelo, nongu azughi ghahwu eno azughi kutho kumtsu;

⁸ tsutsupha, apughu, murasu eno khungkusu, amlhu kuloghiye pa zahkutsu gholu chekeqoke.

⁹ Pa sheqhelo, naghutoqo ngo atoghiqo, axathibo ngo ghasu ghave;

¹⁰ Lhoxu kumtsu tikishi ngo tughashi, itikiche lhoxu ngo aghauqo

¹¹ Pa sheqhelo, kukami ngo timi kumtsu, kukapumi ngo ayehkipemi kumtsu;

¹² ilimi ngo apumi muchomi topumi eno timiqo ghi.

¹³ Panoqo kumtsu AMPEU je sheqhe pelo! Pa jeye kutau kumtsu nguno akiqheu ke; pa kimthe jekipiye ayeghi ngo kungugha shou ani.

¹⁴ Pano pa shiayeh akumto shitsuke, ikehu pawu timi, Israil lo timiqo pano kupuqhiyi chekemi kumtsuno pa sheqhe. AMPEU sheqhelo!