LESHELE 145 - BAIBEL (BSI)

Shekiqhe Le

¹ ILhou eno ikukau, noye kije kepi ino asheshuni; Alhokupujulo ino oshikimthini.

² Tsalakipetsu ino oshikimthini; Alhokupujulo ino oshikimthini.

³ AMPEU ye kije eno akiqheu lono pa sheqhe kepue; paye kishi kijekeno phukulupu kumoe.

⁴ Nono kiu mlatsukeno tiqheli lakhi lono lakhiu kutolo sheqhe akepuke; nono akughushu kumla shikeu ghenguno panonguno asheshu nani,

⁵ Okimthe jekipi eno ojekughushu panonguno piche nani, niye nono akumzapu kumla shikeu kumsukutoju anani.

⁶ Nono akughushu kumla shikeu timino piche nani, niye nono kishi kije keno asheshu nani.

⁷ Panonguno okivi kumtsu pinani eno okikimiye shipili nani.

⁸ AMPEU ye ivulaikeu eno kimiyekini asheshino aloghu ide cheni, eno iqemokeu kikimiyeno chhitoike.

⁹ Paye milakhikhi lau akivi shicheni eno pano lhopuakeu kumtsu shou amlo ighiqhiyike.

¹⁰ Owu lhoxu jeli kumtsuno osheqhe nani, AMPEU; eno owu timi kumtsuno oshikimthi nani.

¹¹ Panonguno okimthe jekipi eno okuka yehkipe pinani eno okumto kughushu pinani,

¹² ikehu milakhi khino okumla kughushu ithi nani eno oyehkipe qhalo akimthe jekipi ajekughushu akeu ithi nani.

¹³ Oyehkipeye lhokta kutoloke, eno noye alhokupujulo akukauke. AMPEU ye pano piqhikeu papelue. pano shikeu thwokhalo akivike.

¹⁴ Khuno shiluksalo aghini keno pano kuphu cheni; khuno veqhiveno anikeno pano xaqhe cheni.

¹⁵ Kumtsu nhethino lajuqhiyi olau jupuwu acheni, panonguno achuqupu avehupu shikelo nono tsucheni.

¹⁶ Nono lukumkhashi panongu tsu cheni eno kumtsuno avehupu shi akeu ghapiqitsu cheni.

¹⁷ AMPEU ye pano mla ithakeu kumtsulo amikuchoe, pa kumla kumtsulo kupuqhiyikeu ani.

¹⁸ Khunono amlo mutsumishei pa ku ighini keno tipano punukhoi ani.

¹⁹ Khunono pa gihuni keno paye tipaqono avehupu shiakeu tsu cheni; paye panoqono ighamuku keu shiluno panoqo xalu cheni.

²⁰ Khunono pa kimiye chenikeno tipanoqo milakhikhi pano susholuve cheni, ikemu pano kixikilami kutsa pinyive nani.

²¹ Niye pulhapuju AMPEU sheqhe nani; pano lhoqhikeu lhoxu kumtsuno alhokupujulo paje kimthe sheqhe pelo.